ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕາມຂ່າວCRI:ວັນທີ 7 ພະຈິກນີ້, ທ່ານສີຈິ້ນຜີງ, ປະທານປະເທດຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານຣີ ໂຢງ ໂຫ, ກຳມະການກົມການເມືອງສູນກາງພັກແຮງງານແຫ່ງ ສ.ປ.ປ ເກົາຫຼີ, ລັດຖະມົນຕີກະຊວງການຕ່າງປະເທດ ສປປ ເກົາຫຼີຢູ່ຫໍສະພາປະຊາຊົນແຫ່ງຊາດຈີນ.
ທ່ານສີຈິ້ນຜີງຊີ້ອອກວ່າ, ປີ 2018 ນີ້, ທ່ານກິມ ເຈິງ ອຸນ, ໄດ້ເດີນທາງມາຢ້ຽມຢາມຈີນ 3 ຄັ້ງ, ແລະຍິນດີທີ່ໄດ້ເຫັນວ່າຄວາມເຫັນທີ່ເປັນເອກະພາບກັນລະຫວ່າງສອງຝ່າຍທີ່ສຳຄັນຕ່າງໆໄດ້ຮັບການປະຕິບັດຢ່າງມີປະສິດທິຜົນ.
ທ່ານສີຈິ້ນຜີງກ່າວເນັ້ນວ່າ, ໃນປີ 2019 ແມ່ນການສ້າງຕັ້ງສາຍພົວພັນທາງການທູດລະຫວ່າງ ສປຈີນ - ສປປ ເກົາຫຼີ ຄົບຮອບ 70 ປີ. ພັກແລະລັດຖະບານຈີນໄດ້ໃຫ້ຄວາມສຳຄັນຢ່າງສູງຕໍ່ການພົວພັນລະຫວ່າງສປຈີນ-ສປປເກົາຫຼີ, ເຊິ່ງເປັນທິດທາງນະໂຍບາຍທີ່ໝັ້ນໜຽວບໍ່ປ່ຽນແປງຂອງຈີນ. ປັດຈຸບັນ, ການພົວພັນລະຫວ່າງຈີນ-ສປປເກົາຫຼີໄດ້ເຂົ້າສູ່ລະດັບໃໝ່. ສອງຝ່າຍຕ້ອງຖືການຈັດກິດຈະກຳສະຫຼອງການສ້າງຕັ້ງສາຍພົວພັນທາງການທູດຄົບຮອບ 70 ປີໃຫ້ດີເປັນໂອກາດເພື່ອຊຸກຍູ້ໃຫ້ການພົວພັນລະຫວ່າງສອງຝ່າຍ ພັດທະນາຢ່າງປອດໃສ, ໝັ້ນຄົງແລະຍາວນານ. ຈີນສະໜັບສະໜູນປະຊາຊົນ ສປປ ເກົາຫຼີຄົ້ນຫາເສັ້ນທາງການພັດທະນາທີ່ສອດຄ່ອງກັບສະພາບຕົວຈິງຂອງຕົນພາຍໃຕ້ການນຳພາຂອງທ່ານ ກິມ ເຈິງ ອຸນ, ປະທານຄະນະກຳມະການປ້ອງກັນປະເທດ ສປປ ເກົາຫຼີ.
ທ່ານສີຈິ້ນຜີງຊີ້ອອກວ່າ, ນັບແຕ່ປີນີ້ມາ, ສະຖານະການຂອງແຫຼມເກົາຫຼີມີການປ່ຽນແປງເປັນຢ່າງດີ, ບັນຫານິວເຄຼຍແຫຼມເກົາຫຼີໄດ້ກັບຄືນສູ່ວົງໂຄຈອນທີ່ຖືກຕ້ອງຄືການແກ້ໄຂທາງການເມືອງ. ຈີນກໍ່ຈະເຮັດຄືທີ່ຜ່ານມາສະໜັບສະໜູນໃຫ້ສອງຝ່າຍເກົາຫຼີເໜືອແລະໃຕ້ປັບປຸງສາຍພົວພັນໃຫ້ດີຂຶ້ນກວ່າກເກົ່າຊຸກຍູ້ການຮ່ວມມືໃນດ້ານປອງດອງກັນ.
ທ່ານຣີ ໂຢງ ໂຫກ່າວວ່າ, ສ.ປ.ປ ເກົາຫຼີຍິນດີຮ່ວມກັບຈີນ, ຈັດກິດຈະກຳສະຫຼອງການສ້າງຕັ້ງສາຍພົວພັນທາງການທູດລະຫວ່າງສອງປະເທດຄົບຮອບ 70 ປີລະໃຫ້ດີໃນປີ 2019 , ເພື່ອຮັດແໜ້ນມິດຕະພາບອັນເປັນມູນເຊື້ອ, ເພີ່ມທະວີການຮ່ວມມືສອງຝ່າຍ. ສປປ ເກົາຫຼີຈະສືບຕໍ່ພະຍາຍາມເຂົ້າໃນການບັນລຸການປອດນິວເຄຼຍຂອງແຫຼມເກົາຫຼີ, ຍິນດີຮັກສາການແລກປ່ຽນແລະການປະສານງານກັນຢ່າງໃກ້ຊິດກັບຈີນກ່ຽວກັບສັນຕິພາບແລະສະຖຽນລະພາບຂອງແຫຼມເກົາຫຼີກໍ່ຄືຂອງພາກພື້ນແຫ່ງນີ້.
ຄຳເຫັນ
0