រសៀលថ្ងៃទី១១ខែកញ្ញា នៅក្រុងប៉េកាំង លោកស៊ីជីនភីងប្រធានរដ្ឋចិនបានជួបពិភាក្សាជាមួយលោកHo Iat-seng អភិបាលអាណត្តិទី៥នៃតំបន់រដ្ឋបាលពិសេសម៉ាកាវដែលទើបបានតែងតាំងដោយរដ្ឋាភិបាលមជ្ឈិមចិន ។
លោកស៊ីជីនភីងបានសម្តែងការអបអរសាទរចំពោះលោកHo Iat-sengព្រមទាំងបានថ្លែងថា ក្នុងរយៈពេល២០ឆ្នាំកន្លងមកនេះ រដ្ឋបាលនៃតំបន់រដ្ឋបាលពិសេសម៉ាកាវបានរួមសាមគ្គីជាមួយឥស្សរជនគ្រប់មជ្ឈដ្ឋានក្នុងសង្គម យល់ដឹងនិងអនុវត្តដោយគ្រប់ជ្រុងជ្រោយនិងចំគោលដៅនូវគោលការណ៍ណែនាំស្តីពីប្រទេសមួយប្រព័ន្ធគ្រប់គ្រងពីរ បានជំរុញកំណើនសេដ្ឋកិច្ចយ៉ាងឆាប់រហ័ស កែលម្អជាបន្តបន្ទាប់នូវជីវភាពរស់នៅរបស់ប្រជាជន ក៏ដូចជាស្ថិរភាពនិងភាពសុខដុមរមនាក្នុងសង្គមម៉ាកាវផងដែរ ។ ការពិតជាក់ស្តែងបានបញ្ជាក់ថា គោលនយោបាយស្តីពីប្រទេសមួយប្រព័ន្ធគ្រប់គ្រងពីរគឺអាចអនុវត្តបាននិងទទួលបានការគាំទ្រទាំងស្រុងពីសំណាក់ប្រជាជន ។
ជាការឆ្លើយតប លោកHo Iat-seng បានថ្លែងថា លោកសូមប្តេជ្ញាចិត្តយ៉ាងម៉ឺងម៉ាត់ក្នុងការអនុវត្តដោយមិនងាករេនូវគោលនយោបាយស្តីពីប្រទេសមួយប្រព័ន្ធគ្រប់គ្រងពីរក្រោមការដឹកនាំរបស់លោកស៊ីជីនភីងប្រធានរដ្ឋចិននិងរដ្ឋាភិបាលមជ្ឈិមចិន ដើម្បីគាំពារឱ្យបានល្អនូវកិត្យានុភាពនិងសិទ្ធិអំណាចរបស់រដ្ឋធម្មនុញ្ញនិងច្បាប់មូលដ្ឋាន ក៏ដូចជាគាំពារឱ្យបានល្អនូវអធិបតេយ្យភាព សន្តិសុខនិងផលប្រយោជន៍អភិវឌ្ឍន៍របស់ប្រទេសជាតិផងដែរ ៕
