Wani jami'in cibiyar kimiyyar ayyukan gona ta kasar Sin ko CAAS a takaice Zhang Hecheng, ya ce kasar Sin ta samu gagarumin ci gaba a fannin samar da hatsi. Zhang Hecheng ya ce yawan hatsin da kasar ke nomawa ya karu daga kilogiram 135 kan ko wane ma'aunin "mu" a shekarar 1978, zuwa kilogiram 367 a shekarar 2017. Hakan a cewar sa ya biyo bayan ci gaba da aka samu ne a fannin kirkire kirkire a fannin na noma.

Jami'in ya bayyana hakan ne yayin taron masu ruwa da tsaki, game da cikar kasar Sin shekaru 40 da fara aiwatar da manufofin gyare gyare a cikin gida da bude kofa ga kasashen waje.

Ya ce Sin ta gudanar da manyan ayyuka da suka shafi nazari, da binciken kwayoyin halittar tsirrai, ta kuma tattara muhimman bayanan kimiyya game da wasu nau'o'in hatsi, kamar shinkafa, da alkama da masara da ake nomawa a kasar. Kaza lika an gudanar da irin wannan aiki a fannin dabbobin kiwo kamar shanu da tumaki.

Zhang Hecheng ya kara da cewa, Sin ta cimma nasarori a ayyukan tagwaita irin shinkafa, da yaki da cututtukan dake addabar dabbobi da wasu tsirrai. Daga nan sai ya yi kira ga daukacin masu ruwa da tsaki a fannin raya noma a kasar, da su kara azama wajen fadada kirkire kirkire, da samar da ci gaba a ayyukan noma na zamani.