2020-08-31 19:59:50        cri

Mai magana da yawun ma'aikatar harkokin wajen kasar Sin Zhao Lijian, ya shaidawa taron manema labarai na rana-rana da aka saba shiryawa cewa, ya kamata sakataren harkokin wajen kasar Amurka Mr. Mike Pompeo, ya kalli kansa a madubi, ya kuma tambayi kansa dalilin da ya sa kasarsa ta janye daga yarjejeniyar sauyin yanayi ta binrin Paris.

Da yake karin haske kan kalaman da Pompe ya yi cewa, wai kasar Sin ce ke da kusan kaso 30 cikin 100 na tarkacen robobin da ake zubarwa a duniya. Zhao ya bayyana cewa, gwamnatin kasar Sin tana dora muhimmanci kan batun da ya shafi kare muhalli, tana kuma daukar kyakkyawan muhallin halittu a matsayin batu mafi fa'ida ga rayuwar jama'a, ta kuma bayar da gagarumar gudummawa wajen kare muhalli, da rage fitar da abubuwa masu gurbata muhalli gami da ci gaba mai dorewa.

Haka kuma, kasar Sin ta cika alkawuran da ta dauka game da wannan yarjejeniya, ta kuma ba da babbar gudummawa kan yadda ake tafiyar da harkokin da suka shafi muhalli a duniya. A hannu guda kuma, a matsayin Amurka na kasar dake kan gaba wajen fitar da abubuwa masu gurbata muhalli, kana kasar take kan gaba wajen fitar da shara da ma robobi a duniya zuwa ketare, wadanne matakai Amurkar take dauka wajen kare muhalli? A fili yake cewa, an san wadda ba ta damu da muhallin duniya da ma lafiyar al'ummar duniya baki daya ba. (Ibrahim Yaya)