У апошнія гады ў клініках Кітая вялікую папулярнасць набылі вушныя іголкі. Іх уводзяць у сюевэй, размешчаныя на вушной ракавіне. Кітайскія медыкі лічаць, што вуха чалавека цесна звязана з усімі цзінло, а фізіялагічныя і паталагічныя змены ў сэрцы, нырках, мозгу, печані, селязёнцы, кішэчніку выяўляюцца на вушной ракавіне. Падчас прымянення гэтага метаду было даказана, што ён не толькі здымае галаўны, зубны і неўралгічны боль, але і прыступы ў вобласці паясніцы, ныркавыя колікі, пасляаперацыйны боль, эфектыўна пазбаўляе ад бяссоння, лечыць гіпертанію, язвы, нетрыманне мачы і іншыя захворванні. Па адчувальнасці і болю ў кропках на вушной ракавіне, а таксама па зменах колеру скуры на розных яе ўчастках кітайскія лекары дыягнастуюць некаторыя захворванні.