កាលពីថ្ងៃទី ២១ ខែមករា លោកលី ខឺឈាង សមាជិកអចិន្រ្តៃយ៍នៃការិយាល័យនយោបាយមជ្ឈិមបក្សកុម្មុយនិស្តចិននិងជានាយករដ្ឋមន្រ្តីចិនបានធ្វើជាអធិបតីនៃកិច្ចប្រជុំសន្ទនា ដើម្បីស្តាប់មតិយោបល់និងសំណើរបស់អ្នកជំនាញនិងសហគ្រិនស្តីអំពី«របាយការណ៍ការងាររដ្ឋាភិបាល» និង«កម្មវិធីនៃផែនការ “៥ ឆ្នាំទី ១៤ ”និងគោលដៅចក្ខុវិស័យឆ្នាំ ២០៣៥» ។
ថ្លែងក្នុងកិច្ចប្រជុំ លោកលី ខឺឈាងបានលើកឡើងថា គួរតែរក្សាកម្លាំងនយោបាយផ្នែកហិរញ្ញវត្ថុនិងរូបិយវត្ថុដ៏ចាំបាច់និងសមហេតុផល ជំរុញឱ្យសេដ្ឋកិច្ចវិវឌ្ឍទៅមុខប្រកបដោយភាពនឹងនរនិងមុតមាំជាបន្តបន្ទាប់ ។ គួរតែជំរុញការកែទម្រង់និងការបើកចំហជាបន្តបន្ទាប់ បំផុសកម្លាំងរស់រវើកនៃទីផ្សារនិងកម្លាំងច្នៃប្រឌិតថ្មីនៃសង្គមឱ្យកាន់តែខ្លាំង បន្តធ្វើឱ្យស៊ីជម្រៅនូវកំណែទម្រង់ស្តីពីការធ្វើកិច្ចសម្រួលខាងរដ្ឋបាល ធ្វើការត្រួតពិនិត្យដោយយុត្តិធម៌ និងលើកកម្ពស់សេវាកម្ម កែលម្អបរិយាកាសប្រកបអាជីវកម្ម ធានាការប្រកួតប្រជែងដោយយុត្តិធម៌ ។ តួអង្គទីផ្សារគួរតែដើរតួនាទីទ្រទ្រង់ធំបំផុតក្នុងការផ្តល់ឱកាសការងារ ធ្វើកំណែទម្រង់និងជំរុញឱ្យមានសុក្រិតភាពនូវទីផ្សារពលកម្ម ទីផ្សារធនធានមនុស្ស និងទីផ្សារឈ្នួលប្រកបដោយភាពរស់រវើក ដើម្បីបង្កើតឱកាសការងារកាន់តែច្រើនដល់ប្រជាជន។ គួរតែធ្វើការច្នៃប្រឌិតថ្មីនូវទស្សនៈ ប្រព័ន្ធនិងយន្តការ ជំរុញការច្នៃប្រឌិតថ្មីនៃបច្ចេកវិទ្យា ក៏ដូចជាលើកកម្ពស់គុណភាព ប្រសិទ្ធភាពនិងសមត្ថភាពប្រកួតប្រជែងនៃកសិកម្មផងដែរ ៕