New Delhi, India-Idinaos Disyembre 11, 2017 ang Ika-15 Regular na Diyalogo ng mga Ministrong Panlabas ng Tsina, Rusya, at India. Dumalo sa pagtitipon sina Ministrong Panlabas Wang Yi ng Tsina, Ministrong Panlabas Sergey Lavrov ng Rusya, at Ministrong Panlabas Sushma Swaraj ng India.
Ipinahayag ng tatlong ministro na nitong 15 taong nakalipas sapul ng pagkakatatag ng mekanismong pandiyalogo ng tatlong panig, nagiging masigla ang kanilang pagtutulungan, at magiging mas malaki ang potensyal nito sa hinaharap.
Umaasa anila silang ibayo pang mapapahigpit ang koordinasyon at kooperasyon sa mga suliraning panrehiyon at pandaigdig, na gaya ng sagupaang panrehiyon, pag-unlad ng kabuhayan, paglaban sa terorismo, pagbabago ng klima, at iba pa, batay sa balangkas ng mga multilateral na mekanismong panrehiyon at pandaigdig na gaya ng UN, G20, BRICS, SCO, at iba pa. Ito anila'y para pasulungin ang pagtatatag ng mas makatarungan at demokratikong kaayusang pandaigdig.
Anila, bilang isang bukas na regular na mekanismong pangkooperasyon, ang pagtutulungan ng Tsina, Rusya at India ay hindi nakatuon sa ikatlong panig. Ito ay hindi lamang angkop sa komong interes ng mga emerging market at umuunlad na bansa, kundi makakatulong din sa kapayapaan at kaunlaran ng daigdig.
Nang araw ring iyon, ipinalabas din ang magkasanib na kumunike ng tatlong panig.
