តាមទិន្នន័យស្ថិតិថ្មីបំផុតអំពីជំងឺកូវីដ១៩ដែលប្រកាសដោយសកលវិទ្យាល័យ Johns Hopkins របស់អាមេរិកឱ្យដឹងថា គិតមកទល់ថ្ងៃទី៩ខែសីហា ករណីឆ្លងជំងឺកូវីដ១៩នៅសហរដ្ឋអាមេរិកមានចំនួនសរុបលើសពី៥លាន៥ម៉ឺននាក់ ហើយចំនួនអ្នកស្លាប់សរុបគឺ១សែន៦ម៉ឺន២ពាន់នាក់ ។
ទីភ្នាក់ងារព័ត៌មាន CNN ផ្សាយដំណឺងឱ្យដឹងថា ករណីឆ្លងជំងឺកូវីដ១៩នៅសហរដ្ឋអាមេរិកបានឡើងដល់១ភាគ៤នៃចំនួនករណីឆ្លងជំងឺកូវីដ១៩សរុបនៅទូទាំងពិភពលោក ហើយសហរដ្ឋអាមេរិកក៏ជាប្រទេសដែលមានអ្នកស្លាប់ដោយសារជំងឺកូវីដ១៩ច្រើនបំផុតលើពិភពលោកដែរ ។
តាមទិន្នន័យដែលទីភ្នាក់ងារព័ត៌មាន Reuters បានប្រកាសឱ្យដឹងថា គិតជាមធ្យម ក្នុងចំណោមរាល់ជនជាតិអាមេរិក៦៦នាក់ ក៏មានម្នាក់ឆ្លងជំងឺកូវីដ១៩ដែរ ។ បច្ចុប្បន្ននេះ ករណីស្លាប់ដោយសារជំងឺកូវីដ១៩នៅសហរដ្ឋអាមេរិកសរុបបានលើសពី១សែន៦ម៉ឺន២ពាន់នាក់ ប្រហែលត្រូវជា២២,៤ភាគរយនៃករណីស្លាប់សរុបលើទូទាំងពិភពលោក ។
បណ្ឌិត Peter Hotez សាស្ត្រាចារ្យនិងជាប្រធានផ្នែកវេជ្ជសាស្ត្រត្រូពិកនៃវិទ្យាស្ថានវេជ្ជសាស្ត្រ Baylor របស់សហរដ្ឋអាមេរិកបានថ្លែងថា ពិតមែនតែសភាពការណ៍ជំងឺកូវីដ១៩នៅសហរដ្ឋអាមេរិកមានភាពធ្ងន់ធ្ងរអ៊ីចឹង ប៉ុន្តែរដ្ឋាភិបាលអាមេរិកបានធ្វើការងារមិនគ្រប់គ្រាន់ទេក្នុងវិស័យទប់ស្កាត់ការរាតត្បាតនៃវីរុសជំងឺកូវីដ១៩ដែរ ។ លោកថ្លែងថា រដ្ឋាភិបាលត្រូវគ្រប់គ្រងដោយគ្រប់ជ្រុងជ្រោយក្នុងវិស័យទប់ស្កាត់ការរាតត្បាតនៃវីរុសជំងឺកូវីដ១៩ ត្រូវអនុវត្តតាមផែនការដោយឈរលើមុំរដ្ឋាភិបាលសហព័ន្ធ មានតែធ្វើអ៊ីចឹង ដល់ខែតុលា សភាពការណ៍នៃជំងឺកូវីដ១៩នៅរដ្ឋនានាទើបអាចមានលទ្ធភាពបន្ធូរបន្ថយ ។
តាមការព្យាករណ៍ជាគំរូដែលវិទ្យាស្ថានសិក្សាស្រាវជ្រាវសុខភាពនិងការវាយតម្លៃនៃសកលវិទ្យាល័យវ៉ាស៊ីនតោនបានបង្ហាញថា ដល់ថ្ងៃទី១ខែធ្នូ ចំនួនអ្នកស្លាប់ដោយសារជំងឺកូវីដ១៩នៅសហរដ្ឋអាមេរិកប្រហែលនឹងឡើងដល់៣សែននាក់ ។
លោក Bill Gates ក៏បានថ្លែងនៅពេលផ្តល់បទសម្ភាសន៍ថា អ្វីដែលគួរឱ្យភ្ញាក់ផ្អើលគឺ រដ្ឋាភិបាលអាមេរិកមិនបានដោះស្រាយបញ្ហាធ្វើតេស្តវីរុសជំងឺកូវីដ១៩ជាប់រហូតមក ហើយការតេស្តនាពេលឥឡូវនេះមានភាពយឺតយ៉ាវណាស់ដែរ ។ លោកថ្លែងថា គ្មានប្រទេសណាមួយទេមានភាពច្របូកច្របល់ដូចសហរដ្ឋអាមេរិក ។ សហរដ្ឋអាមេរិកមានកំហុសគ្រប់បែបយ៉ាងក្នុងដំណាក់កាលដំបូងនៃការរីករាលដាលជំងឺកូវីដ១៩ បូករួមទាំងកត្តាខាងនយោបាយនោះគឺមានន័យថា សហរដ្ឋអាមេរិកមិនដែលដាក់បញ្ចូលការធ្វើតេស្តក្នុងរបៀបវារៈទាល់តែសោះ ។