ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 23 ກໍລະກົດນີ້, ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານພອນກາກາເມ ປະທານາທິບໍດີຣູອັນດາຢູ່ນະຄອນຫຼວງຄີກາລີ. ປະມຸກລັດສອງປະເທດໄດ້ຕີລາຄາສູງຕໍ່ໝາກຜົນການພັດທະນາສາຍພົວພັນສອງຝ່າຍນັບແຕ່ການສ້າງຕັ້ງສາຍພົວພັນທາງການທູດຈີນ-ຣູອັນດາ 47 ປີຜ່ານມາ, ພ້ອມທັງວາງແຜນການຮ່ວມມືໃນອະນາຄົດ ແລະເຫັນດີຮ່ວມກັນຊຸກຍູ້ການຮ່ວມມືແບບຕ່າງຝ່າຍຕ່າງມີຜົນປະໂຫຍດ ແລະມີໝາກຜົນຫຼາຍກວ່າເກົ່າ ເພື່ອສ້າງຄວາມຜາສຸກໃຫ້ປະຊາຊົນຈີນ-ຣູອັນດາ ແລະປະຊາຊົນຈີນ-ອາຟຣິກາໃຫ້ຫຼາຍກວ່າເກົ່າ.
ທ່ານສີຈິ້ນຜິງເນັ້ນວ່າ: ຈີນ ແລະຣູອັນດາຕ້ອງພັດທະນາສາຍພົວພັນສອງຝ່າຍທາງຍຸດທະສາດ ແລະວິໄລທັດອັນກວ້າງໄກ, ເດັດດ່ຽວສະໜັບສະໜູນທາງເລືອກການພັດທະນາຢ່າງເປັນເຈົ້າຕົນເອງຂອງແຕ່ລະຝ່າຍ, ສືບຕໍ່ເຂົ້າໃຈ ແລະສະໜັບສະໜູນເຊິ່ງກັນ ແລະກັນທາງດ້ານຜົນປະໂຫຍດຕົ້ນຕໍ ແລະບັນຫາສຳຄັນທີ່ຕ່າງຝ່າຍຕ່າງມີຄວາມກັງວົນ. ຕ້ອງເພີ່ມທະວີການເຊື່ອມຕໍ່ຍຸດທະສາດການພັດທະນາ, ຊ່ວຍຊູຍູ້ໜູນທ່າແຮງທີ່ມີຢູ່ເຊິ່ງກັນ ແລະກັນ, ເປີດກວ້າງ ແລະລົງເລິກການຮ່ວມມືຕົວຈິງ. ຈີນຍິນດີຕ້ອນຮັບຣູອັນດາທີ່ຕັ້ງໜ້າເຂົ້າຮ່ວມການຮ່ວມມືສາກົນໃນການສ້າງ “ໜຶ່ງແລວໜຶ່ງເສັ້ນທາງ” ຮ່ວມກັນ, ສົ່ງເສີມວິສາຫະກິດຈີນໄປລົງທຶນຢູ່ຣູອັນດາ ແລະປະກອບສ່ວນເຈົ້າໃນການຫັນເປັນອຸດສາຫະກຳ ແລະທັນສະໄໝຂອງຣູອັນດາ. ຕ້ອງເພີ່ມທະວີການຮ່ວມມືແລກປ່ຽນດ້ານວັດທະນະທຳ, ຊຸກຍູ້ການເຊື່ອສານດ້ານຈິດໃຈລະຫວ່າງປະຊາຊົນສອງຊາດ ເພື່ອສ້າງພື້ນຖານທາງສັງຄົມ ເພື່ອມິດຕະພາບທີ່ດີໃນໄລຍະຍາວນານຈີນ-ຣູອັນດາ. ຕ້ອງເພີ່ມທະວີການຮ່ວມມືດ້ານການປະຕິບັດກົດໝາຍ ແລະຄວາມໝັ້ນຄົງ, ຮັດແໜ້ນການປະສານງານລະຫວ່າງສອງປະເທດໃນວຽກງານສາກົນ ແລະພາກພື້ນ, ເພີ່ມທະວີການປະສານສົມທົບແກ້ໄຂສິ່ງທ້າທາຍທີ່ໂລກພວມຜະເຊີນຢູ່, ປົກປັກຮັກສາຜົນປະໂຫຍດຮ່ວມກັນຂອງທະວີບອາຟຣິກາ ແລະປະເທດທີ່ກຳລັງພັດທະນາ.
ທ່ານກາກາເມກ່າວວ່າ: ຍິນດີຕ້ອນຮັບທ່ານສີຈິ້ນຜິງ ປະທານປະເທດຈີນຢ້ຽມຢາມຣູອັນດາ. ປະເທດຕົນຍ້ອງຍໍຊົມເຊີຍການຊ່ວຍເຫຼືອຈາກຈີນທາງດ້ານການກໍ່ສ້າງພື້ນຖານໂຄງລ່າງ, ກະສິກຳ, ການສຶກສາ ແລະອື່ນໆໃນໄລຍະຜ່ານມາ ເຊິ່ງເປັນການປະກອບສ່ວນສຳຄັນໃນການພັດທະນາ ແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ. ປະເທດຕົນຍິນດີຕັ້ງໜ້າເຂົ້າຮ່ວມການຮ່ວມມືໃນຂອບ “ໜຶ່ງແລວໜຶ່ງເສັ້ນທາງ”.
ຫຼັງຈັດການພົບປະແລ້ວ, ປະມຸກລັດສອງປະເທດໄດ້ເປັນສັກຂີພິຍານການເຊັນສັນຍາຮ່ວມມືລະຫວ່າງສອງຝ່າຍຫຼາຍສະບັບກ່ຽວກັບການກໍ່ສ້າງ “ໜຶ່ງແລວໜຶ່ງເສັ້ນທາງ” ຮ່ວມກັນ.
ຄຳເຫັນ
0