ថ្ងៃទី២២ខែមីនាតាមម៉ោងក្នុងតំបន់ លោកស៊ីជីនភីងប្រធានរដ្ឋចិនបានជួបពិភាក្សាជាមួយលោកSergio Mattarellaប្រធានាធិបតីអ៊ីតាលីនៅក្រុងរ៉ូម។ ប្រមុខរដ្ឋនៃប្រទេសទាំងពីបានឯកភាពគ្នាថានឹងក្តាប់ជាប់ទិសដៅអភិវឌ្ឍនៃទំនាក់ទំនងរវាងចិននិងអ៊ីតាលីក្នុងកម្រិតយុទ្ធសាស្ត្រខ្ពស់និងចក្ខុវិស័យវែងឆ្ងាយ សហការគ្នាជំរុញទំនាក់ទំនងភាពជាដៃគូយុទ្ធសាស្រ្តគ្រ់បជ្រុងជ្រោយរវាងចិននិងអ៊ីតាលីឱ្យទទួលបានការអភិវឌ្ឍកាន់តែធំក្នុងរយៈកាលថ្មី។
ថ្លែងក្នុងកិច្ចជំនួប លោកស៊ីជីនភីងបានលើកឡើងថា ឆ្នាំ២០១៩គឺជាខួបទី១៥នៃការបង្កើតទំនាក់ទំនងភាពជាដៃគូយុទ្ធសាស្រ្តគ្រប់ជ្រុងជ្រោយរវាងចិននិងអ៊ីតាលី ហើយឆ្នាំ ២០២០គឺជាខួបទី៥០នៃការបង្កើតទំនាក់ទំនងផ្លូវទូតរវាងប្រទេសទាំងពីរ។ ប្រទេសចិនរីករាយក្នុងការរួមសហការជាមួយអ៊ីតាលីដើម្បីបន្តពង្រីកស្មារតីសហប្រតិបត្តិការ បង្កើនការផ្លាស់ប្តូរជាយុទ្ធសាស្ត្រ ដើម្បីរួមចំណែកជាតម្រិះប្រាជ្ញានិងកម្លាំងថ្មិីសម្រាប់ការកសាងពិភពលោកមួយដែលកាន់តែល្អបវរ។
លោកស៊ី ជីនភីង បានលើកឡើងថា ប្រទេសចិនបានគាំទ្រដំណើរសមាហរណកម្មរបស់ទ្វីបអឺរ៉ុបជាប់រហូតមក រំពឹងថា ភាគីអ៊ីតាលីអាចបន្តដើរតួនាទីយ៉ាងសកម្ម ក្នុងន័យជំរុញឲ្យសហភាពអឺរ៉ុបរួមសហការជាមួយប្រទេសចិនដើម្បីរួមគ្នាជំរុញទំនាក់ទំនងភាពជាដៃគូលើ ៤ វិស័យធំៗ គឺសន្តិភាព កំណើន កំណែទម្រង់ និងអរិយធម៌ ។
ជាការឆ្លើយតប លោកSergio Mattarellaបានថ្លែងថា ប្រទេសអ៊ីតាលីសូមគាំទ្រគំនិតផ្តួចផ្តើមអំពីកិច្ចកសាង”ខ្សែក្រវាត់មួយនិងផ្លូវមួយ”ដែលផ្តួចផ្តើមឡើងដោយលោកស៊ី ជីនភីង ហើយជឿជាក់ថា គំនិតផ្តួចផ្តើមមួយនេះនឹងមានអំណោយផលដល់ការតភ្ជាប់គ្នានិងការអភិវឌ្ឍជាមួយគ្នារបស់ទ្វីបអឺរ៉ុបនិងអាស៊ី ។ ភាគីអ៊ីតាលីនឹងខិតខំពេញទំហឹងលើការជំរុញទំនាក់ទំនងរវាងអឺរ៉ុបនិងចិនឲ្យវិវឌ្ឍរីកចម្រើនយ៉ាងស៊ីជម្រៅ ហើយរីករាយបង្កើនការប្រាស្រ័យទាក់ទងនិងការសម្របសម្រួលជាមួយភាគីចិនក្នុងអង្គការពហុភាគី ដូចជាអង្គការសហប្រជាជាតិនិងក្រុមប្រទេសG20ជាដើម ក្នុងន័យរួមគ្នាគាំពារពហុភាគីនិយមនិងសេរីភាវូបនីយកម្មផ្នែកពាណិជ្ជកម្ម ព្រមនិងប្រកៀកស្មាគ្នាទប់ទល់នឹងបញ្ហាប្រឈមដូចជាបម្រែបម្រួលអាកាសធាតុ និងសន្តិសុខអន្តរជាតិជាដើម ៕