Tusk: Ëndërroj për qëndrimin e Londrës në Bashkimin Europian

Presidenti i Këshillit Europian, Donald Tusk tha të enjten se ëndërron qëndrimin e Britanisë së Madhe në BE, një ëndërr që sipas tij nuk është e pamundur. Deklaratat e tij u bënë në samitin europian që mbahet tre ditë pas fillimit të negociatave të Brexit.

"Disa prej miqve të mi britanikë më kanë kërkuar nëse është e mundur të rikthehen pas Brexit dhe nëse mund të imagjinoja një zgjidhje sipas të cilës Britania e Madhe të qëndronte në BE," deklaroi Tusk gjatë një konference për shtyp në Bruksel.

"Unë u thashë atyre se në fakt, Bashkimi Europian është themeluar mbi ëndrra që dukeshin të pamundura për t'u realizuar, atëherë kush e di?", vazhdoi Tusk.

Më pas ai e mbylli fjalën e tij duke rimarrë fjalët e këngës "Imagine" të John Lennon: "Ju mund të thoni se jam një ëndërrimtar, por nuk jam i vetmi".

Negociatat për kushtet e largimit të britanikeve nga BE-ja filluan zyrtarisht të hënën në Bruksel nga dy kryenegociatorët, Michel Barnier për Bashkimin Europian dhe ministri i Brexit, David Davis. (ATSh/Leftion Peristeri)