Sa virtual session ng World Health Assembly (WHA) na binuksan kahapon, Lunes, ika-18 ng Mayo 2020, sinabi ni Tedros Adhanom Ghebreyesus, Direktor Heneral ng World Health Organization (WHO), na mula sa COVID-19 pandemic, napagtanto ng mga tao ang kahalagahan ng usaping pangkalusugan. Dapat aniyang maging mas malusog, ligtas, at patas ang mundo.
Pinasalamatan din ni Tedros ang mga lider ng komunidad ng daigdig sa pagpapahayag ng suporta sa WHO at paggawa ng pangako sa pagbibigay-pondo sa organisasyong ito. Patitingkarin aniya ng WHO ang mas malaking papel sa hinaharap.
Samantala, sinabi ni Tedros, na batay sa kasalukuyang pag-aaral, kahit sa lugar na pinakagrabe ang kalagayan ng COVID-19, lumitaw lamang ang antibody sa 20% ng populasyon. Ito aniya ay nangangahulugang madali pa ring mahawahan ng sakit na ito ang karamihan sa mga tao sa daigdig. Hinimok niya ang iba't ibang bansa na panatilihin ang pag-iingat sa pagharap sa COVID-19.
Salin: Liu Kai