Sinabi nitong Lunes, Hunyo 1, 2020 ni Zhao Lijian, Tagapagsalita ng Ministring Panlabas ng Tsina, na buong tatag na pangangalagaan ng panig Tsino ang sariling kapakanan sa soberanya, seguridad at kaunlaran. Aniya, buong lakas na gaganti ang panig Tsino sa anumang pananalita't kilos ng panig Amerikano na nakakapinsala sa kapakanan ng panig Tsino, at hinding hindi magtatagumpay ang tangka ng panig Amerikano na hadlangan ang pag-unlad at pag-ahon ng Tsina.
Bumigkas kamakailan ng talumpati si Pangulong Donald Trump ng Amerika, kung saan walang batayang binatikos niya ang Tsina sa mga isyung gaya ng lehislasyon sa pambansang seguridad ng Hong Kong, kalagayan ng Coronavirus Disease 2019 (COVID-19) pandemic, kabuhaya't kalakalan at iba pa. Ipinaalam niyang sisimulan ang proseso ng pagkakansela ng patakaran ng espesyal na tratado sa Hong Kong, pipigilan ang pagpasok ng ilang estudyante't iskolar na Tsino sa Amerika, at iimbestigahan ang magkakaibang kilos ng mga kompanyang Tsino sa paglilista sa Amerika.
Kaugnay nito, ipinahayag ni Zhao na ang iba't ibang pagbatikos ng lider na Amerikano sa panig Tsino ay salungat sa katotohanan, at ang mga hakbanging ipinatalastas niya ay matinding pakikialam sa mga suliraning panloob ng Tsina, at pagsira sa relasyong Sino-Amerikano. Tiyak na makakapinsala ito sa sariling interes ng Amerika at interes ng ibang panig, at buong tatag itong tinututulan ng panig Tsino.
Salin: Vera
