ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 16 ທັນວານີ້, ທ່ານທອງລຸນ ສີສຸລິດ, ນາຍົກລັດຖະມົນຕີ ສປປລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານວາງຢີ້, ທີ່ປຶກສາແຫ່ງລັດ ທັງເປັນລັດຖະມົນຕີການຕ່າງປະເທດ ສປຈີນ.
ທ່ານວາງຢີ້ໄດ້ຝາກຄວາມຢື້ຢາມຖາມຂ່າວທີ່ອົບອຸ່ນຂອງທ່ານຫຼີເຄີ້ສຽງ, ນາຍົກລັດຖະມົນຕີຈີນຕໍ່ທ່ານທອງລຸນ ສີສຸລິດ. ທ່ານວາງຢີ້ກ່າວວ່າ, ພາຍໃຕ້ການນຳພາ ແລະການຊຸກຍູ້ຂອງຜູ້ນຳສູງສຸດຂອງສອງພັກສອງລັດ, ສາຍພົວພັນຈີນລາວໄດ້ພັດທະນາກ້າວສູ່ລວງເລິກຢ່າງວ່ອງໄວ. ສະຫາຍເລຂາທິການໃຫຍ່ສີຈິ້ນຜິງ ແລະ ສະຫາຍເລຂາທິການໃຫຍ່ບຸນຍັງ ວໍລະຈິດໄດ້ສະເໜີໃຫ້ສ້າງຄູ່ຮ່ວມຊາຕາກຳທີ່ມີຄວາມໝາຍຍຸດທະສາດຈີນລາວ, ເຊິ່ງສະແດງໃຫ້ເຫັນເຖິງສາຍພົວພັນຈີນລາວມີລັກສະນະພິເສດດ້ານສາຍພົວພັນສອງຝ່າຍ ແລະ ລັກສະນະຍຸດທະສາດດ້ານສາກົນ. ນີ້ກໍເປັນຄັ້ງທຳອິດທີ່ສ້າງຄູ່ຮ່ວມຊາຕາກຳລະຫວ່າງສອງປະເທດແຕ່ຈີນສະເໜີທັດສະນະປະຊາຄົມຮ່ວມຊາຕາກຳມວນມະນຸດເປັນຕົ້ນມາ, ເຊິ່ງມີຄວາມໝາຍທີ່ເປັນແບບຢ່າງທີ່ດີ. ຈີນຍິນດີຮ່ວມກັບລາວ, ຖືການຈັດຕັ້ງປະຕິບັດຄວາມເຫັນເປັນເອກພາບກັນລະຫວ່າງຜູ້ນຳສູງສຸດສອງປະເທດເປັນສາຍຫຼັກ, ຮັດແໜ້ນການໄປມາຫາສູ່ກັນລະຫວ່າງການນຳຂັ້ນສູງສອງຝ່າຍ, ແລະຊຸກຍູ້ການຮ່ວມມືຮອບດ້ານ.
ທ່ານວາງຢີ້ກ່າວຕື່ມວ່າ, ຈີນສະໜັບສະໜູນຄວາມພະຍາຍາມຂອງລາວໃນການຊຸກຍູ້ການພັດທະນາເສດຖະກິດສັງຄົມຂອງສອງປະເທດ, ຍິນດີຊຸກຍູ້ໃຫ້ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຂອງຈີນເຊື່ອມຈອດກັບ ຍຸດທະສາດ “ຫັນປະເທດບໍ່ມີຊາຍແດນຕິດກັບທະເລໃຫ້ເປັນປະເທດເຊື່ອມໂຍງໃນພາກພື້ນ”ຂອງລາວ, ເພື່ອບັນລຸຄວາມເປັນເອກະພາບກັນກ່ຽວກັບແຜນການຮ່ວມມືແລວເສດຖະກິດຈີນລາວໂດຍໄວ, ເພີ່ມທະວີຂີດຄວາມສາມາດພັດທະນາດ້ວຍຕົນເອງຂອງລາວ, ສຸມໃສ່ສ້າງທາງລົດໄຟຈີນລາວໃຫ້ດີ, ຊຸກຍູ້ພັດທະນາແລວເສດຖະກິດລຽບຕາມເສັ້ນທາງລົດໄຟຢ່າງເປັນລະບຽບ, ເຮັດໃຫ້ການຮ່ວມມືຕົວຈິງລະຫວ່າງສອງຝ່າຍໄດ້ຮັບໝາກຜົນຕົວຈິງຫຼາຍກວ່າເກົ່າ.
ທ່ານທອງລຸນ ສີສຸດລິດໄດ້ສະແດງຄວາມຍິນດີຕ້ອນຮັບຕໍ່ທ່ານວາງຢີ້ທີ່ມາຢ້ຽມຢາມລາວຢ່າງເປັນທາງການ. ທ່ານທອງລຸນກ່າວວ່າ, ລາວຈີນມີສາຍພົວພັນມິດຕະພາບ ແລະພິເສດ, ມີພື້ນຖານແຫ່ງຄວາມໄວ້ເນື້ອເຊື່ອໃຈທາງການເມືອງຢ່າງໜັກແໜ້ນ. ລາວຍິນດີຮ່ວມກັບຈີນກຳນົດ ແລະຈັດຕັ້ງປະຕິບັດວາລະການໄປມາຫາສູ່ກັນລະຫວ່າງສອງຝ່າຍທີ່ສຳຄັນໃນປີໜ້າ, ລົງເລິກການຮ່ວມມືຕົວຈິງໃນຂົງເຂດຕ່າງໆ. ປະຈຸບັນ, ສອງຝ່າຍພວມເລັ່ງລັດແລກປ່ຽນ ແລະປະສານງານກ່ຽວກັບແຜນການດຳເນີນງານກ່ຽວກັບສ້າງຄູ່ຮ່ວມຊາຕາກຳສອງປະເທດທີ່ມີຄວາມໝາຍຍຸດທະສາດ, ເຊື່ອໝັ້ນວ່າຈະຕົກລົງເປັນເອກະສັນກັນ ແລະລົງນາມໂດຍໄວຢ່າງແນ່ນອນ, ເຊິ່ງຈະເປັນການກຳນົດທິດທາງໃຫ້ແກ່ການຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ.
ຄຳເຫັນ
0