Mahigit 3,100 tauhan na kinabibilangan ng mga bombero, pulis, at boluntaryo ang nakilahok sa gawain ng paghahanap at pagliligtas makaraang yanigin ng 6.0-magnitude na lindol ang Changning County, lunsod ng Yibin, lalawigang Sichuan sa dakong timog-kanluran ng Tsina. Hanggang alas-4:00 ng hapon, Miyerkules, Hunyo 19, natapos na sa kabuuan ang gawain ng paghahanap at pagliligtas at nagsimula nang ayusin ang mga guho.
Ito ang ipinahayag ni Li Tinggen, Pangkalahatang Kalihim ng pamahalaan ng Yibin sa preskon kahapon. Ito ang ikatlong preskon sapul nang maganap ang lindol alas 10:55, nitong Lunes ng gabi.
Ayon kay Li, 13 katao ang namatay, at 220 iba pa ang nasugatan. Bukod dito, 243,880 mamamayang lokal ang apektado, at mahigit 52,000 mamamayan ang inilipat mula sa mga nilindol na lugar. Kasabay nito, mahigit 20,000 bahay ang nagiba o matinding nasira, ayon sa pinakahuling datos.
Mga manggagawa habang naglilinis ng lansangan sa Shuanghe Town, Changning County, lunsod ng Yibin, lalawigang Sichuan, noong Hunyo 18, 2019. [Larawan: Xinhua]
Mga tauhang medikal habang nagsasaayos ng tolda sa Shuanghe Town, Changning County, lunsod ng Yibin, lalawigang Sichuan, noong Hunyo 18, 2019. [Larawan: Xinhua]
Mga tauhang medikal ng sandatahang lakas habang nangungumusta sa mga mamamayan sa pansamantalang panirahan, Shuanghe Town, Changning County, lunsod ng Yibin, lalawigang Sichuan, noong Hunyo 18, 2019. [Larawan: Xinhua]
Mga tauhang medikal ng sandatahang lakas habang ginagamot ang isang nasugatang mamamayan sa pansamantalang panirahan, Shuanghe Town, Changning County, lunsod ng Yibin, lalawigang Sichuan, noong Hunyo 18, 2019. [Larawan: Xinhua]
Salin: Jade
Pulido: Rhio
