តាមក្រសួងពាណិជ្ជកម្មចិនបានប្រកាសតួលេខទាក់ទាញទុនបរទេសថ្មីបំផុតឱ្យដឹងថា ពីខែមករាដល់ខែកក្កដាឆ្នាំ២០១៨នេះ សហគ្រាសទុនបរទេសដែលបង្កើតថ្មីនៅប្រទេសចិនមានចំនួន៣៥២៣៩សហគ្រាស កើនឡើង៩៩,១%បើធៀបនឹងរយៈពេលដូចគ្នានាឆ្នាំ២០១៧។ បានប្រើប្រាស់ទុនបរទេសជាជាក់ស្តែងចំនួន៤សែន៩ម៉ឺន៦ពាន់៧១០លានយាន់ប្រាក់ចិន កើនជាងរយៈពេលដូចគ្នានាឆ្នាំ២០១៧ចំនួន២,៣%។ ក្នុងនោះ ក្នុងខែកក្កដាឆ្នាំ២០១៨មានសហគ្រាសទុនបរទេសចំនួន៥៦៤៨សហគ្រាសបានបង្កើតឡើងនៅទូទាំងប្រទេសចិន កើនឡើង១១៣,១%បើធៀបនឹងរយៈពេលដូចគ្នានាឆ្នាំ២០១៧ បានប្រើប្រាស់ទុនបរទេសជាក់ស្តែងចំនួន៥ម៉ឺន៤រយ២០លានយាន់ប្រាក់ចិន ធៀបនឹងរយៈពេលដូចគ្នាកើនឡើង១៤,៩%។
បើមើលពីបរិមាណ ការកៀគរទុនបរទេសរបស់ប្រទេសចិនគឺមានភាពនឹងនរនិងមានការកើនឡើង។អ្វីដែលសំខាន់នោះគឺ ការកៀគរទុនបរទេសបានសម្រេចការលើកកម្ពស់គុណភាពដោយនឹងនរ ពោលគឺបានប្តូរពីវិស័យកែច្នៃនិងដំឡើងដែលមានតម្លៃបន្ថែមទាបទៅកាន់វិស័យឧស្សាហកម្មផលិតកម្មបច្ចេកទេសដែលមានតម្លៃបន្ថែមខ្ពស់គួរសមជាសន្សឹមៗ។
ខាងវិស័យចំណុចកំណើននៃទុនបរទេស តំបន់សាកល្បងពាណិជ្ជកម្មសេរីនិងតំបន់ភាគខាងលិចនៃប្រទេសចិនបានក្លាយទៅជាតំបន់ថ្មីនៃការវិនិយោគទុនរបស់បរទេស។
ក្នុងខណៈពេលជាគន្លឹះដែលអាមេរិកបានបំផុសសង្រ្គាមពាណិជ្ជកម្មនិងស្ថានការណ៍សេដ្ឋកិច្ចអន្តរជាតិមានភាពស្មុគស្មាញ ប្រទេសចិននៅតែបានមានសមិទ្ធផលស្តីពីការកៀរគរទុនបរទេសដ៏លេចធ្លោបែបនេះ តើមកពីមូលហេតុណាខ្លះ?
ជាបឋម ពេលបច្ចុប្បន្ន បរិយាកាសធ្វើអាជីវកម្មនិងធ្វើពាណិជ្ជកម្មរបស់ប្រទេសចិនត្រូវបានកែលម្អជាបន្តបន្ទាប់ ហើយការដាក់កំហិតទៅលើការវិនិយោគបានត្រូវកាត់បន្ថយជាសន្សឹមៗ។
បន្ទាប់មក ប្រទេសចិនមានឧត្តមភាពខាងខ្សែសង្វាក់ឧស្សាហកម្ម សមត្ថភាពផលិតកម្មទ្រង់ទ្រាយធំនិងទីផ្សារពិសេសដែលអាចផ្តល់ការគាំទ្រមួយចប់ដល់ផលិតកម្មរបស់សហគ្រាសទុនបរទេស។
ទី៣ ប្រទេសចិនមានការប្តេជ្ញាចិត្តនិងប្រតិបត្តិការក្នុងការបន្តពង្រឹងនិងពង្រីកការបើកទូលាយ ដែលជាការកម្រមានណាស់ក្នុងសម័យបច្ចុប្បន្នដែលការគាំពារនិយមផ្នែកពាណិជ្ជកម្មបាននិងកំពុងរីកផុលផុសយ៉ាងខ្លាំងនោះ។
បច្ចុប្បន្ន ទីផ្សារចិនបានកៀរគរទុនបរទេសឲ្យហូរចូលជាបន្តបន្ទាប់ដែលបានឆ្លុះបញ្ចាំងឲ្យឃើញថា មូលធនពិភពលោកនិងក្រុមហ៊ុនពហុជាតិមានជំនឿចិត្តនិងការរំពឹងទុកយ៉ាងពេញលេញចំពោះអនាគតរបស់ប្រទេសចិន ហើយក៏បានបង្ហាញថា ការធ្វើសកលភាវូបនីយកម្មគឺជាតម្លៃរួមដែលគ្មានព្រំប្រទល់។ប្រការនេះបានដើរតួនាទីជំរុញដ៏សំខាន់ចំពោះពិភពលោកក្នុងការគាំពារប្រព័ន្ធពាណិជ្ជកម្មពហុភាគីនិងបង្កើតជាទម្រង់សេដ្ឋកិច្ចបែបបើកចំហ៕
