ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ເວລາ 16 ໂມງຂອງວັນທີ 21 ຕຸລານີ້, ໄປພ້ອມໆກັບກຳປັ່ນສະໜັບສະໜູນດ້ານພະລາທິການ “ດາກູພານ” ຂອງກອງທັບເຮືອຟີລິບປິນເດີນທາງໄປເຖິງທ່າກຳປັ່ນຮົບແຫ່ງໜຶ່ງຂອງນະຄອນຈ້ານຈ່ຽງແຂວງກວາງຕຸ້ງ ສປ ຈີນ, ກຳປັ່ນຮົບປະເທດຕ່າງໆໄດ້ເດີນທາງມາເຕົ້າໂຮມກັນຮຽບຮ້ອຍແລ້ວເພື່ອກຽມພ້ອມທີ່ຈະເຂົ້າຮ່ວມການຊ້ອມຮົບຮ່ວມທາງທະເລຈີນ-ອາຊຽນ 2018.
ໃນນີ້, ຈີນຈະສົ່ງກຳປັ່ນສະກັດຂີປະນາວຸດ “ກວາງໂຈ່ວ”, ກຳປັ່ນປ້ອງກັນຂີປະນາວຸດ “ຮວງຊ່ານ”ແລະກຳປັ່ນລຳລຽງ “ຈຸ່ນຊ່ານຮູ”ເຂົ້າຮ່ວມການຊ້ອມຮົບຄັ້ງນີ້.
ການຊ້ອມຮົບຮ່ວມດັ່ງກ່າວຈະຈັດຂຶ້ນແຕ່ວັນທີ 22-28 ຕຸລານີ້ ໂດຍບັນດາຝ່າຍທີ່ເຂົ້າຮ່ວມຈະປິ່ນອ້ອມການປະຕິບັດລະບຽບການວ່າດ້ວຍການພົບພໍ້ກັນທາງທະເລໂດຍບັງເອີນ, ການຊອກຄົ້ນແລະຊ່ວຍເຫຼືອຮ່ວມ, ການກູ້ໄພຮ່ວມທາງທະເລແລະອື່ນໆເພື່ອດຳເນີນການແລກປ່ຽນແລະຝຶກຊ້ອມຈິງທາງການທະຫານ ຢູ່ເຂດທະເລຈ້ານຈ່ຽງພ້ອມດ້ວຍນ່ານຟ້າແລະເຂດທະເລຕາເວັນອອກ. ການຊ້ອມຮົບເທື່ອນີ້ເປັນການເຄື່ອນໄຫວຄັ້ງສຳຄັນໃນການຈັດຕັ້ງປະຕິບັດຄວາມເປັນເອກະພາບກັນລະຫວ່າງລັດຖະມົນຕີກະຊວງປ້ອງກັນປະເທດຈີນ-ອາຊຽນ, ລົງເລິກການຮ່ວມມືປ້ອງກັນຊາດແລະຮັກສາຄວາມໝັ້ນຄົງລະຫວ່າງຈີນ-ອາຊຽນ, ເພີ່ມທະວີຄວາມໄວ້ເນື້ອເຊື່ອໃຈກັນຂອງສອງຝ່າຍ, ເຊິ່ງຈະມີຜົນດີຕໍ່ການຊຸກຍູ້ສາຍພົວພັນທາງການທະຫານລະຫວ່າງຈີນກັບບັນດາປະເທດອາຊຽນ, ເພີ່ມທະວີການຮ່ວມມືດ້ານຄວາມໝັ້ນຄົງທາງທະເລ, ຍົກສູງຄວາມສາມາດໃນການຮ່ວມກັນຮັບມືກັບໄພຂົ່ມຂູ່ຕໍ່ຄວາມໝັ້ນຄົງ.
ຄຳເຫັນ
0