ថ្ងៃទី ១០ ខែកញ្ញា លោកស៊ី ជីនភីងប្រធានរដ្ឋចិនបានផ្ញើលិខិតអបអរសាទរចំពោះការបើកពិព័រណ៍ពាណិជ្ជកម្មចិន-អាស៊ាននិងកិច្ចប្រជុំកំពូលធុរកិច្ចនិងវិនិយោគចិន-អាស៊ានលើកទី ១៨ ។
លោកស៊ីជីនភីងបានលើកឡើងថា ចាប់ពីប្រទេសចិននិងអាស៊ានបានបង្កើតទំនាក់ទំនងសន្ទនាអស់រយៈពេល ៣០ ឆ្នាំមក ភាគីទាំងពីរមានកិច្ចសហប្រតិបត្តិការគ្រប់ជ្រុងជ្រោយនិងកាន់តែស៊ីជម្រៅជាបន្តបន្ទាប់ បានក្លាយទៅជាដៃគូពាណិជ្ជកម្មធំបំផុតទៅវិញទៅមក ដែលជាកិច្ចសហប្រតិបត្តិការប្រកបដោយកម្លាំងរស់រវើកបំផុតក្នុងតំបន់អាស៊ីប៉ាស៊ីហ្វិក ។ ក្រោយពីផ្ទុះការរីករាលដាលនៃជំងឺកូវីដ ១៩ មក ភាគីទាំងពីរបានពួតដៃគ្នាប្រយុទ្ធប្រឆាំងនឹងជំងឺឆ្លង រួមគ្នាពុះពារគ្រប់ឧបសគ្គក្នុងគ្រាអាសន្ន ដែលបានអនុវត្តជាក់ស្តែងនូវស្មារតីនៃសហគមន៍រួមវាសនាដែលជួយគ្នាទៅវិញទៅមក និងរួមសុខរួមទុក្ខ ។លោកស៊ី ជីនភីងបានគូសបញ្ជាក់ទៀតថា ប្រឈមនឹងអនាគត ប្រទេសចិនមានឆន្ទៈរួមជាមួយអាស៊ានដើម្បីបង្កើនទំនុកចិត្តជាយុទ្ធសាស្រ្តទៅវិញទៅមក ធ្វើឱ្យស៊ីជម្រៅនូវកិច្ចសហប្រតិបត្តិការលើគ្រប់វិស័យដូចជាការប្រយុទ្ធប្រឆាំងនឹងជំងឺឆ្លង សេដ្ឋកិច្ចនិងពាណិជ្ជកម្មជាដើម ជំរុញឱ្យកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់មានសុពលភាពនិងទទួលបានការអនុវត្តក្នុងពេលឆាប់ៗ រួមគ្នាកសាង “ខ្សែក្រវាត់និងផ្លូវ”ប្រកបដោយគុណភាពខ្ពស់ បង្កើតទំនាក់ទំនងភាពជាដៃគូយុទ្ធសាស្រ្តដែលមានកម្រិតកាន់តែខ្ពស់ ក៏ដូចជារួមគ្នាគាំពារនិន្នាការអភិវឌ្ឍន៍ដ៏ល្អប្រសើរដែលប្រកបដោយភាពរុងរឿងថ្កុំថ្កើងក្នុងតំបន់ផងដែរ ៕
