Tungkol sa pananalita ng Kalihim ng Tanggulang Bansa ng Amerika hinggil sa di-umano'y "pagsira ng Tsina sa katatagan ng rehiyong Indo-Pasipiko," ipinahayag nitong Lunes, Agosto 5, 2019 ni Tagapagsalita Hua Chunying ng Ministring Panlabas ng Tsina, na sa mahabang panahon, ginagamit ng Amerika ang iba't-ibang paraang kinabibilangan ng paggamit sa umano'y "Indo-Pacific Strategy," upang walang humpay na panghimasukin ang mga suliranin ng mga bansa sa rehiyong Asya-Pasipiko. Malinaw aniya kung sino talaga ang nakakasira sa katatagan ng rehiyong ito.
Nauna rito, sinabi ni Mark Esper, Kalihim ng Tanggulang Bansa ng Amerika, na ang ginagawa ng Tsina ay nakakasira sa rehiyong Indo-Pasipiko, at umaasa siyang mai-de-deploy ang mga mid-range missile sa Asya sa loob ng darating na ilang buwan. Ayon sa isang mamamahayag, ang Tsina ay nagtataglay ng mga missile na aabot sa Hapon at Guam; bakit nito tinututulan ang pagkakaroon ng Amerika ng mid-range missile sa Asya?
Bilang tugon, ipinahayag ni Hua na ganap na di-responsible ang nasabing pananalita. Aniya, sa mahabang panahon, walang humpay na nanghihimasok ang Amerika sa mga suliranin ng mga bansa sa rehiyong Asya-Pasipiko at bastos itong nanghihimasok sa mga suliraning panloob ng ibang bansa. Sa kabuhayan, napakaramot ng Amerika at puspusang isinusulong ang "beggar-thy-neighbor policy"; walang humpay rin nitong pinalalakas ang alyansang militar, kaya, malinaw ani Hua kung sino ang talagang nakakasira sa katatagan ng rehiyong ito.
Dagdag ni Hua, ang Tsina ay may napakalaking teritoryo at populasyon. Kaya, kinakailangan aniya nito ang puwersang pandepensa para labanan ang pananalakay, at ipagtanggol ang soberanya, at kabuuan ng teritoryo nito. Aniya pa, ang lahat ng mid-range missile ng Tsina ay idine-deploy sa loob ng bansa, at ito ay nagpapakita na ang hangarin ng Tsina ay depensa lamang at hindi nakatuon sa pagsalakay. Ngunit kung ide-deploy ng Amerika ang nasabing mga missile sa rehiyong Asya-Pasipiko, partikular, sa paligid ng Tsina, may malinaw na substansyang mapanalakay, at tiyak itong magdudulot ng grabeng negatibong epekto sa situwasong panseguridad sa rehiyon at buong daigdig.
Salin: Lito
