នៅថ្ងៃទី ២៣ ខែតុលា លោក WangYi សមាជិកក្រុមប្រឹក្សាកិច្ចការរដ្ឋចិននិងជារដ្ឋមន្ត្រីក្រសួងការបរទេសចិនបានជួបពិភាក្សាការងារជាមួយឯកអគ្គរាជទូត/រដ្ឋទូតនៃបណ្តាប្រទេសអាស៊ានទាំង១០ប្រចាំនៅប្រទេសចិននៅសណ្ឋាគាររដ្ឋ Diao Yutai នៅក្រុងប៉េកាំង។
ថែ្លងក្នុងកិច្ចជំនួប លោក WangYi បានលើកឡើងថា ទំនាក់ទំនងរវាងចិននិងអាស៊ានបានឈានពីដំណាក់កាលលូតលាស់ដល់ភាពចាស់ទុំ។ភាគីទាំងពីរគួរតែឆ្លៀតយកឱកាសខួប១៥ឆ្នាំនៃការបង្កើតទំនាក់ទំនងភាពជាដៃគូយុទ្ធសាស្ត្ររវាងចិននិងអាស៊ានក្នុងឆ្នាំនេះដើម្បីបង្កើនថែមទៀតនូវការជឿទុកចិត្តគ្នាទៅវិញទៅមក ក៏ដូចជាពង្រីកកិច្ចសហប្រតិបត្តិការនិងពួតដៃជាមួយគ្នាដើម្បីជំរុញទំនាក់ទំនងរវាងចិននិងអាស៊ានឲ្យឈានដល់កម្រិតថ្មី។ភាគីទាំងពីរមានឆន្ទៈបន្តពង្រឹងគំនិតផ្តួចផ្តើមខ្សែក្រវាត់មួយនិងផ្លូវមួយនិងការតភ្ជាប់គ្នាជាមួយនឹងទស្សនៈវិស័យអាស៊ានឆ្នាំ ២០២៥ និងគម្រោងផែនការអាស៊ានស្តីពីការតភ្ជាប់គ្នានិងការទាក់ទងគ្នាជាដើម ដើម្បីអនុវត្តកិច្ចសហប្រតិបត្តិការបន្ថែមទៀតស្របតាមតម្រូវការរបស់ភាគីទាំងពីរ។
លោក WangYi បានចង្អុលបង្ហាញថា ភាគីចិនគាំទ្រយ៉ាងម៉ឺងម៉ាត់នូវការកសាងសហគមន៍អាស៊ាន គាំទ្រឋានៈស្នូលរបស់អាស៊ានក្នុងកិច្ចសហប្រតិបត្តិការតំបន់ និងគាំទ្រតួនាទីសកម្មរបស់អាស៊ានក្នុងកិច្ចការតំបន់។បច្ចុប្បន្ន កត្តាមិននឹងនរនិងមិនជាក់ច្បាស់ក្នុងស្ថានការណ៍អន្តរជាតិបានកើនឡើង ឯកតោភាគីនិយមនិងការពារនិយមកំពុងកើនឡើង បទបញ្ញត្តិអន្តរជាតិប្រឈមនឹងគំរាមកំហែង ហើយប្រព័ន្ធពហុភាគីកំពុងរងការវាយប្រហារ សហគមន៍អន្តរជាតិមានការព្រួយបារម្ភជាទូទៅចំពោះសភាពការណ៍បែបនេះ។ប្រទេសចិនរីករាយសហការជាមួយបណ្តាប្រទេសអាស៊ាន ដើម្បីខិតខំគាំពារពហុភាគីនិយមនិងប្រព័ន្ធពាណិជ្ជកម្មសេរីដែលឈរលើមូលដ្ឋានច្បាប់ គាំពារតួនាទីសំខាន់របស់អង្គការសហប្រជាជាតិក្នុងកិច្ចការអន្តរជាតិ។ប្រទេសចិននិងប្រទេសអាស៊ានគួរតែរួមគ្នាជំរុញឲ្យសន្និសីទកំពូលមេដឹកនាំអាស៊ីបូព៌ាមួយចំនួនបន្តផ្តោតលើអាស៊ីបូព៌ា ជំរុញកិច្ចសហប្រតិបត្តិការ និងដើរតួនាទីវិជ្ជមានក្នុងការគាំពារសន្តិភាពតំបន់និងជំរុញការអភិវឌ្ឍន៍នៃតំបន់។
