ព្រឹកថ្ងៃទី ៤ ខែឧសភា មហាសន្និបាតរំលឹកខួបកំណើតទី ២០០របស់លោក ម៉ាក្សបានប្រារព្ធធ្វើយ៉ាងឱឡារិកនៅវិមានសភាប្រជាជនក្រុងប៉េកាំង ។ លោក ស៊ីជីនភីង អគ្គលេខាធិការនៃគណៈកម្មាធិកាមជ្ឈិមបក្សកុម្មុយនិស្តចិន ប្រធានរដ្ឋចិននិងជាប្រធានគណៈកម្មាធិការយោធាមជ្ឈិមបក្សកុម្មុយនិស្តចិនបានថ្លែងសុន្ទរកថាគន្លឹះក្នុងសនិ្នបាតលើកនេះ ដោយបានគូសបញ្ជាក់ថា យើងរំលឹកដល់លោក ម៉ាក្ស គឺដើម្បីបង្ហាញពីការគោរពចំពោះទស្សនវិទូដ៏មហិមាជាងគេក្នុងប្រវតិ្តសាស្ត្រមនុស្សលោក ហើយក៏ដើម្បីបង្ហាញពីឆន្ទៈយ៉ាងមុតមាំរបស់យើងទៅលើទ្រឹស្តីសច្ចធម៌បែបវិទ្យាសាស្ត្រនៃម៉ាក្សនិយមផងដែរ ។ ជានិច្ចកាល គំនិតម៉ាក្សនិយមគឺជាគំនិតណែនាំសម្រាប់បក្សនិងរដ្ឋរបស់ប្រទេសចិន គឺជាអាវុធដ៏ខ្លាំងក្លាខាងគំនិតសម្រាប់ជួយឲ្យយើងយល់ដឹងពីពិភពលោក ក្តាប់ជាប់ក្រឹត្យក្រម ស្វែងរកសច្ចភាព និងកែប្រែពិភពលោកផងដែរ ។ ក្នុងយុគសម័យថ្មី សមាជិកបក្សកុម្មុយនិស្តចិនគួរតែបន្តរៀនសូត្រពីលោកម៉ាក្ស រៀនសូត្រនិងអនុវត្តម៉ាក្សនិយម លើកទង់ម៉ាក្សនិយមដ៏មហិមា ក្នុងន័យក្រេបយកតម្រិះប្រាជ្ញាប្រកបដោយវិទ្យាសាស្ត្រនិងថាមពលនៃទ្រឹស្តី ដើម្បីប្រកាន់ខ្ជាប់និងអភិវឌ្ឍសង្គមនិយមប្រកបដោយលក្ខណៈពិសេសរបស់ប្រទេសចិនក្នុងយុគសម័យថ្មីដែលកាន់តែមានកម្លាំង កាន់តែមានជំនឿចិត្ត និងកាន់តែមានតម្រិះប្រាជ្ញា ក៏ដូចជាធ្វើឲ្យអនាគតដ៏ល្អបវរនៃសង្គមមនុស្សលោកដែលជាក្តីស្រមែរបស់លោកម៉ាក្សនិងលោក Engels លេចចេញប្រកបដោយភាពរស់រវើកជាបន្តបន្ទាប់នៅលើទឹកដីនៃប្រទេសចិន ៕