Jami'ai a Najeriya sun bayyana cewa, hukumar gudanarwar kwallon kafa ta kasar zata bayyana sunan jami'in da zai jagoranci horas da 'yan wasan babbar kungiyar kwallon kafa ta kasar Super Eagles a cikin watan Augusta mai zuwa.

Chris Green, shine shugaban kwamitin kwararru, da tsare tsare a hukumar kwallon kafa ta kasar (NFF), ya kuma tabbatar da hakan ga manema labaru a Abuja, fadar mulkin kasar.

Tuni dai kwamitin gudanarwar hukumar ya baiwa kwamitin kwararrun wa'adin kwanaki 7 da ya bayyana mutumin da zai zamo babban jami'in horas da 'yan wasan babbar kungiyar kwallonn kafan kasar, bayan da hukumar ta NFF ta gaza samun amincewar koci dan asalin kasar Faransa Paul Le Guen a matsayin wanda zai jagoranci kungiyar.

Green, ya ce koda yake wa'adin da NFF ta baiwa kwamitin don ya maye gurbin Le Guen ya cika tun a ranar 27 ga watan Yuli, duk da haka ana ta kokarin daukar matakai don tabbatar ganin wa'adin bai wuce wannan wata na Augusta ba.