ក្នុងអំឡុងពេលបំពេញទស្សនកិច្ចនៅប្រទេសចិន លោក Kim Jong Un បានចូលជួបសម្តែងការគួរសមនិងជួបពិភាក្សាការងារជាមួយលោក ស៊ីជីនភីងនៅវិមានសភាប្រជាជន ។ លោក ស៊ីជីនភីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិននិងលោកជំទាវ ផឹងលីយាន់ ជាភរិយាបានរៀបចំពិធីជប់លៀងដើម្បីស្វាគមន៍ដំណើររបស់លោក Kim Jong Un ប្រធានបក្សពលករកូរ៉េខាងជើងនិងលោកជំទាវ Ri Sol Ju ជាភរិយាព្រមទាំងរួមគ្នាទស្សនាការសម្តែងសិល្បៈផងដែរ ។
លោក Li Keqiangសមាជិកគណៈអចិន្ត្រៃយ៍នៃការិយាល័យនយោបាយមជ្ឈិមបក្សកុម្មុយនិស្តចិននិងជានាយករដ្ឋមន្ត្រីចិន លោក Wang Huning សមាជិកគណៈអចិន្ត្រៃយ៍នៃការិយាល័យនយោបាយមជ្ឈិមបក្សកុម្មុយនិស្តចិននិងជាលេខាធិការនៃលេខាធិការដ្ឋានមជ្ឈិមចិន ព្រមនិងលោក Wang Qishan អនុប្រធានរដ្ឋចិនបានអញ្ជើញចូលរួមសកម្មភាពពាក់ព័ន្ធដោយឡែកពីគ្នា ។
ក្នុងកិច្ចជំនួប លោក ស៊ីជីនភីង បានតាងនាមឲ្យមជ្ឈិមបក្សកុម្មុយនិស្តចិនសំដែងការស្វាគមន៍យ៉ាងកក់ក្តៅចំពោះដំណើរទស្សនកិច្ចនៅប្រទេសចិនជាលើកដំបូងរបស់លោក Kim Jong Un ។ លោកស៊ីជីនភីងថ្លែងថា លោកបានផ្ញើសារជូនពរចំពោះខ្ញុំដែលត្រូវបានជ្រើសតាំងជាអគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិននិងជាប្រធានគណៈកម្មាធិការយោធានៃមជ្ឈិមបក្សកុម្មុយនិស្តចិនជាថ្មីទៀតបន្ទាប់ពីសមាជបក្សកុម្មុយនិស្តចិនលើកទី១៩ ហើយប៉ុន្មានថ្ងៃមុន លោកក៏បានផ្ញើសារភ្លាមៗដើម្បីជូនពរចំពោះខ្ញុំដែលត្រូវបានជ្រើសតាំងជាប្រធានរដ្ឋចិននិងជាប្រធានគណៈកម្មាធិការយោធាមជ្ឈិមចិនជាថ្មីទៀត ខ្ញុំសូមថ្លែងអំណរគុណចំពោះរឿងនេះ ។ ដំណើរទស្សនកិច្ចរបស់លោកនៅប្រទេសចិនលើកនេះ គឺធ្វើឡើងក្រោមកាលៈទេសៈពិសេសនិងមានសារសំខាន់ណាស់ ដែលបង្ហាញយ៉ាងពេញលេញនូវការយកចិត្តទុកដាក់ខ្ពស់របស់លោកប្រធានបក្សពលករកូរ៉េខាងជើងនិងមជ្ឈិមបក្សពលករកូរ៉េខាងជើងចំពោះទំនាក់ទំនងរវាងបក្សនិងប្រទេសទាំងពីរចិននិងកូរ៉េខាងជើង ខ្ញុំសូមវាយតម្លៃខ្ពស់ចំពោះរឿងនេះ ។
លោក Kim Jong Un ថ្លែងថា ថ្មីៗកន្លងទៅនេះ ប្រទេសចិនមានព្រឹត្តិការណ៍ធំៗនិងរឿងគួរឲ្យសប្បាយរីករាយជាច្រើន កាលពីឆ្នាំទៅ បក្សកុម្មុយនិស្តចិនបានរៀបចំសមាជបក្សកុម្មុយនិស្តចិនលើកទី ១៩ ដោយជោគជ័យ កាលពីពេលថ្មីៗកន្លងទៅក៏បានរៀបចំមហាសន្និបាតនៃសភាទាំងពីរដោយជោគជ័យទៀត លោកស៊ីជីនភីងទទួលបានការគោរពស្រឡាញ់ពីសំណាក់ប្រជាជនបក្សនិងរដ្ឋទាំងមូល ក្លាយជាប្រមុខស្នូលនៃថ្នាក់ដឹកនាំ ហើយក៏បានត្រូវជ្រើសតាំងជាប្រធានរដ្ឋ ប្រធានគណៈកម្មាធិការយោធាមជ្ឈិមចិនជាថ្មីទៀត អនុលោមតាមប្រពៃណីដ៏មានមេត្រីភាពរវាងកូរ៉េខាងជើងនិងចិន ខ្ញុំគួរតែមកប្រទេសចិនដើម្បីសំដែងការជូនពរចំពោះលោកដោយផ្ទាល់ ។ បច្ចុប្បន្ន ស្ថានការណ៍ឧបទ្វីបកូរ៉េបានវិវឌ្ឍរីកចម្រើនយ៉ាងលឿន មានការប្រែប្រួលសំខាន់ៗជាច្រើន ហេតុនេះមិនថានិយាយពីមនោសញ្ចេតនាឬសីលធម៌នោះទេ ក៏ខ្ញុំគួរតែមកផ្តល់ដំណឹងផ្ទាល់និងទាន់ពេលវេលាអំពីសភាពការណ៍ពាក់ព័ន្ធចំពោះលោកអគ្គលេខាធិការបក្សស៊ីជីនភីងផងដែរ ។
លោកស៊ីជីនភីងថ្លែងថា មិត្តភាពប្រពៃណីរវាងចិននិងកូរ៉េខាងជើងគឺពូនជ្រំឡើងនិងបណ្តុះបណ្តាលដោយយកចិត្តទុកដាក់ពីសំណាក់ថ្នាក់ដឹកនាំជំនាន់មុនៗរវាងបក្សនិងរដ្ឋទាំងពីរ ជាទ្រព្យសម្បត្តិរួមដ៏មានតម្លៃរបស់ភាគីទាំងពីរ ។ រំលឹកឡើងវិញពីអតីតកាល ថ្នាក់ដឹកនាំជំនាន់មុនៗរបស់យើងមានឧត្តមគតិនិងជំនឿចិត្តដូចគ្នាព្រមនិងមិត្តភាពបដិវត្តន៍ដ៏ជ្រាលជ្រៅ ជឿទុកចិត្តគ្នា គាំទ្រគ្នាទៅវិញទៅមក បានចារជាទំព័រដ៏ល្អបវរក្នុងប្រវត្តិសាស្ត្រនៃទំនាក់ទំនងអន្តរជាតិ ។ ជានិច្ចកាល ថ្នាក់ដឹកនាំប៉ុន្មានជំនាន់នៃប្រទេសចិននិងកូរ៉េខាងជើងតែងតែបានរក្សាការប្រាស្រ័យទាក់ទងគ្នាយ៉ាងជិតស្និទ្ធដូចជាញាតិសន្តាន ។ ក្នុងការអនុវត្តជាក់ស្តែងអស់រយៈពេលជាយូរមក បក្សនិងរដ្ឋនៃប្រទេសទាំងពីរចិននិងកូរ៉េខាងជើងបានគាំទ្រគ្នានិងសហការគ្នាទៅវិញទៅមក បានរួមចំណែកសំខាន់ក្នុងការអភិវឌ្ឍបុព្វហេតុសង្គមនិយម ។ ខ្ញុំនិងលោកប្រធានបក្ស Kim Jong Un សុទ្ធតែជាអ្នកឆ្លងកាត់ផ្ទាល់និងជាសាក្ខីកម្មនៃការអភិវឌ្ឍទំនាក់ទំនងរវាងចិននិងកូរ៉េខាងជើង ។ ភាគីយើងទាំងពីរធ្លាប់បង្ហាញជាច្រើនលើកហើយថា គួរតែបន្តឥតឈប់ឈរនូវមិត្តភាពប្រពៃណីរវាងចិននិងកូរ៉េខាងជើងនិងពង្រឹងនិងពង្រីកឲ្យកាន់តែល្អប្រសើរ ។ នេះជាជម្រើសយុទ្ធសាស្ត្ររបស់ភាគីទាំងពីរដោយឈរលើប្រវត្តិសាស្ត្រ ការពិតជាក់ស្តែង និម្មាបនកម្មតំបន់និងអន្តរជាតិព្រមនិងស្ថានការណ៍ទូទៅនៃទំនាក់ទំនងរវាងចិននិងកូរ៉េខាងជើង ហើយក៏ជាជម្រើសដ៏ត្រឹមត្រូវតែមួយគត់ផងដែរ មិនគួរឬមិនអាចប្រែប្រួលដោយសារតែរឿងអ្វីមួយឬកាលៈទេសៈអ្វីមួយនោះឡើយ ។
