រសៀលថ្ងៃទី១៧ខែកញ្ញា តាមម៉ោងក្នុងតំបន់ លោកលីខឺឈាងនាយករដ្ឋមន្រ្តីចិននិងលោកMedvedevនាយករដ្ឋមន្រ្តីរុស្ស៊ីបានរួមគ្នាជួបជាមួយអ្នកសារព័ត៌មាននៅក្រុងសាំងភីធឺស្បឺកប្រទេសរុស្ស៊ី ។
នាយករដ្ឋមន្រ្តីនៃប្រទេសទាំងពីរបានវាយតម្លៃយ៉ាងសកម្មចំពោះលទ្ធផលជាផ្លែផ្កានៃកិច្ចជំនួបតាមពេលកំណត់រវាងនាយករដ្ឋមន្រ្តីចិននិងរុស្ស៊ីលើកទី២៤ ។ លោកលីខឺឈាងបានថ្លែងថា កិច្ចសហប្រតិបត្តិការជាក់ស្តែងរវាងចិននិងរុស្ស៊ីប្រកបដោយលក្ខណៈពិសេស ពោលគឺមានភាពគ្រប់ជ្រុងជ្រោយ ទូលំទូលាយនិងកម្រិតខ្ពស់ ។ រំពឹងថាភាគីទាំងពីរអាចពិគ្រោះពិភាក្សាយ៉ាងសកម្មនូវការធ្វើឱ្យស៊ីជម្រៅនូវកិច្ចសហប្រតិបត្តិការខាងការធ្វើសមាហរណកម្ម បង្កើនតម្លៃបន្ថែមនៃកិច្ចសហប្រតិបត្តិការថាមពល ដើម្បីជំរុញឱ្យសម្រេចបានគោលដៅស្តីពីការធ្វើឱ្យទំហំពាណិជ្ជកម្មទ្វេភាគីកើនឡើងទ្វេដងតាមពេលកំណត់ ។ ចិននិងរុស្ស៊ីសុទ្ធតែគាំទ្រពហុភាគីនិយមនិងពាណិជ្ជកម្មសេរី ប្រទេសទាំងពីរគួរឆ្លងតាមរយៈការពង្រឹងនិងពង្រីកការបើកចំហចំពោះក្រៅប្រទេសនិងការបើកចំហចំពោះគ្នាទៅវិញទៅមក ដើម្បីសម្រេចឱ្យបានកាន់តែល្អនូវការផ្តល់ផលប្រយោជន៍ដល់គ្នាទៅវិញទៅមកនិងឈ្នះ-ឈ្នះ។
លោកMedvedevបានថ្លែងថា បច្ចុប្បន្ននេះ ទំនាក់ទំនងភាពជាដៃគូសហប្រតិបត្តិការជាយុទ្ធសាស្រ្តគ្រប់ជ្រុងជ្រោយរវាងរុស្ស៊ីនិងចិនបានឈានចូលយុគសម័យថ្មី ។ ភាគីរុស្ស៊ីរីករាយរួមសហការជាមួយភាគីចិន ធ្វើកិច្ចខិតខំប្រឹងប្រែងដើម្បីត្រួសត្រាយចំណុចសំខាន់នៃកិច្ចសហប្រតិបត្តិការទ្វេភាគីឱ្យបង្វែរពីវិស័យថាមពលប្រពៃណីទៅកាន់វិស័យវិទ្យាសាស្រ្តនិងបច្ចេកទេសខ្ពស់ ក្នុងន័យបំពេញបន្ថែមឥតឈប់ឈរនូវកម្លាំងចលករថ្មីសម្រាប់ជំរុញទំនាក់ទំនងភាពជាដៃគូសហប្រតិបត្តិការជាយុទ្ធសាស្រ្តគ្រប់ជ្រុងជ្រោយរវាងរុស្ស៊ីនិងចិនក្នុងយុគសម័យថ្មី ៕
