ថ្ងៃទី ១៥ ខែធ្នូ តាមម៉ោងតំបន់ លោក Ghani ប្រធានាធិបតីអាហ្វហ្គានីស្ថានបានជួបពិភាក្សាជាមួយលោក វ៉ាងយី សមាជិកក្រុមប្រឹក្សាកិច្ចការរដ្ឋ និងជារដ្ឋមន្ត្រីការបរទេសចិននៅ ក្រុងកាប៊ុល ។
ថ្លែងក្នុងកិច្ចជំនួប លោក វ៉ាង យី បានលើកឡើងថា ប្រទេសចិនរីករាយរួមសហការជាមួយអាហ្វហ្គានីស្ថាន ធ្វើការខិតខំប្រឹងប្រែងជាមួយគ្នាដើម្បីអនុវត្តឲ្យបានល្អនូវគំនិតឯកភាពរួមរបស់ប្រមុខរដ្ឋប្រទេសទាំងពីរ ក្នុងន័យជំរុញទំនាក់ទំនងភាពជាដៃគូយុទ្ធសាស្ត្រទ្វេភាគីរីកចម្រើនទៅមុខឥតឈប់ឈរ ។ ប្រទេសអាហ្វហ្គានីស្ថានគឺជាដៃគូសំខាន់ក្នុងកិច្ចកសាង “ខ្សែក្រវាត់មួយនិងផ្លូវមួយ ” ប្រទេសចិនរីករាយពង្រឹងនិងពង្រីកពាណិជ្ជកម្មនិងការបណ្តាក់ទុនទ្វេភាគីជាមួយអាហ្វហ្គានីស្ថាន ដើម្បីជួយប្រទេសអាហ្វហ្គានីស្ថានស្តារឡើងវិញក្នុងពេលឆាប់ៗ និងពន្លឿនដំណើរអភិវឌ្ឍន៍ ។
ជាការឆ្លើយតប លោក Ghani បានថ្លែងអំណរគុណដល់ប្រទេសចិនដែលបានដើរតួនាទីមានលក្ខណៈស្ថាបនាក្នុងការជំរុញការផ្សះផ្សារក្នុងប្រទេសអាហ្វហ្គានីស្ថាន ក៏ដូចជាបានផ្តល់ជំនួយឧបត្ថម្ភដល់ការអភិវឌ្ឍសេដ្ឋកិច្ចនិងសង្គមនៃប្រទេសអាហ្វហ្គានីស្ថាន ។ ប្រទេសអាហ្វហ្គានីស្ថានរីករាយរួមសហការជាមួយប្រទេសចិនធ្វើឲ្យកិច្ចសហប្រតិបតិ្តការជាក់ស្តែងមានភាពកាន់តែស៊ីជម្រៅ ក៏ដូចជាពង្រឹងនិងពង្រីកទំហំធ្វើពាណិជ្ជកម្ម និងបង្កើនការបណ្តុះបណ្តាលបុគ្គលិកផងដែរ ៕