លោកស៊ីជីនភីងបានគូសបញ្ជាក់ទៀតថា បក្សនិងរដ្ឋាភិបាលចិនយកចិត្តទុកដាក់ខ្ពស់ចំពោះទំនាក់ទំនងសហប្រតិបត្តិការមេត្រីភាពរវាងចិននិងកូរ៉េខាងជើងការគាំពារឲ្យបានល្អ ពង្រឹងឲ្យបានល្អ និងអភិវឌ្ឍឲ្យបានល្អនូវទំនាក់ទំនងរវាងចិននិងកូរ៉េខាងជើងគឺជាគោលការណ៍ ណែនាំដ៏មុតមាំមិនងាករេរបស់បក្សនិងរដ្ឋាភិបាលចិន។យើងខ្ញុំរីករាយរួមសហការជាមួយមិត្តកូរ៉េខាងជើង មិនបំភ្លេចក្តីបំណងដើម ពួតដៃឈានទៅមុខជាមួយគ្នាដើម្បីរួមចំណែកថ្មីសម្រាប់ការជំរុញទំនាក់ទំនងរវាងចិននិងកូរ៉េខាងជើងឲ្យវិវឌ្ឍរីកចម្រើនដោយរឹងមាំក្នុងរយៈពេលយូរអង្វែង ក្នុងន័យផ្តល់សុភមង្គលជូនដល់ប្រទេសនិងប្រជាជននៃ ប្រទេសទាំងពីរ ក៏ដូចជារួមចំណែកថ្មីសម្រាប់សន្តិភាពនិងស្ថិរភាពក្នុងតំបន់ផងដែរ។១គឺបន្តដើរតួនាទីណែនាំនៃការប្រាស្រ័យទាក់ទងជាន់ខ្ពស់។ជានិច្ចកាលការប្រាស្រ័យទាក់ទងជាន់ខ្ពស់តែងតែបានដើរតួនាទីណែនាំនិងជំរុញដ៏សំខាន់បំផុតក្នុងការអភិវឌ្ឍទំនាក់ទំនងរវាងចិននិងកូរ៉េខាងជើង។ ក្រោមស្ថានការណ៍ថ្មី ខ្ញុំរីករាយរក្សាការប្រាស្រ័យទាក់ទងជាញឹកញាប់ជាមួយលោកប្រធានបក្សតាមរូបភាពបំពេញទស្សនកិច្ចទៅវិញទៅមក ចាត់បញ្ជូនបេសកជនទៅវិញទៅមក និងផ្ញើសារលិខិតទៅវិញទៅមកជាដើម។ ទី២ប្រើប្រាស់ឲ្យបានពេញលេញនូវមធ្យោបាយល្អជាប្រពៃណីសម្រាប់ការផ្លាស់ប្តូរមតិយោបល់ជាយុទ្ធសាស្រ្ត ពោលគឺការផ្លាស់ប្តូរមតិយោបល់អំពីបញ្ហាធំនិងសំខាន់ជាញឹកញាប់ វាគឺជាប្រពៃណីដ៏មានមោទនភាពនៃបក្សទាំងពីរចិននិងកូរ៉េខាងជើង។ គប្បីរដើរតួនាទីសំខាន់នៃការប្រាស្រ័យទាក់ទងរវាងបក្សនិងបក្ស ជំរុញការផ្លាស់ប្តូរនិងកិច្ចសហប្រតិបត្តិការលើគ្រប់វិស័យរវាងប្រទេសទាំងពីរ បង្កើនការផ្លាស់ប្តូរនិងកសាងទំនុកចិត្តលើគ្នា។ ទី៣គឺជំរុញយ៉ាងសកម្មនូវការអភិវឌ្ឍដោយសន្តិភាព។ បច្ចុប្បន្ននេះ សង្គមនិយមដែលប្រកបដោយលក្ខណៈពិសេសនៃប្រទេសចិនបានឈានចូលយុគសម័យថ្មីហើយ ហើយកិច្ចកសាងសង្គមនិយមរបស់កូរ៉េខាងជើងក៏បានឈានចូលដំណាក់កាលថ្មីនៃ ប្រវត្តិសាស្ត្រផងដែរ។ យើងខ្ញុំរីករាយរួមសហការជាមួយភាគីកូរ៉េខាងជើង ធ្វើកិច្ចខិតខំប្រឹងប្រេងជាមួយគ្នា សម្របទៅនឹងចន្តនៃយុគសម័យ ជ្រោងទង់សន្តិភាព វឌ្ឍនភាព កិច្ចសហប្រតិបត្តិការនិងឈ្នះ-ឈ្នះ បង្កើនសេចក្តីសុខសុភមង្គលជូនដល់ប្រជាជននៃ ប្រទេសទាំងពីរឥតឈប់ឈរ ដើម្បីរួមវិភាគទានជាវិជ្ជមានសម្រាប់សន្តិភាព ស្ថិរភាពនិងវឌ្ឍនភាពក្នុងតំបន់។ ទី៤គឺពង្រឹងមូលដ្ឋាននៃក្តីបំណងប្រជាជនស្តីពីចំណងមិត្តភាពរវាងចិននិងកូរ៉េខាងជើង។ ភាគីទាំងពីរគួរតែឆ្លងតាមគ្រប់ទម្រង់ដើម្បីបង្កើនការប្រាស្រ័យទាក់ទងគ្នារវាងប្រជាជននៃប្រទេសទាំងពីរ ពង្រឹងមូលដ្ឋានខាងក្តីបំណងប្រជាជនស្តីពីទំនាក់ទំនងរវាងប្រទេសទាំងពីរ ជាពិសេសគឺបង្កើនការផ្លាស់ប្តូររវាងយុវជននៃប្រទេសទាំងពីរ ក្នុងន័យទទួលបន្តវេននិងពង្រីកប្រពៃណីដ៏ល្អប្រសើរនៃចំណងមិត្តភាពរវាងចិននិងកូរ៉េខាងជើង។
