ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນບ່າຍວັນທີ 16 ຕຸລານີ້, ທ່ານສີຈິ້ນຜິງ ປະທານປະເທດຈີນໄດ້ຈັດພິທີຕ້ອນຮັບເຈົ້າຊີວິດນອກແວ ແຮໂຣທີ V ຢູ່ສະໜາມຫຼວງຕາເວັນອອກຂອງຫໍສະພາປະຊາຊົນແຫ່ງຊາດຈີນ. ຫຼັງຈາກນັ້ນປະມຸກລັດສອງປະເທດໄດ້ພົບປະກັນ. ທ່ານສີຈິ້ນຜິງ ຍ້ອງຍໍຊົມເຊີຍເຈົ້າຊີວິດນອກແວແລະພະບໍລົມວົງສານຸວົງນອກແວທີ່ໄດ້ເອົາໃຈໃສ່ແລະສະໜັບສະໜູນການພົວພັນຈີນແລະນອກແວມາແຕ່ດົນນານ, ເປັນການປະກອບສ່ວນທີ່ສຳຄັນໃຫ້ແກ່ການຊຸກຍູ້ມິດຕະພາບລະຫວ່າງສອງປະເທດ.
ທ່ານສີຈິ້ນຜິງ ກ່າວວ່າ, ນັບແຕ່ການພົວພັນລະຫວ່າງຈີນແລະນອກແວຫັນເປັນປົກກະຕິເມື່ອປີ 2016 ມານີ້, ການນຳຂັ້ນສູງຂອງສອງປະເທດໄດ້ແລກປ່ຽນການຢ້ຽມຢາມກັນເລື້ອງໆ, ຄວາມໄວ້ເນື້ອເຊື່ອໃຈດ້ານການເມືອງນັບມື້ນັບເພີ່ມຂຶ້ນ, ການເຈລະຈາສັນຍາການຄ້າເສລີຈີນແລະນອກແວໄດ້ຮັບຄວາມຄືບໜ້າທີ່ດີ, ຂ້າພະເຈົ້າເຊື່ອວ່າ, ການຢ້ຽມຢາມຂອງພະອົງຄັ້ງນີ້ຈະເພີ່ມພະລັງແຮງໃໝ່ໃຫ້ແກ່ການຂະຫຍາຍການພົວພັນລະຫວ່າງຈີນແລະນອກແວໃນຍຸກໃໝ່, ແລະເປັນການບັນທຶກປະຫວັດສາດໜ້າໃໝ່ຂອງການພົວພັນມິດຕະພາບທີ່ມີມູນເຊື້ອລະຫວ່າງສອງປະເທດ.
ທ່ານສີຈິ້ນຜິງ ກ່າວຕື່ມວ່າ, ຈີນຍິນດີເພີ່ມທະວີການແລກປ່ຽນກັບນອກແວໃນຂົງເຂດກິລາລະດູໜາວ, ຍິນດີຕ້ອນຮັບນອກແວເພື່ອແລກປ່ຽນບົດຮຽນກັບຈີນແລະຊ່ວຍຊຸກຍູ້ວຽກງານກະກຽມງານໂອລິມປິກລະດູໜາວປັກກິ່ງ.
ພະບາດສົມເດັດ ແຮໂຣທີ V ກ່າວວ່າ, ຂ້າພະເຈົ້າດີໃຈຫຼາຍທີ່ໄດ້ຢ້ຽມຢາມຈີນທາງລັດຖະກິດອີກຄັ້ງໜຶ່ງ, ການຢ້ຽມຢາມຈີນຄັ້ງນີ້ສະແດງໃຫ້ເຫັນວ່າການພົວພັນລະຫວ່າງນອກແວກັບຈີນກັບຄືນສູ່ສະພາບປົກກະຕິ, ແລະມີຊີວິດຊີວາ.
ເຈົ້າຊີວິດນອກແວກ່າວຕື່ມວ່າ, ງານກິລາໂອລິມປິກປັກກິ່ງປີ 2008 ໄດ້ເຮັດໃຫ້ຂ້າພະເຈົ້າຮູ້ສຶກປະທັບໃຈຫຼາຍ, ນອກແວຍິນດີເພີ່ມທະວີການແລກປ່ຽນແລະຮ່ວມມືກັບຈີນກ່ຽວກັບກິລາລະດູໜາວ, ສະໜັບສະໜູນຈີນຈັດງານກິລາໂອລິມປິກລະດູໜາວປີ 2022 ໃຫ້ໄດ້ຮັບຜົນສຳເລັດ.
ຄຳເຫັນ
0