ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕາມຂ່າວCRI: ວັນທີ 14 ມິຖຸນານີ້, ຢູ່ທີ່ປັກກິ່ງ, ທ່ານ ສີຈິ້ນຜິງ ປະທານປະເທດຈີນໄດ້ພົບປະກັບທ່ານ ໄມ ປົມເປວ ລັດຖະມົນຕີກະຊວງການຕ່າງປະເທດອາເມຣິກາທີ່ຢ້ຽມຢາມຈີນ.
ທ່ານ ສີຈິ້ນຜິງ ຊີ້ວ່າ, ຈີນແລະອາເມຣິກາໄດ້ມີຜົນປະໂຫຍດຮ່ວມຢ່າງກວ້າງຂວາງໃນດ້ານການປົກປັກຮັກສາສັນຕິພາບແລະສະຖຽນລະພາບຂອງໂລກແລະຊຸກຍູ້ການພັດທະນາແລະຄວາມຈະເລີນຮຸ່ງເຮືອງຂອງໂລກ,ໄດ້ແບກຫາບໜ້າທີ່ຮັບຜິດຊອບທີ່ສຳຄັນ. ການຮ່ວມມືລະຫວ່າງສອງປະເທດສາມາດບັນລຸວຽກງານສຳຄັນທີ່ເປັນປະໂຫຍດຕໍ່ສອງປະເທດແລະໂລກ. ຫວັງວ່າທີມງານຂອງສອງຝ່າຍສາມາດເພີ່ມທະວີການຕິດຕໍ່ພົວພັນກັນ,ເພີ່ມຄວາມໄວ້ເນື້ອເຊື່ອໃຈເຊິ່ງກັນແລະກັນ,ຄວບຄຸມແລະຄຸ້ມຄອງຄວາມຂັດແຍ້ງກັນ ແລະ ເປີດກວ້າງການຮ່ວມມືຕາມຄວາມຮັບຮູ້ທີ່ເປັນເອກະພາບກັນລະຫວ່າງຂ້າພະເຈົ້າກັບທ່ານໂດໂນ ທຣຳ ປະທານາທິບໍດີອາເມຣິກາທີ່ໄດ້ບັນລຸໃນການພົບປະກັນຢູ່ປັກກິ່ງ,ຊຸກຍູ້ສາຍພົວພັນລະຫວ່າງສອງປະເທດໃຫ້ຂະຫຍາຍຕົວໄປໜ້າຕາມທິດທາງທີ່ຖືກຕ້ອງ,ສ້າງຄວາມຜາສຸກໃຫ້ແກ່ປະຊາຊົນສອງປະເທດກໍ່ຄືຂອງບັນດາປະເທດໃນໂລກໃຫ້ຫຼາຍຂຶ້ນ.
ໃນໂອກາດນີ້, ທ່ານ ໄມ ປົມເປວ ໄດ້ຝາກຄວາມຢື້ຢາມຖາມຂ່າວຂອງທ່ານ ໂດໂນ ທຣຳ ປະທານາທິບໍດີອາເມຣິກາໄປຍັງທ່ານ ສີຈິ້ນຜິງ ປະທານປະເທດຈີນ ໂດຍສະເພາະແມ່ນຂອບໃຈທ່ານ ສີຈິ້ນຜິງ ທີ່ໄດ້ໃຫ້ຄວາມຄິດເຫັນແລະການຊ່ວຍເຫຼືອທີ່ສຳຄັນກ່ຽວກັບບັນຫາແຫຼມເກົາຫຼີ. ທ່ານ ໄມ ປົມເປວ ກ່າວວ່າ, ພາຍໃຕ້ການນຳພາຂອງປະມຸກລັດຂອງສອງປະເທດ, ສາຍພົວພັນລະຫວ່າງອາເມຣິກາ-ຈີນໄດ້ຮັບການຂະຫຍາຍຕົວຢ່າງບໍ່ຢຸດຢັ້ງ. ອາເມລິກາໄດ້ໃຫ້ຄວາມສຳຄັນຕໍ່ການພັດທະນາການພົວພັນກັບຈີນ,ຍິນດີເພີ່ມທະວີການທຳຄວາມເຂົ້າໃຈກັບຈີນ,ແກ້ໄຂບັນຫາທີ່ພົ້ນເດັ່ນໃຫ້ດີ,ລົງເລິກການຮ່ວມມືທີ່ຕິດແທດຕົວຈິງໃນຂົງເຂດຕ່າງໆ,ພ້ອມທັງປະສານງານຮັບມືກັບສິ່ງທ້າທາຍຂອງສາກົນແລະພາກພື້ນ. ອາເມຣິກາໄດ້ສະແດງຄວາມຍ້ອງຍໍຕໍ່ຈີນທີ່ໄດ້ເສີມຂະຫຍາຍບົດບາດທີ່ສຳຄັນໃນການແກ້ໄຂບັນຫານິວເຄຼຍຂອງແຫຼມເກົາຫຼີໂດຍຜ່ານຊ່ອງທາງການເມືອງ,ຍິນດີຮ່ວມກັບຈີນທຳຄວາມພະຍາຍາມ,ຊຸກຍູ້ການບັນລຸການປອດນິວເຄຼຍແລະມີສັນຕິພາບຖາວອນຢູ່ແຫຼມເກົາຫຼີ.
ທ່ານ ສີຈິ້ນຜິງ ກ່າວເນັ້ນວ່າ, ການບັນລຸການພົບປະຄັ້ງປະຫວັດສາດລະຫວ່າງປະທານາທິບໍດີ ໂດໂນ ທຣຳ ກັບ ທ່ານປະທານກຳມະການແຫ່ງລັດກິມເຈີງອູນຄັ້ງນີ້ໄດ້ຮັບໝາກຜົນຢ່າງຕັ້ງໜ້າ ແມ່ນບາດກ້າວທີ່ສຳຄັນໃນການແກ້ໄຂບັນຫານິວເຄຼຍຂອງແຫຼມເກົາຫຼີໂດຍຜ່ານຊ່ອງທາງການເມືອງ,ຈີນສະແດງຄວາມຊົມເຊີຍຢ່າງຈິງໃຈຕໍ່ສອງຝ່າຍ.ບັນຫາແຫຼມເກົາຫຼີມີຄວາມສັບສົນຫຼາຍ,ການແກ້ໄຂຕ້ອງເປັນຂະບວນການທີ່ຄ່ອຍເປັນຄ່ອຍໄປ. ຫວັງວ່າອາເມຣິກາແລະ ສປປ ເກົາຫຼີ ສາມາດຍຶດໝັ້ນໃນການເຄົາລົບເຊິ່ງກັນແລະກັນ,ປະຕິບັດຕໍ່ກັນຢ່າງສະເໝີພາບ,ສືບຕໍ່ທຳຄວາມພະຍາຍາມຢ່າງບໍ່ລົດລະເພື່ອແກ້ໄຂບັນຫາແຫຼມເກົາຫຼີໂດຍຜ່ານຊ່ອງທາງການເມືອງ.
ຄຳເຫັນ
0