ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 16 ທັນວາ 2018ນີ້, ທີ່ນະຄອນຫຼວງພະບາງ ແຂວງຫຼວງພະບາງ ສປປ ລາວ ໄດ້ຈັດກອງປະຊຸມຂອບການຮ່ວມມືເຈົ້າໜ້າທີ່ອາວຸໂສແມ່ນໍ້າລ້ານຊ້າງ-ແມ່ນໍ້າຂອງຄັ້ງທີ 7 ໂດຍການເປັນປະທານຮ່ວມລະຫວ່າງທ່ານ ສົງການ ຫຼວງມຸນິທອນ ຫົວໜ້າກົມເສດຖະກິດກະຊວງການຕ່າງປະເທດ ສປປ ລາວ ແລະທ່ານ ເສິນ ສຽວຕົງ ຜູ້ຊ່ວຍລັດຖະມົນຕີກະຊວງການຕ່າງປະເທດ ສປ ຈີນ ມີບັນດາປະເທດລຸ່ມແມ່ນໍ້າຂອງຄື: ຫວຽດນາມ, ກໍາປູະເຈຍ,ໄທ ແລະມຽນມາ ເຂົ້າຮ່ວມ.
ໃນໂອກາດດັ່ງກ່າວ, ທ່ານ ສົງການ ຫຼວງມຸນິທອນ ຫົວໜ້າກົມເສດຖະກິດກະຊວງການຕ່າງປະເທດ ສປປ ລາວ ໄດ້ໃຫ້ຮູ້ວ່າ: ສໍາລັບກອງປະຊຸມຄັ້ງນີ້, ຈຸດປະສົງເພື່ອຖະແຫຼງຂ່າວຮ່ວມຂອງບັນດາລັດຖະມົນຕີຕ່າງປະເທດ ຊື່ງຈະຈັດຂຶ້ນໃນວັນທີ 17 ທັນວາ 2018 ນີ້. ໃນຖະແຫຼງການຮ່ວມມີບັນຫາສໍາຄັນເພື່ອທົບທວນການຈັດຕັ້ງປະຕິບັດໂຄງການຕ່າງໆທີ່ບັນດາຜູ້ນໍາໄດ້ຮັບຮອງເອົາຢູ່ກອງປະຊຸມສຸດຍອດຄັ້ງທີ 1 ແລະຄັ້ງທີ 2. ນອກຈາກນັ້ນກໍ່ຍັງມີບັນດາໂຄງການຢູ່ພາຍໃຕ້ກອງທຶນພິເສດຈຳນວນໜຶ່ງ ຊຶ່ງທຸກປະເທດສະມາຊິກ ໄດ້ມີໂຄງການເປັນຂອງຕົນເອງໃນການຈັດຕັ້ງປະຕິບັດ. ສຳລັບ ສປປ ລາວ ມີ 13 ໂຄງການ ໃນນັ້ນ, ມີໂຄງການທີ່ກໍາລັງຈັດຕັ້ງປະຕິບັດ, ຈໍານວນໜື່ງກໍ່ກໍາລັງກະກຽມຈັດຕັ້ງປະຕິບັດ. ພ້ອມກັນນັ້ນກໍ່ຍັງໄດ້ຮັບຊາບບັນດາໂຄງການໃໝ່ ຊື່ງຈະໄດ້ຮັບຮອງເອົາ ເພື່ອຈັດຕັ້ງປະຕິບັດໃນປີ 2019. ກອງປະຊຸມຍັງຈະປຶກສາຫາລືເຖິງທິດທາງການຮ່ວມມືໃນອະນາຄົດຂອງຂອບການຮ່ວມມືແມ່ນໍ້າລ້ານຊ້າງ-ແມ່ນໍ້າຂອງ ເພື່ອສືບຕໍ່ຂະຫຍາຍຂອບການຮ່ວມມືໃຫ້ກວ້າງຂວາງກວ່າເກົ່າ ເພື່ອພ້ອມກັນນຳເອົາຜົນປະໂຫຍດມາສູ່ບັນດາປະເທດແມ່ນ້ຳລ້ານຊ້າງ-ແມ່ນ້ຳຂອງ ໂດຍສະເພາະແມ່ນການຮ່ວມມືດ້ານເສດຖະກິດ ການເຊື່ອມໂຍງຢູ່ໃນພາກພື້ນ. ນອກຈາກນີ້, ເພື່ອເປັນການສືບຕໍ່ຈັດຕັ້ງປະບັດຂໍ້ຕົກລົງຂອງກອງປະຊຸມສຸດຍອດຂອງຜູ້ນຳຄັ້ງທີສອງຢູ່ນະຄອນຫຼວງພະນົມເປັນ ໃນປີ 2017. ໃນນາມເປັນປະທານຮ່ວມ ສປປ ລາວ ຈະສືບຕໍ່ຜັນຂະຫຍາຍຂໍ້ຕົກລົງຂອງຜູ້ນຳ ທັງເປັນການກະກຽມກອງປະຊຸມສຸດຍອດຄັ້ງທີ 3 ໃນປີ 2020 ທີ່ ສປປ ລາວຈະເປັນເຈົ້າພາບຈັດຂຶ້ນ ໂດຍຮ່ວມກັບ ສປ ຈີນ.
ຄຳເຫັນ
0