នៅថ្ងៃទី ១២ ខែសីហា ការិយាល័យព័ត៌មាននៃក្រុមប្រឹក្សាកិច្ចការរដ្ឋចិនបានចេញផ្សាយសៀវភៅសដែលមានចំណងជើងថា《សម្រេចការកសាងសង្គមដែលប្រជាជនមានជីវភាពធនធានបង្គួរដោយសុខដុមរមនាគ្រប់ជ្រុងជ្រោយ៖ភាពត្រចះត្រចង់នៃការអភិវឌ្ឍកិច្ចការសិទ្ធិមនុស្សរបស់ប្រទេសចិន》។
សៀវភៅសបានបង្ហាញឱ្យដឹងថា នៅដំណាក់កាលដំបូងនៃការរីករាលដាលនៃជំងឺ COVID-19 ប្រទេសចិនបានខិតខំប្រឹងប្រែងក្នុងការជួយសង្គ្រោះអាយុជីវិតក្នុងទ្រង់ទ្រាយដែលមិនធ្លាប់មានពីមុននៅទូទាំងប្រទេសចិន ដោយប្រមូលផ្តុំវេជ្ជបណ្ឌិតល្អបំផុត ឧបករណ៍ទំនើបបំផុតនិងធនធានដែលត្រូវការបន្ទាន់បំផុតពីទូទាំងប្រទេស ដើម្បីទៅជួយសង្គ្រោះក្រុងវូហាន និងខេត្តហ៊ូប៉ី ។ ចាប់ពីថ្ងៃទី ២៤ ខែមករាដល់ថ្ងៃទី ៨ ខែមីនាឆ្នាំ ២០២០ ប្រទេសទាំងមូលបានប្រមូលផ្តុំក្រុមគ្រូពេទ្យជាតិសរុបចំនួន ៣៤៦ ក្រុមដែលមានបុគ្គលិកពេទ្យចំនួន ៤២៦០០ រូបនិងបុគ្គលិកសុខាភិបាលសាធារណៈជាង ៩០០ រូបបានទៅជួយសង្គ្រោះខេត្តហ៊ូប៉ី ។ ខេត្តហ៊ូប៉ីបានព្យាបាលអ្នកជំងឺជាង ៣០០០ នាក់ដែលមានអាយុលើសពី ៨០ ឆ្នាំនិងអាយុលើសពី ១០០ ឆ្នាំចំនួន ៧ នាក់ឱ្យសះស្បើយ ។ អ្នកជំងឺវ័យចំណាស់ដែលមានសភាពជំងឺធ្ងន់ធ្ងរជាច្រើននាក់ត្រូវបានជួយសង្គ្រោះពីទ្វារមរណៈដែលឆ្លុះបញ្ចាំងយ៉ាងពេញលេញពីការគោរពនិងការការពាររាល់អាយុជីវិត ។
សៀវភៅសបញ្ជាក់ថា ប្រទេសចិនខិតខំប្រឹងប្រែងក្នុងការព្យាបាលអ្នកជំងឺ មិនរំលងចោលរាល់អ្នកជំងឺណាម្នាក់ មិនបោះបង់ចោលអ្នកជំងឺណាម្នាក់និងដាក់ចេញគោលនយោបាយធានាថ្លៃព្យាបាលភ្លាមៗ ដើម្បីធានាឱ្យអ្នកជំងឺនិងស្ថាប័នវេជ្ជសាស្ត្រ មិនជួបបញ្ហាដោយសារថ្លៃព្យាបាលដែលបានលើកកម្ពស់អត្រាព្យាបាលជាសះស្បើយជាអតិបរមានិងកាត់បន្ថយអត្រាមរណភាព ។ ប្រទេសចិនប្រកាន់ខ្ជាប់នូវការរួមបញ្ចូលគ្នានៃការងារបង្ការនិងគ្រប់គ្រងជាប្រក្រតីកម្មនិងការឆ្លើយតបបន្ទាន់ក្នុងតំបន់ ហើយបន្តពង្រឹងសមិទ្ធផលនៃការងារបង្ការនិងគ្រប់គ្រងជំងឺ COVID-19 ខិតខំប្រឹងប្រែងក្នុងការជំរុញការចាក់វ៉ាក់សាំងជំងឺ COVID-19 យ៉ាងសកម្មនិងពន្លឿនកិច្ចកសាងរបាំងភាពស៊ាំនឹងរោគ ៕