ជាការឆ្លើយតប លោក Kim Jong Unបានថ្លែងថា លោកអគ្គលេខាធិការបក្សស៊ីជីនភីងលើកពីមតិយោបល់ដ៏សំខាន់អំពីចំណងមិត្តភាពរវាងកូរ៉េខាងជើងនិងចិន ព្រមនិងការអភិវឌ្ឍទំនាក់ទំនងរវាងបក្សនិងប្រទេសទាំងពីររវាងកូរ៉េខាងជើងនិងចិន បានញ៉ាំងឲ្យខ្ញុំទទួលបានការលើកទឹកចិត្តនិងការបំផុសគំនិតយ៉ាងខ្លាំង។ ចំណងមិត្តភាពរវាងកូរ៉េខាងជើងនិងចិនដែលបង្កើតឡើងដោយផ្ទាល់ដៃរវាងថ្នាក់ដឹកនាំជំនាន់ចាស់នៃភាគីទាំងពីរគឺមិនអាចធ្វើឲ្យរង្គោះរង្គើបានទេ។ ការបន្តវេននិងអភិវឌ្ឍចំណងមិត្តភាពរវាងកូរ៉េខាងជើងនិងចិនក្រោមស្ថានការណ៍ ថ្មីគឺជាជម្រើសជាយុទ្ធសាស្រ្តរបស់ភាគីកូរ៉េខាងជើងដែលមិនកែប្រែឡើយទោះក្រោមស្ថានការណ៍បែបណាក៏ដោយ។ ដំណើរទស្សនកិច្ចរបស់ខ្ញុំលើកនេះគឺដើម្បីជួបជាមួយមិត្តចិនផ្ទាល់ក្នុងន័យបង្កើនការផ្លាស់ប្តូរជាយុទ្ធសាស្រ្ត និងបង្កើនចំណងមិត្តភាពប្រពៃនី។ រំពឹងថាតទៅថ្ងៃមុខនឹងមានពេលជួបពិភាក្សាជាមួយលោកអគ្គលេខាធិការឲ្យបានច្រើន ហើយរក្សាការប្រាស្រ័យដ៏ជិតស្និទ្ធតាមរូបភាពចាត់បញ្ជូនបេសកជនទៅវិញទៅមក និងផ្ញើសារលិខិតដែលសរសេរផ្ទាល់ដៃជាដើម ដើម្បីជមរុញឲ្យកិច្ចជំនួបជាន់ខ្ពស់ក្លាយជាការណែនាំឲ្យទំនាក់ទំនងរវាងបក្សនិងរដ្ឋាភិបាលទាំងពីរមានការអភិវឌ្ឍដល់កម្រិតថ្មីថែមទៀត៕
ភាគីទាំងពីរបានផ្តល់ជូនព័ត៌មានទៅវិញទៅមកស្តីពីសភាពការណ៍ក្នុងប្រទេសរៀងៗខ្លួន។ លោក ស៊ី ជីនភីង បានថ្លែងថា សមាជបក្សកុម្មុនិយស្តចិនលើកទី ១៩ បានកំណត់ពីផែនទីបង្ហាញផ្លូវដ៏មហិមាសម្រាប់ការកសាងប្រទេសសង្គមនិយមប្រកបដោយលក្ខណៈពិសេសរបស់ចិនដ៏ខ្លាំងក្លានិងទំនើបដោយគ្រប់ជ្រុងជ្រោយ ពោលគឺនឹងសម្រេចការកសាងសង្គមដែលប្រជាជនមានជីវភាពរស់នៅធូរធារបង្គួរដោយគ្រប់ជ្រុងជ្រោយនៅឆ្នាំ ២០២០ , ដល់ឆ្នាំ ២០៣៥ នឹងសម្រេចជាមូលដ្ឋាននូវការកសាងសង្គមនិយមទំនើប ហើយដល់ពាក់កណ្តាលសតវត្សរ៍ទី ២១ នេះ នឹងកសាងប្រទេសចិនឲ្យទៅជាប្រទេសសង្គមនិយមដ៏ខ្លាំងក្លានិងទំនើប ដែលប្រកបដោយភាពសម្បូរសប្បាយ ប្រជាធិបតេយ្យ អរិយធម៌ ភាពចុះសម្រុងគ្នា និងស្រស់ស្អាត។ បក្សកុម្មុយនិស្តចិននឹងដឹកនាំប្រជាជនគ្រប់ជនជាតិទូទាំងប្រទេសឲ្យធ្វើការខិតខំតស៊ូឈានទៅមុខតទៅទៀត សកម្មនឹងការងារ បន្តតស៊ូពុះពារដើម្បីសម្រេចសុបិនចិនស្តីពីការស្តារឡើងវិញនូវភាពរុងរឿងដ៏មហិមារបស់ជនជាតិចិន។ យើងខ្ញុំបានកត់សម្គាល់ថា ប៉ុន្មានឆ្នាំចុងក្រោយនេះ លោកប្រធានគណៈកម្មាធិការបក្សបានដឹកនាំបក្សនិងប្រជាជនកូរ៉េខាងជើង