ខណៈពេលខួបទី ១០០នៃការបង្កើតបក្សកុម្មុយនិស្តចិនជិតចូលមកដល់ ថ្ងៃទី២៥ ខែមិថុនា ប្រទេសចិនបានចេញផ្សាយសៀវភៅសដែលមានចំណងជើងថា«របបគណបក្សបែបថ្មីរបស់ប្រទេសចិន» ដោយបានធ្វើបទបង្ហាញដោយគ្រប់ជ្រុងជ្រោយទៅកាន់មជ្ឈដ្ឋានខាងក្រៅអំពីរបបគណបក្សនយោបាយនិងប្រព័ន្ធនយោបាយរបស់ប្រទេសចិន ។
លោក Martin Jacques អ្នកសិក្សាស្រាវជ្រាវជាន់ខ្ពស់នៃសកលវិទ្យាល័យ Cambridge នៃប្រទេសអង់គ្លេសធ្លាប់ថ្លែងក្នុងអត្ថបទមួយថា “ក្នុងរយៈពេលជាយូរមកហើយ ទស្សនៈរបស់ប្រទេសលោកខាងលិចគឺរបបពហុបក្សជាឧត្តមភាពធំមួយរបស់ប្រជាធិបតេយ្យ ដែលអាចបង្ការកុំឱ្យគណបក្សមានភាពគាំងដំណើរនិងបញ្ឈប់ដំណើរការទៅមុខ ។ ប៉ុន្តែតាមពិតទៅ បក្សកុម្មុយនិស្តចិនស្វែងរកបាននូវវិធីសាស្ត្រដែលអាចធ្វើឱ្យខ្លួនរក្សាកម្លាំងរស់រវើកនិងភាពក្មេងវ័យ រីឯគណបក្សនៃប្រទេសលោកខាងលិចវិញ បែរជាមានគម្លាតកាន់តែឆ្ងាយទៅៗជាមួយប្រជាជនដែលខ្លួនបានតំណាងឱ្យនោះ។
របបគណបក្សនយោបាយបែបថ្មីរបស់ប្រទេសចិន តើវាថ្មីនៅត្រង់ណា ? ជាបឋមគឺនៅត្រង់ទំនាក់ទំនងពិសេសរវាងគណបក្សនយោបាយខុសៗគ្នា ។
បើមើលពីតួនាទីអាចឃើញថា ក្នុងរបបគណបក្សនយោបាយបែបថ្មីរបស់ប្រទេសចិន បូករួមទាំងបក្សកុម្មុយនិស្តចិន គណបក្សប្រជាធិបតេយ្យចំនួន៨ និងឥស្សរជនមិនចូលរួមបក្សនយោបាយ ។ ក្នុងនោះ បក្សកុម្មុយនិស្តចិនដើរតួនាទីដឹកនាំនិងកាន់អំណាច គណបក្សប្រជាធិបតេយ្យនានាចូលរួមកិច្ចការនយោបាយនៃប្រទេសចិនយ៉ាងទូលំទូលាយ ។ បក្សកុម្មុយនិស្តចិននិងគណបក្សប្រជាធិបតេយ្យនានាបានបង្កើតជាទំនាក់ទំនងភាពជាដៃគូសហប្រតិបតិ្តការយ៉ាងជិតស្និទិ្ធ ។
ទីពីរ របបគណបក្សនយោបាយបែបថ្មីរបស់ប្រទេសចិន វាថ្មីនៅត្រង់ដំណើរធ្វើសេចក្តីសម្រេចចិត្តនិងវិធីអភិបាលកិច្ចដែលប្រកបដោយលក្ខណៈពិសេស ។
ក្នុងនាមជាប្រទេសធំដែលមានចំនួនប្រជាជន១ពាន់៤រយលាននាក់ ប្រទេសចិនមានវណ្ណៈនិងក្រុមមនុស្សក្នុងសង្គមខុសៗគ្នា ។ បក្សកុម្មុយនិស្តចិន គណបក្សប្រជាធិបតេយ្យចំនួន៨ និងឥស្សរជនមិនចូលរួមបក្សនយោបាយមានតំណាងមកពីមុខរបបគ្រប់បែបយ៉ាង ប្រការនេះបានធានាយ៉ាងជាក់លាក់ថា របបគណបក្សនយោបាយបែបថ្មីរបស់ប្រទេសចិនមិនត្រឹមតែគោរពតាមក្តីបំណងរបស់ប្រជាជនភាគច្រើនប៉ុណ្ណោះទេ ថែមទាំងក៏បានគិតពិចារណាដល់តម្រូវការសមហេតុផលរបស់មនុស្សភាគតិចផងដែរ ។
ក្រៅពីនេះ របបគណបក្សនយោបាយបែបថ្មីរបស់ប្រទេសចិនបានប្រមូលផ្តុំមតិយោបល់និងសេចក្តីស្នើរបស់បណ្តាភាគីនានាតាមរយៈការរៀបចំចាត់ចែងជាប្រព័ន្ធ ដូចជាការពិគ្រោះពិភាក្សារវាងគណបក្ស ការចូលរួមប្រឹក្សាកិច្ចការនយោបាយ និងការត្រួតពិនិត្យដោយប្រជាធិបតេយ្យជាដើម ក្នុងន័យជំរុញការធ្វើសេចក្តីសម្រេចចិត្តប្រកបដោយវិទ្យាសាស្ត្រនិងប្រជាធិបតេយ្យ ចៀសវាងដោយមានប្រសិទ្ធិភាពនូវគុណវិបតិ្តដូចជាយកចិត្តទុកដាក់តែផលប្រយោជន៍គណបក្ស ផលប្រយោជន៍វណ្ណៈនិងផលប្រយោជន៍ក្រុម ដើម្បីធានាជាក់លាក់នូវនិរន្តរភាពនិងស្ថិរភាពនៃការអនុវត្តគោលនយោបាយប្រទេសជាតិ ។
របបគណបក្សនយោបាយបែបថ្មីរបស់ប្រទេសចិនបានបង្ហាញពីឧត្តមភាពពិសេសនិងកម្លាំងរស់រវើកដ៏ខ្លាំងក្លាក្នុងកិច្ចការនយោបាយនិងសង្គមរបស់ប្រទេសចិន បានជំរុញយ៉ាងខ្លាំងក្លានូវទំនើបភាពវូបនីយកម្មនៃប្រព័ន្ធអភិបាលកិច្ចជាតិនិងសមត្ថភាពអភិបាលកិច្ច ហើយក៏បានរួមចំណែក “គម្រោងចិន”ដល់ការអភិវឌ្ឍនយោបាយគណបក្សនៅលើពិភពលោកនាសម័យបច្ចុប្បន្នផងដែរ ៕