លោក WangYi បានបញ្ជាក់ថា ប្រទេសចិនយល់ស្របទៅនឹងការធ្វើកំណែទម្រង់ដ៏ចាំបាច់របស់អង្គការពាណិជ្ជកម្មពិភពលោក ។ យើងខ្ញុំគាំទ្រការធ្វើកំណែទម្រង់នេះដែលអាចអំណោយផលដល់ការគាំពារគោលការណ៍ជាមូលដ្ឋាននៃអង្គការពាណិជ្ជកម្មពិភពលោក គាំពារសិទ្ធិនិងផលប្រយោជន៍ស្របច្បាប់នៃបណ្តាប្រទេសកំពុងអភិវឌ្ឈន៍នានា ។ ការពិភាក្សាជុំវិញកំណែទម្រង់គួរតែបើកទូលាយ មានតម្លាភាព និងប្រមូលមិតយ៉ាងទូលំទូលាយ ដើម្បីឈានដល់គំនិតឯកភាពគ្នាដែលភាគីនានាអាចទទួលយកបាន ។
បណ្តាឯកអគ្គរាជទូតប្រទេសអាស៊ានទាំង១០ប្រចាំនៅប្រទេសចិនបានថ្លែងអំណរគុណចំពោះប្រទេសចិនក្នុងការគាំទ្រយ៉ាងម៉ឹងម៉ាត់នូវតួនាទីស្នូលរបស់អាស៊ានក្នុងកិច្ចសហប្រតិបត្តិការតំបន់ ហើយរីករាយរួមសហការជាមួយប្រទេសចិនដើម្បីបង្កើនកិច្ចសហប្រតិបត្តិការជាក់ស្តែងយ៉ាងស៊ីជម្រៅក្នុងវិស័យនយោបាយ សេដ្ឋកិច្ចពាណិជ្ជកម្មនិងវប្បធម៌មនុស្សជាតិជាដើម។ភាគីទាំងពីរគួរតែរួមគ្នាខិតខំប្រឹងប្រែងដើម្បីគាំពារពហុភាគីនិយម និងគាំពារប្រព័ន្ធពាណិជ្ជកម្មសេរីដែលចាត់ទុកអង្គការពាណិជ្ជកម្មពិភពលោកជាស្នូល។
លោក WangYi និងឯកអគ្គរដ្ឋទូតរាជទូតបណ្តាប្រទេសអាស៊ានក៏បានផ្លាស់ប្តូរមតិយោបល់គ្នាអំពីបញ្ហាសមុទ្រចិនខាងត្បូងផងដែរ។ភាគីទាំងពីរបានឯកភាពថា ក្រោមកិច្ចខិតខំប្រឹងប្រែងរួមគ្នារបស់ប្រទេសចិននិងប្រទេសអាស៊ានសភាពការណ៍នៅសមុទ្រចិនខាងត្បូងកាន់តែមានភាពធូរស្រាលនិងស្ថិរភាព។ការដើរដល់សេចក្តីព្រាងបទពិគ្រោះយោបល់នៃ“ក្រមប្រតិបត្តិសមុទ្រចិនខាងត្បូង(COC)” មានអត្ថន័យសំខាន់ណាស់។បណ្តាប្រទេសអាស៊ានរីករាយសហការជាមួយប្រទេសចិនដើម្បីជំរុញការពិគ្រោះពិភាក្សាបន្តទទួលបានការវិវឌ្ឍរីកចម្រើនតទៅទៀត៕