ដោយចាត់វិធានការវិជ្ជមានមួយចំនួនក្នុងវិស័យដូចជាអភិវឌ្ឍសេដ្ឋកិច្ច កែលម្អជីវភាពរស់នៅរបស់ប្រជាជន ដែលទទួលបានសមិទ្ធផលជាច្រើន។ យើងខ្ញុំសង្ឃឹមកូរ៉េខាងជើងមានស្ថិរភាពនយោបាយ សេដ្ឋកិច្ចទទួលបានការវិវឌ្ឍរីកចម្រើន ហើយប្រជាជនមានសុភមង្គល គាំទ្របក្សពលករកូរ៉េខាងជើងដែលមានលោកប្រធានគណៈកម្មាធិការនៃមជ្ឈិមបក្សជាប្រមុខដឹកនាំ បន្តដឹកនាំប្រជាជនកូរ៉េខាងជើងឲ្យឈានទៅមុខតាមផ្លូវសង្គមនិយម គាំទ្រការខិតខំប្រឹងប្រែងដ៏សកម្មរបស់មិត្តកូរ៉េខាងជើង ក្នុងការអភិវឌ្ឍសេដ្ឋកិច្ចនិងកែលម្អជីវភាពរស់នៅរបស់ប្រជាជនកូរ៉េខាងជើង។
ជាការឆ្លើយតប លោក Kim Jong Un បានថ្លែងថា តាំងពីការបើកធ្វើសមាជបក្សកុម្មុយនិស្តចិនលើកទី ១៨ មក មជ្ឈិមបក្សកុម្មុយនិស្តចិនដែលមានលោក ស៊ី ជីនភីង ជាប្រមុខស្នូលបានបង្ហាញនូវសេចក្តីអង់អាចក្លាហានផ្នែកនយោបាយដ៏ធំសម្បើមនិងមានឥរិយាបថទទួលខុសត្រូវខ្ពស់ បានលើកឡើងគំនិតនិងទស្សរៈថ្មីៗ និងអនុវត្តជាក់ស្តែង ដែលបានដោះស្រាយឧបសគ្គនិងរឿងធំៗជាច្រើនដែលពិបាកដោះស្រាយក្នុងពេលជាយូរមក ដែលនេះបានបង្ហាញយ៉ាងពេញលេញថា មាគ៌ារបស់បក្សកុម្មុយនិស្តចិនគឺជាមាគ៌ាដ៏ត្រឹមត្រូវដែលសមស្របនឹងសភាពការណ៍ជាតិរបស់ចិន ជាពិសេស លោកអគ្គលេខាធិការបានលើកឡើងថា បក្សត្រូវគ្រប់គ្រងបក្ស ត្រូវធ្វើការគ្រប់គ្រងបក្សដោយតឹងរ៉ឹងនិងគ្រប់ជ្រុងជ្រោយ ដែលប្រការនេះបានបង្កើនយ៉ាងខ្លាំងដល់កិច្ចកសាងបក្ស ក៏ដូចជាបានសម្រេចនូវការដឹកនាំដោយគ្រប់ជ្រុងជ្រោយចំពោះការងារលើគ្រប់វិស័យរបស់បក្សផងដែរ។ បច្ចុប្បន្ននេះ បក្សពលករយើងក៏កំពុងបង្កើនកម្លាំងធ្វើការតស៊ូប្រយុទ្ធជាមួយនឹងទង្វើក្អេងក្អាងដោយសារអំណាច ការិល័យនិយម និងអំពើពុករលួយផងដែរ។ សូមជូនពរដោយស្មោះដល់ប្រទេសចិន ឲ្យបន្តទទួលបានសមិទ្ធផលដ៏មហិមាឥតឈប់ឈរ ក្នុងដំណើរកសាងសង្គមដែលប្រជាជនមានជីវភាពធូរធារបង្គួរថ្មីៗដោយគ្រប់ជ្រុងជ្រោយ និងការកសាងប្រទេសសង្គមនិយមដ៏ខ្លាំងក្លានិងទំនើប។
ថ្នាក់ដឹកនាំទាំងពីរបានធ្វើការផ្លាស់ប្តូរមតិយោបល់យ៉ាងស៊ីជម្រៅចំពោះបញ្ហាអន្តរជាតិនិងស្ថានការណ៍នៅឧបទ្វីបកូរ៉េ។
លោកស៊ីជីនភីងបានថែ្លងថា ចាប់ពីចូលឆ្នាំនេះ ស្ថានការណ៍នៅឧបទ្វីបកូរ៉េបានកើតមានការប្រែប្រួលជាវិជ្ជមាន។កូរ៉េខាងជើងបានធ្វើខិតខំប្រឹងប្រែងដ៏សំខាន់ចំពោះរឿងនេះ យើងខ្ញុំសូមសំដែងការកោតសរសើរដល់កូរ៉េខាងជើង។ទាក់ទិននឹងបញ្ហាឧបទ្វីបកូរ៉េប្រទេសចិនបានប្រកាន់ខ្ជាប់ការសម្រេចឲ្យបាននូវគោលដៅគ្មានអាវុធនុយក្លេអ៊ែរនៅឧបទ្វីបកូរ៉េ ធានាគាំពារសន្តិភាពនិងស្ថិរភាពនៅឧបទ្វីបកូរ៉េព្រមនិងដោះស្រាយបញ្ហាតាមរយៈកិច្ចពិគ្រោះពិភាក្សា។ប្រទេសចិនសូមអំពាវនាវឲ្យភាគីនានាគាំទ្រដល់ភាគីខាងជើងនិងខាងត្បូងនៃឧបទ្វីបកូរ៉េដើម្បីកែលម្អទំនាក់ទំនងរវាងភាគីទាំងពីរនិងរួមគ្នាធ្វើការខិតខំប្រឹងប្រែងជាក់ស្តែងដើម្បីជួយជំរុញឲ្យមានកិច្ចចរចាដោយសន្តិវិធី។ប្រទេសចិនរីករាយក្នុងការដើរតួនាទីប្រកបដោយលក្ខណៈស្ថាបនានៅលើបញ្ហាឧបទ្វីបកូរ៉េជាបន្តទៀតនិងរួមសហការជាមួយភាគីនានា បូករួមទាំងភាគីកូរ៉េខាងជើងផងដើម្បីរួមគ្នាជំរុញស្ថានការណ៍នៅឧបទ្វីបកូរ៉េឲ្យឈានទៅរកភាពធូរស្រាល។
លោក Kim Jong Un បានថែ្លងថា ស្ថានការណ៍នៅឧបទ្វីបកូរ៉េនាពេលបច្ចុប្បន្ននេះបានចាប់ផ្តើមវិវឌ្ឍទៅតាមទិសដៅដ៏ល្អប្រសើរហើយ។ភាគីកូរ៉េខាងជើងបានចាត់វិធានការដើម្បីបន្ធូរបន្ថយភាពតានតឹងនិងលើកសំណើរធ្វើការចរចាសន្តិភាព។អនុលោមតាមពាក្យបណ្តាំរបស់លោកប្រធានរដ្ឋ Kim Il Sung និងលោកអគ្គលេខាធិការ Kim Jong Il ភាគីកូរ៉េខាងជើងបានធ្វើកិច្ចខិតខំប្រឹងប្រែងដើម្បីសម្រេចបាននូវការគ្មានអាវុធនុយគ្លេអ៊ែរនៅឧបទ្វីបកូរ៉េដែលឥតកែប្រែជានិច្ច។កូរ៉េខាងជើងប្តេជ្ញាធ្វើឲ្យទំនាក់ទំនងរវាងកូរ៉េខាងជើងនិងកូរ៉េខាងត្បូងប្រែទៅជាទំនាក់ទំនងសហប្រតិបត្តិការនិងផ្សះផ្សាគ្នា ដូចជាការរៀបចំកិច្ចជំនួបសន្ទនានៃប្រមុខរដ្ឋរវាងកូរ៉េខាងជើងនិងកូរ៉េខាងត្បូងព្រមទាំងរីករាយក្នុងការធ្វើកិច្ចសន្ទនាជាមួយភាគីសហរដ្ឋអាមេរិក ហើយនឹងរៀបចំកិច្ចជំនួបសន្ទនានៃប្រមុខរដ្ឋរវាងកូរ៉េខាងជើងនិងសហរដ្ឋអាមេរិកទៀតផង។ប្រសិនបើកូរ៉េខាងត្បូងនិងសហរដ្ឋអាមេរិកនឹងឆ្លើយតបដោយសុទ្ធចិត្តចំពោះកិច្ចប្រឹងប្រែងរបស់ភាគីកូរ៉េខាងជើង ដោយបង្កបង្កើតនូវបរិយាកាសសន្តិភាពនិងស្ថិរភាពព្រមនិងចាត់វិធានការជាដំណាក់កាលនិងដើរស្របគ្នាដើម្បីសម្រេចបាននូវសន្តិភាព នោះបញ្ហាគ្មានអាវុធនុយគ្លេអ៊ែរនៅឧបទ្វីបកូរ៉េនឹងអាចត្រូវបានដោះស្រាយហើយ។នៅក្នុងដំណើរនេះ ភាគីកូរ៉េខាងជើងរំពឹងថា នឹងអាចបង្កើនការប្រាស្រ័យទាក់ទងជាយុទ្ធសាស្រ្តជាមួយភាគីចិនដើម្បីរួមគ្នាគាំពារនិន្នាការនៃការពិគ្រោះពិភាក្សា ក៏ដូចជាសន្តិភាពនិងស្ថិរភាពនៅឧបទ្វីបកូរ៉េ។
មុនពេលកិច្ចជំនួប លោកស៊ីជីនភីងបានរៀបចំពិធីបដិសណ្ឋារកិច្ចចំពោះលោក Kim Jong Un នៅសាលខាងជើងនៃវិមានសភាប្រជាជន។
