Yayin bikin za a gudanar da gasanni 3, wadanda suka hada da ESCC na shekarar 2017, da wasan karshe na E-Sports tournament, da kuma E-Sports ecological convention.
Gasar ESCC dai ita ce irin ta ta farko da za a gudanar a matakin kasa, wadda kuma za a gudanar a sabon dakin wasan na'urori masu kwakwalwa da aka gina. An shafe watanni 10 ana zabar 'yan wasan da za su fafata a gasannin 3, kuma tuni aka zabo kungiyoyi 16 daga lardunan kasar 10, wadanda za su kara don lashe kofin kasa a birnin na Zhangzhou.
A cewar mashirya gasar, za a bude dakin wasannin kwamfutar ne kafin babbar gasar dake tafe.
Sabon zauren dai na da fadin sikwaya mita 3,500, yana kuma kunshe da dukkanin ababen da ake bukata domin gudanar da wasannin na'ura mai kwakwalwa, da na gudanar da taruka masu nasaba da hakan. Baya ga wuraren ilmantarwa, da bada horo, da na nune nune.(Saminu Alhassan)
