ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 14 ມິຖຸນານີ້ ຢູ່ນະຄອນຫຼວງປັກກິ່ງ, ທ່ານຫວາງຢີ້ ທີ່ປຶກສາແຫ່ງລັດ, ລັດຖະມົນຕີກະຊວງການຕ່າງປະເທດຈີນ ໄດ້ພົບປະກັບທ່ານໄມ ພົມເພວ ທີ່ເດີນທາງຢ້ຽມຢາມຈີນໃນຖານະເປັນລັດຖະມົນຕີກະຊວງການຕ່າງປະເທດອາເມຣິກາເປັນຄັ້ງທຳອິດ ແລະຮ່ວມກັນຖະແຫຼງຂ່າວຕໍ່ສື່ມວນຊົນ. ທ່ານຫວາງຢີ້ ກ່າວວ່າ: ເພື່ອກຳແໜ້ນທິດທາງການພັດທະນາສາຍພົວພັນຈີນ-ອາເມຣິກາອັນຖືກຕ້ອງໃຫ້ດີ ສອງຝ່າຍຄວນແກ້ໄຂບັນຫາເສດຖະກິດການຄ້າໃຫ້ດີດ້ວຍຮູບແບບທີ່ຕ່າງຝ່າຍຕ່າງມີຜົນປະໂຫຍດ ແຕ່ບໍ່ແມ່ນໃຫ້ສອງຝ່າຍຕ່າງກໍປະສົບຄວາມເສຍຫາຍ, ແກ້ໄຂສິ່ງກີດຂວາງຕໍ່ການຮ່ວມມືສອງຝ່າຍໃຫ້ເໝາະສົມ, ເຄົາລົບຜົນປະໂຫຍດໃຈກາງ ແລະຄວາມກັງວົນທີ່ສຳຄັນຂອງກັນແລະກັນ, ບໍ່ຄວນໃຫ້ຄວາມຂັດແຍ້ງ ແລະ ການວິວາດກັນກະທົບກະເທືອນເຖິງສາຍພົວພັນລະຫວ່າງສອງປະເທດ.
ທ່ານພົມເພວ ໄດ້ແຈ້ງສະພາບທີ່ກ່ຽວຂ້ອງຂອງການພົບປະລະຫວ່າງຜູ້ນຳອາເມຣິກາ ແລະ ສປປ ເກົາຫຼີຢູ່ສິງກະໂປເມື່ອບໍ່ດົນຜ່ານມາໃຫ້ຝ່າຍຈີນຮັບຊາບ ແລະກ່າວວ່າ ການແກ້ໄຂບັນຫານິວເຄຼຍຂອງແຫຼມເກົາຫຼີນັ້ນ ຍັງມີວຽກງານຫຼວງຫຼາຍຈະຕ້ອງເຮັດ ອາເມຣິກາຍິນດີສືບຕໍ່ແລກປ່ຽນ ແລະປະສານງານກັບຈີນໃນການແກ້ໄຂບັນຫາດັ່ງກ່າວ.
ທ່ານຫວາງຢີ້ ກ່າວວ່າ: ການພົບປະລະຫວ່າງຜູ້ນຳອາເມຣິກາ-ສປປ ເກົາຫຼີ ຢູ່ສິງກະໂປ ໄດ້ຊຸກຍູ້ການແກ້ໄຂບັນຫານິວເຄຼຍແຫຼມເກົາຫຼີໃຫ້ປະຕິບັດໄປຕາມຊ່ອງທາງການເຈລະຈາສັນຕິພາບທີ່ຖືກຕ້ອງ ຈຶ່ງມີຄວາມໝາຍທີ່ສຳຄັນຄັ້ງປະຫວັດສາດ. ຈີນຍິນດີແລກປ່ຽນກັບບັນດາຝ່າຍທີ່ກ່ຽວຂ້ອງລວມທັງອາເມຣິກາ ແລະ ສປປ ເກົາຫຼີຢ່າງໃກ້ຊິດ ເພື່ອສືບຕໍ່ເສີມຂະຫຍາຍບົດບາດອັນຄວນຂອງຈີນໃນການຊຸກຍູ້ການປອດນິວເຄຼຍ ແລະ ການສ້າງກົນໄກສັນຕິພາບຢູ່ແຫຼມເກົາຫຼີ.
ກ່ຽວກັບສະພາບການພັດທະນາສາຍພົວພັນລະຫວ່າງຈີນ-ອາເມຣິກາໃນປັດຈຸບັນນີ້, ທ່ານຫວາງຢີ້ ກ່າວວ່າ: ຫວັງວ່າອາເມຣິກາຈະຮ່ວມກັບຈີນ ຈັດຕັ້ງປະຕິບັດຕາມຂໍ້ຕົກລົງສຳຄັນຕ່າງໆ ທີ່ທ່ານປະທານສີຈິ້ນຜິງ ແລະ ທ່ານປະທານາທິບໍດີໂດໂນ ທຣຳ ໄດ້ຕົກລົງກັນຢູ່ນະຄອນຫຼວງປັກກິ່ງ, ເຄົາລົບເຊິ່ງກັນແລະກັນ, ສຸມໃສ່ການຮ່ວມມື, ຄຸ້ມຄອງ ແລະຄວບຄຸມຄວາມຂັດແຍ້ງລະຫວ່າງສອງຝ່າຍ ເພື່ອຊຸກຍູ້ການພົວພັນລະຫວ່າງສອງປະເທດໃຫ້ພັດທະນາຢ່າງປອດໃສ.
ທ່ານພົມເພວ ກ່າວວ່າ: ອາເມຣິກາຍິນດີຮ່ວມກັບຈີນ ເປີດກວ້າງການຮ່ວມມື, ຮັບມືກັບສິ່ງທ້າທາຍຕ່າງໆ, ປຶກສາຫາລືການພັດທະນາການພົວພັນຍຸດທະສາດໃນໄລຍະຍາວ ແລະ ຮ່ວມກັນຊຸກຍູ້ການສ້າງໂລກໃຫ້ດີງາມກວ່າເກົ່າ. ຂະນະທີ່ຫຼັກໝັ້ນຂອງອາເມຣິກາບໍ່ມີການປ່ຽນແປງແຕ່ຢ່າງໃດໃນບັນຫາໄຕ້ຫວັນ ແລະຈະສືບຕໍ່ປະຕິບັດນະໂຍບາຍຈີນດຽວ.
ຄຳເຫັນ
0