បន្ទាប់ពីកិច្ចជំនួប លោកស៊ីជីនភីងនិងលោកស្រីPeng Liyuanជាភរិយាបានរៀបចំពិធីជប់ដំណើររបស់លោក Kim Jong Un និងលោកស្រីRiSolJuជាភរិយា។ថ្លែងក្នុងសុន្ទរកថាស្វាគមន៍ លោកស៊ីជីនភីងបានលើកឡើងថា លោក Kim Jong Un និងលោកស្រីRiSolJuមកបំពេញទស្សនកិច្ចក្រៅផ្លូវការនៅប្រទេសចិន គឺជារឿងដែលមានអត្ថន័យសំខាន់ក្រៃលែងសម្រាប់ការធ្វើឲ្យស៊ីជម្រៅនូវការប្រាស្រ័យទាក់ទងគ្នារវាងភាគីទាំងពីរក៏ដូចជាបង្កើននិងជំរុញកិច្ចសម្របសម្រួលនិងកិច្ចសហប្រតិបត្តិការគ្នា។ព្រមពេលជាមួយគ្នា ក៏ជំរុញទំនាក់ទំនងរវាងបក្សនិងប្រទេសទាំងពីរឲ្យបោះជំហានថ្មីមួយទៀតតៅកាន់យុគសម័យថ្មីនៃប្រវត្តិសាស្រ្តនិងរួមចំណែកសំខាន់ដល់ការជំរុញសន្តិភាព ស្ថិរភាពនិងការអភិវឌ្ឍនៅតំបន់នេះ។អម្បាញ់មិញនេះខ្ញុំទើបបានធ្វើកិច្ចសន្ទនាដ៏ស្មោះត្រង់និងប្រកបដោយមេត្រីភាពជាមួយលោក Kim Jong Un ។យើងបានឯកភាពគ្នាថា ការបន្តវេននិងពង្រីកចំណងមិត្តភាពប្រពៃណីរវាងចិននិងកូរ៉េខាងជើងគឺវាសមស្របទៅនឹងផលប្រយោជន៍របស់ភាគីទាំងពីរ ហើយក៏ជាជម្រើសជាយុទ្ធសាស្រ្តរួមរបស់ភាគីទាំងពីរផងដែរ។
ពេលឡើងថ្លែងសន្ទរកថា លោក Kim Jong Un បានលើកឡើងថា ក្រោមបរិបទដែលស្ថានការណ៍ឧបទ្វីបកូរ៉េមានការប្រែប្រួលដ៏ធំសម្បើម ខ្ញុំបានពាំនាំមកនូវបំណងប្រាថ្នាដ៏ល្អបវរដែលចង់ជំរុញឲ្យឧបទ្វីបកូរ៉េមានសន្តិភាពនិងស្ថិរភាព បន្តវេននិងពង្រីកចំណងមិត្តភាពរវាងកូរ៉េខាងជើងនិងចិនទើបបានមកធ្វើទស្សនកិច្ចយ៉ាងឆាប់រហ័សនៅប្រទេសចិន។ទស្សនកិច្ចនៅបរទេសជាលើកដំបូងរបស់ខ្ញុំគឺមកដល់ប្រទេសចិន ប្រការនេះបានបង្ហាញឲ្យឃើញនូវក្តីបំណងរបស់ខ្ញុំដែលចង់បន្តផ្សាយទូលាយមិត្តភាពជាប្រពៃណីរវាងកូរ៉េខាងជើងនិងចិន និងរក្សាតម្លៃលើមិត្តភាពរវាងកូរ៉ខាងជើងនិងចិន។ខ្ញុំបានធ្វើកិច្ចសន្ទនាប្រកបដោយភាពជោគជ័យជាមួយនិងលោកស៊ីជីនភីងអគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិនជុំវិញទំនាក់ទំនងរវាងបក្សនិងប្រទេសទាំងពីរកូរ៉េខាងជើងនិងចិន ស្ថានការណ៍ក្នុងប្រទេសរៀងៗខ្លួននិងការគាំពារសន្តិភាពនិងស្ថិរភាពនៃឧបទ្វីបកូរ៉េជាដើម។ខ្ញុំជឿជាក់ថា ការធ្វើកិច្ចជំនួបជាលើកដំបូងជាមួយនិងលោកស៊ីជីនភីងអគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិននៅក្នុងរដូវផ្ការីកដែលប្រកបដោយភាពសប្បាយរីករាយនិងក្តីសង្ឃឹមនេះ វាមុខជានឹងទទួលបានផ្លែផ្កាមិត្តភាពដ៏សម្បូរនិងឈានដល់ការជំរុញសន្តិភាពនិងស្ថិរភាពនៃឧបទ្វីបកូរ៉េជាមិនខាន។
ក្នុងអំឡុងពេលដំណើរទស្សនកិច្ចរបស់លោក Kim Jong Un លោកស៊ីជីនភីងនិងលោកស្រីPeng Liyuanជាភរិយាបានរៀបចំពិធីជប់លៀងអាហារថ្ងៃត្រង់សម្រាប់លោក Kim Jong Un និងលោកស្រីRiSolJuជាភរិយានៅឯសណ្ឋាគាររដ្ឋDiaoYuTai។
