នាយប់ថ្ងៃទី ២៣ ខែកញ្ញា លោកស៊ីជីនភីង ប្រធានរដ្ឋចិនបានជួបសន្ទនាតាមប្រព័ន្ធវីដេអូជាមួយលោកគូធើរេស អគ្គលេខាធិការអង្គការសហប្រជាជាតិនៅក្រុងប៉េកាំង ។
លោកស៊ីជីនភីងបានសង្កត់ធ្ងន់ថា តាំងពីបង្កើតអង្គការសហប្រជាជាតិអស់រយៈពេល ៧៥ ឆ្នាំមក អង្គការនេះបានរួមចំណែកយ៉ាងសំខាន់ចំពោះសន្តិភាពនិងការអភិវឌ្ឍនៃពិភពលោក ។ ក្នុងនាមជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ ប្រទេសចិននឹងគាំទ្រយ៉ាងម៉ឺងម៉ាត់ចំពោះអង្គការសហប្រជាជាតិក្នុងការដើរតួនាទីជាស្នូលក្នុងកិច្ចការអន្តរជាតិ និងគាំទ្រយ៉ាងម៉ឺងម៉ាត់នូវការងាររបស់អង្គការសហប្រជាជាតិ ។
លោកស៊ីជីនភីងបានលើកឡើងថា បច្ចុប្បន្ន ជំងឺកូវីដ១៩នៅតែកំពុងរីករាលដាលនៅទូទាំងពិភពលោកដដែល ប្រទេសចិនគាំទ្រប្រព័ន្ធអង្គការសហប្រជាជាតិ ជាពិសេសអង្គការសុខភាពពិភពលោកដើរតួនាទីដឹកនាំដ៏សំខាន់ បង្កើនកិច្ចសហប្រតិបត្តិការអន្តរជាតិនិងរួមគ្នាបង្ការនិងគ្រប់គ្រងជំងឺឆ្លង រួមគ្នាបង្កើតសហគមន៍រួមវាសនាសុខាភិបាលមនុស្សជាតិ ។
លោកស៊ីជីនភីងបានថ្លែងថា ជំងឺឆ្លងបានធ្វើឱ្យកើតជាបញ្ហាថ្មីជាច្រើន ប៉ុន្តែនិយាយសរុបទៅ វាគឺជាបញ្ហាសន្តិភាពនិងការអភិវឌ្ឍ ។ ដូចនេះគួរខិតខំកាត់បន្ថយផលប៉ះពាល់នៃជំងឺឆ្លងចំពោះសេដ្ឋកិច្ចនិងជីវភាពប្រជាជន សម្របសម្រួលធនធាននិងកម្លាំងពិភពលោក ជំរុញបណ្តាភាគីឱ្យចាត់វិធានការទាន់ពេលនិងខ្លាំងក្លាខាងការកាត់បន្ថយបំណុលនិងបង្កើនជំនួយឧបត្ថម្ភជាដើម ជួយដល់ប្រទេសកំពុងអភិវឌ្ឍន៍ ដើម្បីបង្រួញគម្លាតរវាងអ្នកមាននិងអ្នកក្រ ។
លោកស៊ីជីនភីងសង្កត់ធ្ងន់ទៀតថា ប្រទេសចិនបង្កើនការកសាងអេកូបរិស្ថានរបស់ខ្លួនផង និងរ៉ាប់រងទំនួលខុសត្រូវអន្តរជាតិក្នុងការតទល់នឹងបម្រែបម្រួលអាកាសធាតុដោយម្ចាស់ការផងដែរ ខិតខំថែរក្សាភពផែនដីដែលជាស្រុកកំណើតរួមរបស់មនុស្សជាតិ រួមជាមួយបណ្តាប្រទេសនានាកសាងផ្លូវសូត្របៃតងយ៉ាងសកម្ម ។
ជាការឆ្លើយតប លោកគូធើរេសថ្លែងថា បច្ចុប្បន្ន ពិភពលោកកំពុងប្រឈមមុខនឹងវិបត្តិនិងបញ្ហាប្រឈមជាច្រើន ដូចជាការរាលដាលនៃជំងឺឆ្លង បម្រែបម្រួលអាកាសធាតុជាដើម កាន់តែត្រូវការពហុភាគីនិយមនិងកិច្ចសហប្រតិបត្តិការអន្តរជាតិ កាន់តែត្រូវការអង្គការសហប្រជាជាតិដ៏ខ្លាំងក្លាមួយ ។ លោកបានថ្លែងអំណរគុណប្រទេសចិនដែលបានផ្តល់ការគាំទ្រយ៉ាងម៉ឺងម៉ាត់ចំពោះពហុភាគីនិយមនិងអង្គការសហប្រជាជាតិជាប់រហូតមក ។ លោកជឿជាក់ថាប្រទេសចិនមានសមត្ថភាពសម្រេចការអភិវឌ្ឍរបស់ខ្លួន ព្រមទាំងរួមចំណែកកាន់តែធំចំពោះពិភពលោក ៕