Yanzu ga sakamakon wasu wasanni na gasar cin kofin kwallon kafar duniya wadda a yanzu haka ke gudana a kasar Rasha. A jiya Jumma'a a filin wasa na Yakaterinburg, a fafatawar da aka yi tsakanin Uruguay da Masar a rukuni na A, wadda ta kasance wasa ta biyu a gasar cin kofin duniya ta bana, Uruguay ta lashe gasar da ci daya da nema, inda fitaccen dan wasan kwallon kafar Masar, Mohamed Salah, bai samu damar fafatawa ba saboda raunin da ya ji a kafada.

Sa'annan a rukuni na B, a birnin Saint Petersburg, Iran ta doke Morocco da ci daya da nema, inda dan wasan Morocco Aziz Bouhaddouz ya buga kwallo da ka cikin ragarsu, abun da ya jawo nasarar da Iran ta samu, wadda kuma ta zama nasara ta biyu da ta taba samu a tarihinta na halartar gasar cin kofin duniya.

Har wa yau, a wata fafatawa ta daban a rukunin B a birnin Sochi, Spaniya da Portugal sun yi canjaras da ci uku da uku, inda shahararren dan wasan kwallon kafar Portugal Cristiano Ronaldo, ya zura kwallaye uku shi kadai.(Murtala Zhang)