លោក Kim Jong Un ក៏បានទស្សនាពិព័រណ៍ស្តីពីសមិទ្ធផលច្នៃប្រឌិតថ្មីរបស់បណ្ឌិត្យសភាវិទ្យាសាស្រ្តចិនបន្ទាប់ពីសមាជបក្សកុម្មុយនិស្តចិនលើកទី១៨ដែលមានចំណងជើងថា ប្រតិបត្តិការនាំមុខ តស៊ូពុះពារការលំបាក។លោក Kim Jong Un បានសំដែងការកោតសរសើរចំពោះសមិទ្ធផលដែលប្រទេសចិនទទួលបានក្នុងផ្នែកអភិវឌ្ឍវិទ្យាសាស្រ្តនិងបច្ចេកទេសក៏ដូចជាការច្នៃប្រឌិតថ្មី ហើយបានចារពាក្យទុកជាអនុស្សាវរីយ៍បន្ទាប់ពីការទស្សនាទៀតផង។
លោកDing Xue xiang សមាជិកនៃការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន លេខាធិការនៃលេខាធិការដ្ឋានមជ្ឈិមបក្សកុម្មុយនិស្តចិននិងជានាយខុទ្ទកាល័យមជ្ឈិមចិន លោក Yang Jie chi សមាជិកនៃការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន លោក Guo Sheng kun សមាជិកនៃការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន លេខាធិការនៃលេខាធិការដ្ឋានមជ្ឈិមបក្សកុម្មុយនិស្តចិននិងជាលេខាធិការនៃគណៈកម្មាធិការនយោបាយនិងច្បាប់នៃមជ្ឈិមបក្សកុម្មុយនិស្តចិន លោក Huang Kun ming សមាជិកនៃការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន លេខាធិការនៃលេខាធិការដ្ឋានមជ្ឈិមបក្សកុម្មុយនិស្តចិននិងជារដ្ឋមន្រ្តីក្រសួងឃោសនាការនៃគណៈកម្មាធិការមជ្ឈិមបក្សកុម្មុយនិស្តចិន លោក Cai Qi សមាជិកនៃការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិននិងជាលេខាធិការបក្សប្រចាំនៅក្រុងប៉េកាំង លោក Wang Yi សមាជិកក្រុមប្រឹក្សាកិច្ចការរដ្ឋចិននិងជារដ្ឋមន្រ្តីក្រសួងការបរទេសចិនជាដើមបានអញ្ជើញចូលរួមសកម្មភាពលើកនេះ។
លោក Choe Ryong Hae អនុប្រធាននៃគណៈកម្មាធិការបក្សពលករកូរ៉េខាងជើងនិងជារដ្ឋមន្រ្តីក្រសួងចាត់តាំងនិងណែនាំនៃកូរ៉េខាងជីង លោក Pak Kwang Ho អនុប្រធាននៃគណៈកម្មាធិការបក្សពលករកូរ៉េខាងជើងនិងជារដ្ឋមន្រ្តីក្រសួងឃោសនាការនិងលើកទឹកចិត្តនៃកូរ៉េខាងជើង លោក Ri Su Yong អនុប្រធាននៃគណៈកម្មាធិការបក្សពលករកូរ៉េខាងជើងនិងជារដ្ឋមន្រ្តីក្រសួងអន្តរជាតិកូរ៉េខាងជើង លោក Kim Yong Chol អនុប្រធាននៃគណៈកម្មាធិការបក្សពលករកូរ៉េខាងជើងនិងជារដ្ឋមន្រ្តីក្រសួងរណសិរ្សបង្រួបបង្រួមនៃកូរ៉េខាងជើងនិងលោក Ri Yong Ho រដ្ឋមន្រ្តីក្រសួងការបរទេសកូរ៉េខាងជើងជាដើមបានអមដំណើរជាមួយលោក Kim Jong Unទៅបំពេញទស្សនកិច្ចនៅប្រទេសចិនព្រមទាំងអញ្ជើញចូលរួមសកម្មភាពពាក់ព័ន្ធផងដែរ៕
