តួលេខដែលក្រសួងពាណិជ្ជកម្មចិនបានប្រកាសនៅថ្ងៃទី ១៨ ខែមេសា បង្ហាញឲ្យឃើញថា ពីខែមករាដល់ខែមីនាឆ្នាំនេះ ប្រទេសចិនកៀរគរបានទុនបរទេសលើសពី២ សែន ៤ ម៉ឺន ២ ពាន់២រយលានប្រាក់យាន់ចិន កើនជាងរយៈពេលដូចគ្នានៃឆ្នាំទៅចំនួន ៦.៥ ភាគរយ ក្នុងនោះ អត្រាទុនបរទេសដែលតំបន់សាកល្បងផ្នែកពាណិជ្ជកម្មសេរីបានប្រើប្រាស់ជាក់ស្តែង គឺមានចំនួនលើសពី១០ភាគរយ ។
ទាក់ទិននឹងរឿងនេះ លោក Gao Feng អ្នកនាំពាក្យក្រសួងពាណិជ្ជកម្មចិនបានឧទ្ទេសនាមថា នៅត្រីមាសទីមួយឆ្នាំនេះ វិស័យផលិតកម្មប្រកបដោយបច្ចេកទេសខ្ពស់និងវិស័យសេវាកម្មប្រកបដោយបច្ចេកទេសខ្ពស់បានស្រូបទាញទុនបរទេសឲ្យកើនឡើងយ៉ាងខ្លាំង ។ ដោយឡែក អត្រាប្រើប្រាស់ទុនបរទេសជាក់ស្តែងលើវិស័យផលិតកម្មប្រកបដោយបច្ចេកទេសខ្ពស់បានកើនឡើង១៤.៨ភាគរយបើធៀបនឹងរយៈពេលដូចគ្នានៃឆ្នាំទៅ ចំណែកវិស័យសេវាកម្មប្រកបដោយបច្ចេកទេសខ្ពស់វិញបានកើនឡើង៨៨ភាគរយបើធៀបនឹងរយៈពេលដូចគ្នានៃឆ្នាំទៅ ៕