ថ្ងៃទី ១៤ ខែវិច្ឆិកា ពេលអញ្ជើញចូលរួមកិច្ចជំនួបលើកទី១១នៃអ្នកដឹកនាំប្រទេស BRICSនៅក្រុងប្រស៊ីលីយ៉ា លោក ស៊ីជីនភីង ប្រធានរដ្ឋចិនបានបង្ហាញពីគោលជំហរយ៉ាងម៉ឺងម៉ាត់របស់រដ្ឋាភិបាលចិនចំពោះស្ថានការណ៍ហុងកុងក្នុងពេលបច្ចុប្បន្ន ។ នៅថ្ងៃទី ១៥ ខែវិច្ឆិកា ប្រព័ន្ធសារព័ត៌មានសំខាន់ៗរបស់ហុងកុង រួមមានកាសែត Takungpao និងកាសែត wenweipo ក៏ដូចជាគ្រប់មជ្ឈដ្ឋានក្នុងសង្គមបានសម្គាល់ឃើញព្រមៗគ្នាថា សុន្ទរកថារបស់លោក ស៊ី ជីនភីង បានបង្ហាញទៅកាន់ពិភពលោកនូវការបេ្តជ្ញាចិត្តរបស់រដ្ឋាភិបាលមជ្ឈិមក្នុងការគាំពារវិបុលភាពនិងស្ថិរភាពហុងកុង អធិបតេយ្យភាព សន្តិសុខនិងផលប្រយោជន៍អភិវឌ្ឍន៍របស់ជាតិ ហើយនឹងណែនាំឱ្យប្រជាពលរដ្ឋគ្រប់មជ្ឈដ្ឋាននៅហុងកុងរួមសាមគ្គីគ្នា ដើម្បីបង្ហាញជំហរគាំទ្រកាន់តែមុតមាំដល់រដ្ឋបាលនៃតំបន់រដ្ឋបាលពិសេសហុងកុងក្នុងការបញ្ចប់អំពើហិង្សានិងទប់ស្កាត់ភាពចលាចល ។
លោក Tang Yingnian សមាជិកគណៈកម្មាធិការអចិន្ត្រៃយ៍នៃសភាប្រឹក្សានយោបាយប្រជាជនទូទាំងប្រទេសចិន និងជាប្រធានសមាគមជំរុញមិត្តភាពហុងកុងបានថ្លែងថា សុន្ទរកថារបស់លោកប្រធានរដ្ឋ ស៊ី ជីនភីង បានផ្តល់ការលើកទឹកចិត្តដល់គ្រប់មជ្ឈដ្ឋាននៅហុងកុង ហើយបានផ្តល់ការគាំទ្រជាគន្លឹះសម្រាប់ឱ្យហុងកុងទៅប្រឈមនឹងដោះស្រាយភាពលំបាកក្នុងពេលបច្ចុប្បន្ន ក៏ដូចជារៀបចំស្ថិរភាពនិងសុខដុមឡើងវិញ ។
លោក Tan Yaozong សមាជិកគណៈកម្មាធិការអចិន្ត្រៃយ៍នៃសភាតំណាងប្រជាជនទូទាំងប្រទេសចិនបានថ្លែងថា សុន្ទរកថានេះបានបង្ហាញឱ្យឃើញថាលោកប្រធានរដ្ឋ ស៊ី ជីនភីងយកចិត្តទុកដាក់យ៉ាងខ្លាំងចំពោះស្ថានការណ៍នៅហុងកុង រដ្ឋបាលនៃតំបន់រដ្ឋបាលពិសេសហុងកុងត្រូវបំផុសកម្លាំងទាំងអស់ក្នុងសង្គម ដើម្បីមានកម្លាំងកាន់តែរឹងមាំសម្រាប់បញ្ចប់អំពើហិង្សានិងទប់ស្កាត់ចលាចលតាមនីតិវិធីច្បាប់ ៕