ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 20 ຕຸລານີ້, ທ່ານສີຈິ້ນຜິງ, ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດຈີນໄດ້ສົ່ງຈົດໝາຍຕອບໃຫ້ແກ່ນັກທຸລະກິດເອກະຊົນທີ່ໄດ້ຮັບການຍ້ອງຍໍໃນການເຄື່ອນໄຫວ “ໝື່ນວິສາຫະກິດຊ່ວຍເຫຼືອໝື່ນບ້ານ”, ໂດຍຕີລາຄາສູງຕໍ່ວິສາຫະກິດເອກະຊົນທີ່ໄດ້ປະກອບສ່ວນເຂົ້າໃນພາລະກິດຫຼຸດຜ່ອນຄວາມທຸກຍາກ, ແລະສົ່ງເສີມໃຫ້ນັກທຸລະກິດເອກະຊົນທົ່ວໄປຈົ່ງມີຄວາມໝັ້ນໃຈ, ແລະພັດທະນາວິສາຫະກິດໃຫ້ດີຢ່າງໜັກແໜ້ນ.
ທ່ານສີຈິ້ນຜິງກ່າວວ່າ, ເມື່ອເຫັນວິສາຫະກິດເອກະຊົນນັບມື້ນັບຫຼາຍຂຶ້ນຕັ້ງໜ້າແບກຫາບຄວາມຮັບຜິດຊອບທາງສັງຄົມ, ປະກອບສ່ວນເຂົ້າໃນພາລະກິດຫຼຸດຜ່ອນຄວາມທຸກຍາກຢ່າງຫ້າວຫັນ, ຊ່ວຍເຫຼືອປະຊາຊົນຜູ້ທຸກຍາກຢ່າງຫຼວງຫຼາຍແລະໃຫ້ເຂົາເຈົ້າດຳລົງຊີວິດດີຂຶ້ນເລື້ອຍໆ, ຂ້າພະເຈົ້າຮູ້ສຶກພູມໃຈຫຼາຍ.
ທ່ານຊີ້ວ່າ, ນັບແຕ່ຈີນດຳເນີນການປະຕິຮູບ ແລະເປີດປະຕູສູ່ພາຍນອກເປັນຕະຫຼອດ 40 ປີຜ່ານມາ, ວິສາຫະກິດເອກະຊົນໄດ້ພັດທະນາຢ່າງວ່ອງໄວ, ເສດຖະກິດພາກເອກະຊົນໄດ້ພັດທະນາເຕີບໃຫຍ່ ແລະເຂັ້ມແຂງຂຶ້ນ, ແລະໄດ້ເສີມຂະຫຍາຍບົດບາດອັນສຳຄັນໃນການຮັກສາການເຕີບໂຕຢ່າງໝັ້ນທ່ຽງ, ຊຸກຍູ້ການປະດິດສ້າງໃໝ່, ເພີ່ມຕຳແໜ່ງປະກອບອາຊີບ ແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ເຊິ່ງກາຍເປັນພະລັງແຮງທີ່ສຳຄັນໃນການຊຸກຍູ້ການພັດທະນາຂອງເສດຖະກິດສັງຄົມ. ການປະກອບສ່ວນທາງປະຫວັດສາດຂອງເສດຖະກິດພາກເອກະຊົນບໍ່ສາມາດລຶບໄປໄດ້, ຖານະບົດບາດຂອງເສດຖະກິດພາກເອກະຊົນແມ່ນບໍ່ຕ້ອງສົງໄສ, ຖ້ອຍຄຳ ຫຼື ການກະທຳໃດໆທີ່ປະຕິເສດ ຫຼື ຕີລາຄາຕ່ຳເສດຖະກິດພາກເອກະຊົນນັ້ນລ້ວນແຕ່ເປັນຄວາມຜິດພາດທັງນັ້ນ.
ທ່ານສີຈິ້ນຜິງກ່າວຕື່ມວ່າ, ການສະໜັບສະໜູນການພັດທະນາຂອງວິສາຫະກິດເອກະຊົນ, ເປັນທິດທາງຂອງສູນກາງພັກຢ່າງສະເໝີຕົ້ນສະເໝີປາຍ, ເຊິ່ງຈະບໍ່ມີການປ່ຽນແປງຢ່າງເດັດຂາດ. ຫວັງວ່ານັກທຸລະກິດເອກະຊົນອັນໄພສານຈົ່ງກຳແໜ້ນທ່າອ່ຽງລວມຂອງຍຸກສະໄໝ, ມີຄວາມໝັ້ນໃຈຕໍ່ການພັດທະນາ, ສຸມໃສ່ການປະດິດສ້າງໃໝ່, ພັດທະນາວິສາຫະກິດໃຫ້ດີຢ່າງໜັກແໜ້ນ, ຮ່ວມແຮງສ້າງອະນາຄົດອັນດີງາມກວ່າເກົ່າໃຫ້ແກ່ເສດຖະກິດພາກເອກະຊົນ, ປະກອບສ່ວນຫຼາຍກວ່າເກົ່າເຂົ້າໃນການບັນລຸຄວາມໃຝ່ຝັນຂອງຈີນທີ່ຟື້ນຟູຄວາມຈະເລີນຮຸ່ງເຮືອງທີ່ຍິ່ງໃຫຍ່ຂອງຊົນຊາດຈີນ.
ຄຳເຫັນ
0