2020-01-26 16:36:46        cri

Shirin wanzar da zaman lafiya na MDD a kasar Libya (UNSMIL), a jiya Asabar ya bayyana rashin jin dadi bisa yadda ake cigaba da karya dokar takunkumin hana yaduwar makamai a kasar Libya, yayin da ake cigaba da gwabza yaki tsakanin sojoji dake da sansani a gabashin kasar da kuma bangaren sojojin gwamnati dake samun goyon bayan MDD.

A ranar 19 ga watan Janairu, mahalarta taron zaman lafiya na birnin Berlin sun amince zasu mutunta dokar takunkumin hana yaduwar makamai a Libya wanda kwamitin sulhun MDD ya amince da ita.

Sai dai an ga wasu manyan jiragen saman dakon kaya da wasu jiragen sama sun sauka a filayen jiragen sama dake gabashi da yammacin Libya a 'yan kwanakin da suka gabata, inda suka sauke manyan makamai, da tankokin yaki, da masu bada shawara da kuma mayaka na bangarorin biyu, a cewar sanarwar.

Shirin MDD yayi Allah wadai da yadda ake cigaba da saba yarjejeniyar, lamarin da zai iya jefa kasar cikin sabon tashin hankali da barkewar yaki.