«Хуаэр» - адзін з відаў выканання народных песень, папулярных у правінцыях Ганьсу, Цінхай, Нінся-Хуэйскім аўтаномным раёне, Сіньцзян-Уйгурскім аўтаномным раёне, што на паўночным захадзе Кітая. Выкананне гэтых песень вельмі любяць прадстаўнікі народнасцяў дунсян, бааань, хуэй, салар, якія тут пражываюць. У песнях «хуаэр» гаворыцца пра шчаслівае жыццё, цудоўнае каханне. Мы прапануем вам разам пабываць у Нінся-Хуэйскім аўтаномным раёне і пазнаёміцца з песенна-танцавальнай драмай «Вяселле на зямлі народнасці Хуэй».

Песенна-танцавальная драма «Вяселле на зямлі народнасці хуэй» распавядае пра каханне юнака і дзяўчыны народнасці хуэй Юсуфа і Сайлімэй. Іх гісторыя кахання вельмі кранальная. Спевы народнасці хуэй ў стылі «хуаэр», віртуознае танцавальнае майстэрства, традыцыйныя святочныя ўборы і ўпрыгажэнні, а таксама разнастайнасць мясцовай кухні глыбока ўразілі гледачоў. Турыст з Пекіна Ван Чжун'і сказаў:

«Я думаю, што гэта вельмі добры спектакль. Дзякуючы яму, мы ўбачылі і даведаліся пра гісторыю, традыцыі, звычаі, культуру народнасці хуэй. Мы паглядзелі добрую драму, для нас гэта проста цудоўны ўрок па гісторыі і культуры. Думаю, што гэта добрая форма папулярызацыі культуры народнасці хуэй».

Хуэй - адна з 10 народнасцяў Кітая, якія спавядаюць іслам. Вяселле хуэйцаў адрозніваецца ўрачыстасцю і захаваннем яркіх рэлігійных традыцый. У песенна-танцавальнай драме «Вяселле на зямлі народнасці хуэй» паказваюцца такія мусульманскія звычаі, як абмыванне дзяўчыны перад выхадам замуж і сцэна чытання нікаха, гэта значыць, ахун чытае пропаведзь аб значэнні сям'і, адказнасці маладых адно перад адным, важнасці правільнага выхавання будучага пакалення. Мусульманін Ада Маман з Нігера з гэтай нагоды сказаў:

«Для мусульман вельмі важна, каб ахун на вяселлі чытаў "ніках ", бо толькі пры сведчанні ахуна вяселле лічыцца дасканалым у адпаведнасці з ісламскімі пропаведзямі. У нас у краіне, у раёне, дзе кампактна пражываюць хаўса, ахун абавязкова прысутнічае на вяселлі і чытае "ніках". Жаніх і нявеста раздаюць сваякам і сябрам падарункі, як гэта паказваецца ў песенна-танцавальнай драме. Калі я ўбачыў, што на сцэне ахун пачаў чытаць "ніках", мне было вельмі прыемна, што традыцыі і звычаі мусульман у Кітаі цалкам аднолькавыя з нашымі ў Нігеры».

У 2009 годзе спевы ў жанры "хуаэр" былі ўключаны ў спіс нематэрыяльнай культурнай спадчыны ААН. Рэжысёр Ма Сяндун сказаў нам, што музыка песенна-танцавальнай драмы «Вяселле на зямлі народнасці хуэй» напісана на аснове запазычаных народных песень "хуаэр", папулярных у асяроддзі хуэйцаў Нінся-Хуэйскага аўтаномнага раёна. Мелодыя "хуаэр" - гэта лейтматыў, які праходзіць праз увесь спектакль ад пачатку да канца. Гэта дуэт, антыфон, сола. Ма Сяндун сказаў:

«"Хуаэр" - гэта спевы, распаўсюджаныя ў горным раёне на поўдні аўтаномнага раёна Нінся. Выяўленню і перадачы гэтай манеры спеваў надаюць увагу многія людзі. Наша песенна-танцавальная драма - плён інавацый нашай творчай працы».

На думку рэжысёра Ма Сяндуна, гэта мастацкая пастаноўка павінна закрануць душу чалавека. Горныя раёны на поўдні Нінся ўключаны ААН у адно з такіх месцаў, не зусім прыдатных для чалавечага пражывання. Аднак, на гэтай зямлі жывуць хуэйцы, якія, настойліва пераадольваючы цяжкасці, стварылі светлую культуру. Каб больш людзей даведаліся пра гэта, рэжысёр Ма Сяндун і яго калектыў прыклалі вялікія намаганні ў стварэнні і ўвасабленні на сцэне песенна-танцавальнай драмы «Вяселле на зямлі народнасці хуэй». Рэжысёр Ма Сяндун сказаў:

«У гэтай тэатральнай пастаноўцы адлюстроўваецца духоўны свет народнасці хуэй. Многія людзі, можа быць, не ведаюць, што хуэйцы, па сутнасці, вельмі прадпрымальныя, з аптымізмам глядзяць у будучыню, не баяцца цяжкасцяў. Падчас нашай творчай працы мы пастараліся раскрыць гэтыя рысы характару».

Члены калектыву Ансамбля песні і танца горада Чжунвэй Нінся-Хуэйскага аўтаномнага раёна творча і натхнёна працавалі і дасягнулі поспеху ў пастаноўцы гэтай драмы. Танцоўшчыца Чжан Хайнін выконвае ролю галоўнай гераіні. Яна сказала, што для дасягнення добрага эфекту яна і яе партнёркі штодня працавалі больш за 10 гадзін. Чжан Хайнін не мае дачынення да нацыянальнасці хуэй. Аднак яна старалася добра пазнаёміцца са звычаямі і традыцыямі гэтай народнасці. Чжан Хайнін сказала:

«Я па нацыянальнасьці не хуэй. Але я родам з раёна, дзе жывуць разам і хуэйцы, і ханьцы. У нас у ансамблі ёсць нямала хуэйцаў. Я часта прымаю ўдзел у вясельнай цырымоніі народнасці хуэй. Гэта вельмі дапамагае мне ў выкананні ролі гераіні ў драме ».

Драма «Вяселле на зямлі народнасці хуэй» атрымала добрыя водгукі адразу пасля паказу на сцэне. У канцы 2009 года пры садзейнічанні Цэнтра культурнага абмену аўтаномнага раёна Нінся ансамбль песні і танца ездзіў у Пекін на гастролі. Сёлета падчас сесій УСНП і НПКСК яны яшчэ раз былі ў Пекіне, дзе выступілі 13 разоў з песенна-танцавальнай драмай «Вяселле на зямлі народнасці хуэй». З гэтым спектаклем яны таксама выступілі перад гледачамі ў турыстычнай зоне Шапатоу. Кіраўнік ансамбля Се Чэнхун сказала:

«Наша выступленне прывабіла многіх турыстаў. Яны з вялікай цікавасцю глядзелі гэту драму і багата даведаліся пра народнасць хуэй. Гэта ўзбагаціла праграму іх падарожжа».

У размове пра будучыню кіраўнік ансамбля Се Чэнхун сказала, што творчы калектыў паедзе на гастролі з песенна-танцавальнай драмай «Вяселле на зямлі народнасці хуэй» у іншыя гарады і правінцыі краіны. Адначасова з гэтым, будуць прыкладацца намагнні для правядзення замежных гастроляў з гэтым спектаклем.

-о-