ក្រសួងការបរទេសចិនបានប្រកាសកាលពីថ្ងៃទី១០ខែសីហាថា ប្រទេសចិនសម្រេចអនុវត្តការដាក់ទណ្ឌកម្មភ្លាមៗទៅលើឥស្សរជនអាមេរិកចំនួន១១រូបដែលមានសកម្មភាពយ៉ាងអាក្រក់លើបញ្ហាពាក់ព័ន្ធហុងកុង។ នេះគឺជាការឆ្លើយតបចំពោះទង្វើខុសឆ្គងរបស់អាមេរិកដែលដាក់ទណ្ឌកម្មទៅលើមន្រ្តីចំនួន១១រូបនៃស្ថាប័នរដ្ឋាភិបាលមជ្ឈិមចិននិងតំបន់រដ្ឋបាលពិសេសហុងកុង។១១រូបទល់នឹង១១រូប ការតបតវិញស្មើគ្នារបស់ភាគីចិនសមហេតុសមផល ត្រឹមត្រូវនិងប្រកបដោយភាពចាំបាច់ ហើយបានបញ្ចេញសញ្ញាយ៉ាងច្បាស់លាស់ដែលមិនខ្លាចការគំរាមកំហែងនិងបំភិតបំភ័យរបស់ភាគីអាមេរិកនិងគាំពារយ៉ាងមុតមាំនូវអធិបតេយ្យភាពជាតិនិងសេចក្តីថ្លៃថ្នូរ។
បើមើលពីបញ្ជីឈ្មោះដាក់ទណ្ឌកម្មរបស់ភាគីចិនច្បាប់នេះអាចឃើញថា ជាយូរយារណាស់មកហើយ សមាជិករដ្ឋសភាអាមេរិកនិងអ្នកទទួលខុសត្រូវនៃអង្គការក្រៅផ្លូវការអាមេរិកមួយចំនួនដែលត្រូវដាក់បញ្ចូលក្នុងបញ្ជីនេះបានជ្រៀតជ្រែកកិច្ចការហុងកុងយ៉ាងគឃ្លើន មួលបង្កាច់គោលនយោបាយ “ប្រទេសមួយប្រព័ន្ធគ្រប់គ្រងពីរ” លើកទឹកចិត្តនិងផ្តល់ការគាំទ្រដល់ពួកឧទ្ធាមជ្រុលនិយម ក៏ដូចជាបំផ្លិចបំផ្លាញទាំងចំហដល់វិបុលភាពនិងស្ថិរភាពរបស់ហុងកុងផងដែរ។ឧទាហរណ៍ដូចជា សមាជិកសភាជាន់ទាបអាមេរិកលោកMarco Rubioដែលប្រឆាំងនឹងចិនហួសពេកគឺជាអ្នកផ្តើមគំនិតនូវអ្វីដែលហៅថា”សេចក្តីព្រាងច្បាប់ស្តីពីសិទ្ធិមនុស្សនិងប្រជាធិបតេយ្យរបស់ហុងកុង”។ ក្នុងអំឡុងពេលកើតមានភាពរកាំរកូសស្តីពីការធ្វើវិសោធនកម្មលក្ខន្តិកៈច្បាប់ហុងកុងកាលពីឆ្នាំ២០១៩ លោកTed Cruzនិងលោក Josh Hawleyសមាជិកព្រឹទ្ធសភាអាមេរិកជាដើមប្រញាប់រូតរះទៅកាន់ហុងកុង ដើម្បីយកសាំងមកចាក់លើភ្លើង ពួកគេបានឃោសនាយ៉ាងគឃ្លើននូវកម្លាំងហិង្សា ហើយគ្រវីទង់ជួយពួកឧទ្ធាមជ្រុលនិយមស្រែកបន្ទរ។
ប្រទេសចិនដាក់ទណ្ឌកម្មទៅលើសមាជិករដ្ឋសភាអាមេរិកនិងអ្នកទទួលខុសត្រូវនៃអង្គការក្រៅផ្លូវការអាមេរិកមួយចំនួនលើកនេះ បានបង្ហាញយ៉ាងច្បាស់ថា ក្នុងបញ្ហាសំខាន់ៗដែលពាក់ព័ន្ធដល់អធិបតេយ្យភាព សន្តិសុខនិងផលប្រយោជន៍អភិវឌ្ឍន៍របស់ប្រទេសជាតិ ប្រទេសចិនមិនបន្ធូរបន្ថយគោលជំហរជាដាច់ខាត។
ការដាក់ចេញវិធានការតបតវិញរបស់ប្រទេសចិនក៏ជាទង្វើត្រឹមត្រូវដើម្បីគាំពារភាពប្រជាធិបតេយ្យនៃទំនាក់ទំនងអន្តរជាតិផងដែរ ។ ច្បាប់សន្តិសុខជាតិនៅហុងកុងបានបង្កើតនិងធ្វើឱ្យមានសុក្រឹតភាពនូវប្រព័ន្ធច្បាប់និងយន្តការអនុវត្តសម្រាប់គាំពារសន្តិសុខជាតិនៅតំបន់រដ្ឋបាលពិសេសហុងកុងដែលជាជំហានគន្លឹះសម្រាប់ជំរុញឱយហុងកុងទប់ស្កាត់អំពើហិង្សានិងអភិវឌ្ឍប្រកបដោយស្ថិរភាព។ ការតបតវិញស្មើគ្នារបស់ភាគីចិនមិនគ្រាន់តែជាការគាំពារអធិបតេយ្យភាពនិងសេចក្តីថ្លៃថ្នូររបស់ប្រទេសជាតិប៉ុណ្ណោះ ថែមទាំងក៏បានបង្ហាញពីការប្រកាន់ខ្ជាប់ក្រមមូលដ្ឋាននៃទំនាក់ទំនងអន្តរជាតិរបស់ភាគីចិនទៀតផង៕