ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 24 ກໍລະກົດນີ້, ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານຊິຣີນ ຣາມາໂຟຊາ ປະທານາທິບໍດີອາຟຣິກາໃຕ້ຢູ່ນະຄອນຫຼວງປຣິໂຕເຣຍປະເທດອາຟຣິກາໃຕ້. ປະມຸກລັດສອງປະເທດຕີລາຄາສູງຕໍ່ມິດຕະພາບທີ່ມີມູນເຊື້ອລະຫວ່າງສອງປະເທດ, ແລະໄດ້ບັນລຸຄວາມເປັນເອກະພາບທີ່ສຳຄັນກ່ຽວກັບການຊຸກຍູ້ສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງຈີນແລະອາຟຣິກາໃຕ້ໃນຍຸກໃໝ່, ຮ່ວມກັນເຫັນດີເພີ່ມທະວີການໄປມາຫາສູ່ກັນລະຫວ່າງການນຳຂັ້ນສູງ, ລົງເລິກຄວາມໄວ້ເນື້ອເຊື່ອໃຈດ້ານການເມືອງ, ເຊື່ອມຕໍ່ຍຸດທະສາດການພັດທະນາ, ຊຸກຍູ້ການຮ່ວມມືທີ່ຕິດແທ້ຕົວຈິງແລະເຮັດໃຫ້ການແລກປ່ຽນດ້ານວັດທະນະທຳໃກ້ຊິດກັນກວ່າເກົ່າ.
ທ່ານສີຈິ້ນຜີງ ກ່າວວ່າ, ປີນີ້ແມ່ນປີຄົບຮອບ 20 ປີແຫ່ງການສ້າງຕັ້ງສາຍພົວພັນທາງການທູດລະຫວ່າງຈີນແລະອາຟຣິກາໃຕ້, ໃນ 20 ປີຜ່ານມາ, ການພົວພັນລະຫວ່າງສອງປະເທດໄດ້ບັນລຸການພັດທະນາແບບກ້າວກະໂດດທີ່ມີຄວາມໝາຍສຳຄັນຄືຈາກການພົວພັນຄູ່ຮ່ວມກາຍມາເປັນການພົວພັນຄູ່ຮ່ວມຍຸດທະສາດຈົນຮອດການພົວພັນຄູ່ຮ່ວມຍຸດທະສາດຮອບດ້ານ. ສອງຝ່າຍໄດ້ສ້າງການພົວພັນ “ຖານສະຫາຍອ້າຍນ້ອງ” ບົນຈິດໃຈມິດຕະພາບທີ່ແທ້ຈິງ, ໄວ້ເນື້ອເຊື່ອໃຈກັນແລະສະໜິດສະໜົມ. ປັດຈຸບັນ, ສັງຄົມນິຍົມທີ່ມີສີສັນພິເສດຂອງຈີນໄດ້ກ້າວເຂົ້າສູ່ຍຸກໃໝ່, ອາຟຣິກາໃຕ້ກໍໄດ້ເຂົ້າສູ່ຂະບວນການໃໝ່ໃນການສ້າງສາແລະພັດທະນາປະເທດຊາດ, ການພົວພັນລະຫວ່າງຈີນແລະອາຟຣິກາໃຕ້ພວມຢືນຢູ່ຈຸດເລີ່ມຕົ້ນປະຫວັດສາດໃໝ່.
ທ່ານສີຈິ້ນຜິງ ກ່າວເນັ້ນວ່າ, ຈີນແລະອາຟຣິກາໃຕ້ລ້ວນແຕ່ແມ່ນປະເທດໃຫຍ່ທີ່ພວມພັດທະນາແລະປະເທດຕະຫຼາດຈະເລີນໃໝ່ທີ່ມີບົດບາດສຳຄັນ, ສອງປະເທດມີຄວາມເຫັນແລະຈຸດຢືນຄ້າຍຄືກັນຕໍ່ບັນຫາສຳຄັນໃນພາກພື້ນແລະສາກົນໃນໂລກປັດຈຸບັນ, ສອງຝ່າຍຄວນສືບຕໍ່ເພີ່ມທະວີການປະສານງານຍຸດທະສາດ, ສະໜັບສະໜູນລັດທິຫຼາຍຝ່າຍ, ຮັກສາລະບົບການຄ້າຫຼາຍຝ່າຍ, ຊຸກຍູ້ໃຫ້ການພົວພັນສາກົນຫັນເປັນແບບປະຊາທິປະໄຕ, ຮ່ວມກັນຮັກສາຜົນປະໂຫຍດຮ່ວມຂອງຈີນແລະອາຟຣິກາໃຕ້, ຈີນແລະອາຟຣິກາກໍຄືປະເທດທີ່ພວມພັດທະນາ.
ທ່ານ ຣາມາໂຟຊາ ກ່າວວ່າ, ພາຍຫຼັງສອງປະເທດສ້າງສາຍພົວພັນທາງການທູດ 20 ປີມານີ້, ການພົວພັນລະຫວ່າງອາຟຣິກາໃຕ້ແລະຈີນໄດ້ປັບປຸງດີຂຶ້ນຢ່າງບໍ່ຢຸດຢັ້ງ, ມີຄວາມໝາຍຍຸດທະສາດທີ່ສຳຄັນ, ໄດ້ດຳເນີນການຮ່ວມມືໃນລະດັບພາກພື້ນແລະຫຼາຍຝ່າຍທີ່ມີຜົນງານອຸດົມສົມບູນ. ການພົວພັນມິດຕະພາບພິເສດລະຫວ່າງສອງປະເທດເຮັດໃຫ້ປະຊາຊົນສອງຊາດໄດ້ຮັບຜົນປະໂຫຍດຢ່າງແທ້ຈິງ. ຂ້າພະເຈົ້າແລະປະທານສີຈິ້ນຜິງພ້ອມກັນເຫັນດີສະໜັບສະໜູນແລະປະສານງານເຊິ່ງກັນແລະກັນພາຍໃຕ້ຂອບສາກົນຫຼາຍຝ່າຍເຊັ່ນອົງການສະຫະປະຊາຊາດແລະອື່ນໆ.
ຄຳເຫັນ
0