ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ເນື່ອງໃນໂອກາດການເຊັນ “ສົນທິນຍາສັນຕິພາບ-ມິດຕະພາບລະຫວ່າງຈີນກັບຍີ່ປຸ່ນ”ຄົບຮອບ 40 ປີ, ທ່ານຫຼີເຄີ້ສຽງ ນາຍົກລັດຖະມົນຕີຈີນແລະທ່ານຊິນໂຈະ ອະເບະ ນາຍົກລັດຖະມົນຕີຍີ່ປຸ່ນ ໄດ້ສົ່ງໂທລະເລກອວຍພອນແກ່ກັນ ໂດຍກ່າວວ່າຈະລົງເລິກການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ, ຊຸກຍູ້ການພົວພັນລະຫວ່າງຈີນ-ຍີ່ປຸ່ນໃຫ້ຂະຫຍາຍຕົວຢ່າງຍາວນານ ປອດໃສແລະໝັ້ນທ່ຽງ.
ການຮ່ວມມືທາງດ້ານເສດຖະກິດການຄ້າຈີນ-ຍີ່ປຸ່ນ, ໄດ້ເລີ່ມຕົ້ນໃນໂອກາດຈີນແລະຍີ່ປຸ່ນຟື້ນຟູສາຍພົວພັນທາງການທູດຄືນສູ່ສະພາບປົກກະຕິ. ຈາກນັ້ນມາບໍ່ດົນ, ຍີ່ປຸ່ນກໍກາຍເປັນປະເທດຄູ່ຄ້າທີ່ໃຫຍ່ກວ່າໝູ່ຂອງຈີນ. ຕົກມາຮອດປີ2007, ຍອດມູນຄ່າການຄ້າດ້ານສິນຄ້າປະເພດຈັບຕ້ອງໄດ້ລະຫວ່າງຈີນຍີ່ປຸ່ນບັນລຸເຖີງ 27.900 ພັນຕື້ເຢັນ, ຈີນລື່ນກາຍອາເມລິກາ ແລະກາຍເປັນປະເທດຄູ່ຄ້າໃຫຍ່ກວ່າໝູ່ຂອງຍີ່ປຸ່ນ.
ການພົວພັນຈີນ-ຍີ່ປຸ່ນຂະຫຍາຍຕົວຜ່ານມາ 40 ກວ່າປີ, ເຊິ່ງຈຸດພິເສດທີ່ເດັ່ນກວ່າໝູ່ກໍຄືເສດຖະກິດການຄ້າຂອງສອງປະເທດສະໜິດແໜ້ນທີ່ສຸດ. ນັບແຕ່ປີ2007ເປັນຕົ້ນມາ ຈີນເປັນປະເທດຄູ່ຄ້າໃຫຍ່ກວ່າໝູ່ຂອງຍີ່ປຸ່ນເປັນເວລາ 11 ປີລຽນຕິດ. ປີ2017, ຍອດມູນຄ່າການສົ່ງອອກສິນຄ້າປະເພດຈັບຕອງໄດ້ຂອງຍີ່ປຸ່ນຕໍ່ຈີນໄດ້ສ້າງສະຖິຕິໃໝ່ໃນປະຫວັດສາດ. ຂະນະທີ່ໃນ 6 ເດືອນຕົ້ນປີນີ້, ນັກທ່ອງທ່ຽວຈີນທີ່ໄປທ່ຽວຢູ່ຍີ່ປຸ່ນມີຫຼາຍກວ່າ 4 ລ້ານເທື່ອຄົນ, ເປັນອັນດັບທີໜຶ່ງໃນຈຳນວນນັກທ່ອງທ່ຽວຕ່າງປະເທດທີ່ໄປທ່ຽວຍີ່ປຸ່ນ. ຜູ້ຊ່ຽວຊານຍີ່ປຸ່ນກ່າວວ່າ, ສັງຄົມຍີ່ປຸ່ນໄດ້ເກີດຄວາມອີງອາໄສຕໍ່ເສດຖະກິດຈີນແລ້ວ.
ຈ້ອງມອງຕໍ່ອະນາຄົດ, ເມື່ອການພົວພັນທາງເສດຖະກິດການຄ້າຈີນ-ຍີ່ປຸ່ນໄດ້ຂະຫຍາຍຕົວໄປຄວບຄູ່ກັນຢ່າງໃຜປາສະຈາກໃຜກໍບໍ່ໄດ້ອີກແລ້ວ, ກໍຕ້ອງຍົກສູງຄຸນນະພາບແລະເລື່ອນລະດັບໃຫ້ສູງຂຶ້ນ. ເສດຖະກິດຈີນພັດທະນາຢ່າງໝັ້ນທ່ຽງ, ໄດ້ສ້າງໂອກາດການຄ້າອັນໃຫຍ່ຫຼວງໃຫ້ແກ່ວິສາຫະກິດຍີ່ປຸ່ນ, ແລະມີບົດບາດຕໍ່ການຈັດວາງຍຸດທະສາດໃນທົ່ວໂລກຂອງວິສາຫະກິດຍີ່ປຸ່ນ. ນອກນີ້, ຈີນມີລະດັບນຳໜ້າໂລກໃນຂົງເຂດປັນຍາປະດິດ, ການເງິນທາງອິນເຕີເນັດແລະອື່ນໆ, ຂະນະທີ່ຍີ່ປຸ່ນມີບົດຮຽນຢ່າງຫຼວງຫຼາຍໃນດ້ານການຜະລິດຊິບ, ການແພດການປິ່ນປົວແລະການລ້ຽງດູຜູ້ເຖົ້າຜູ້ແກ່ເປັນຕົ້ນ, ເຊິ່ງໄດ້ສະໜອງໂອກາດສຳຄັນແລະທິດການຮ່ວມມືໃຫ້ແກ່ສອງປະເທດໃນການຍົກສູງຄຸນນະພາບແລະເລື່ອນລະດັບຂອງການພົວພັນທາງເສດຖະກິດການຄ້າໃຫ້ສູງຂຶ້ນ.
ສິ່ງສຳຄັນກວ່ານັ້ນແມ່ນ ປະມຸກລັດຂອງສອງປະເທດໃຫ້ຄຳໝັ້ນສັນຍາວ່າຈະປະກອບສ່ວນເພື່ອຄວາມຈະເລີນຮຸ່ງເຮືອງແລະຄວາມໝັ້ນທ່ຽງຂອງພາກພື້ນແລະຂອງໂລກ, ນີ້ໄດ້ເປີກວ້າງວິໄສທັດການຍົກສູງຄຸນນະພາບແລະເລື່ອນລະດັບການພົວພັນເສດຖະກິດການຄ້າຈີນຍີ່ປຸ່ນໃຫ້ສູງຂຶ້ນ. ຂໍພຽງແຕ່ສອງປະເທດຍຶດຖືຫຼັກການຕ່າງຝ່າຍຕ່າງມີຜົນປະໂຫຍດ ກໍຈະສາມາດຍົກສູງຄຸນນະພາບແລະເລື່ອນລະດັບແຫ່ງການພົວພັນເສດຖະກິດການຄ້າຈີນຍີ່ປຸ່ນໃຫ້ສູງຂຶ້ນຢ່າງຕໍ່ເນື່ອງ, ແລະປະກອບສ່ວນໃໝ່ຕໍ່ຄວາມຈະເລີນຮຸ່ງເຮືອງແລະສະຖຽນລະພາບຂອງອາຊີແລະຕໍ່ການພັດທະນາໂດຍສັນຕິຂອງໂລກ.
ຄຳເຫັນ
0