ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 16 ທັນວານີ້ຢູ່ນະຄອນຫຼວງວຽງຈັນ, ທ່ານບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດແຫ່ງ ສປປ ລາວໄດ້ຕ້ອນຮັບການເຂົ້າຢ້ຽມຄຳນັບຂອງທ່ານວາງຢີ້ ທີ່ປຶກສາແຫ່ງລັດທັງເປັນລັດຖະມົນຕີກະຊວງການຕ່າງປະເທດຈີນ.
ທ່ານວາງຢີ້ໄດ້ຝາກຄວາມຢື້ຢາມຖາມຂ່າວອັນສະໜິດສະໜົມຂອງທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນໄປເຖິງທ່ານບຸນຍັງ ວໍລະຈິດ. ທ່ານວາງຢີ້ກ່າວວ່າ, ທ່ານເລຂາທິການໃຫຍ່ສີຈິ້ນຜິງແລະທ່ານເລຂາທິການໃຫຍ່ບຸນຍັງວໍລະຈິດໄດ້ຮັກສາການແລກປ່ຽນຢ້ຽມຢາມກັນແລະປຶກສາຫາລືທາງຍຸດທະສາດຢ່າງໃກ້ຊິດ ເຊິ່ງໄດ້ເສີມຂະຫຍາຍບົດບາດສຳຄັນໃນການຊີ້ນຳທິດທາງພັດທະນາການພົວພັນສອງພັກແລະສອງລັດ. ຜູ້ນຳສອງປະເທດໄດ້ບັນລຸຄວາມເປັນເອກະພາບກັນສຳຄັນກ່ຽວກັບການຮ່ວມກັນສ້າງຄູ່ຮ່ວມຊາຕາກຳທີ່ມີຄວາມໝາຍທາງຍຸດທະສາດ ເຊິ່ງໄດ້ກຳນົດທິດທາງໃຫ້ແກ່ການພັດທະນາການພົວພັນລະຫວ່າງສອງປະເທດ. ປີໜ້າຈະເປັນປີຄົບຮອບ 10 ປີແຫ່ງການສ້າງຕັ້ງສາຍພົວພັນຄູ່ຮ່ວມມືຍຸດທະສາດຮອບດ້ານຈີນ-ລາວ. ຈີນຍິນດີຮ່ວມກັບລາວຈັດຕັ້ງປະຕິບັດໝາກຜົນຂອງການແລກປ່ຽນຢ້ຽມຢາມກັນລະຫວ່າງຜູ້ນຳສອງພັກ-ສອງລັດ, ຊຸກຍູ້ການຮ່ວມມືໃນຂົງເຂດຕ່າງໆລະຫວ່າງສອງປະເທດຢ່າງຮອບດ້ານ, ສ້າງອະນາຄົດທີ່ສອງປະເທດພັດທະນາຮ່ວມກັນແລະຈະເລີນຮຸ່ງເຮືອງຮ່ວມກັນ.
ທ່ານວາງຢີ້ຊີ້ໃຫ້ເຫັນວ່າ: ພວກເຮົາຍິນດີຮ່ວມກັບລາວເພີ່ມທະວີການໄປມາຫາສູ່ກັນລະຫວ່າງການນຳຂັ້ນສູງຂອງສອງພັກສອງລັດຕື່ມອີກ, ຮ່ວມກັນເລັ່ງລັດວາງແຜນການດຳເນີນງານເພື່ອສ້າງຄູ່ຮ່ວມຊາຕາກຳຈີນ-ລາວ, ວາງແຜນແມ່ບົດໄລຍະຍາວເພື່ອການຮ່ວມມືແລະພັດທະນາ ການພົວພັນສອງພັກສອງລັດ. ແລວເສດຖະກິດຈີນ-ລາວເປັນໂຄງການທີ່ເປັນຂີດໝາຍຂອງສອງປະເທດຮ່ວມກັນສ້າງ “ໜຶ່ງແລວໜຶ່ງເສັ້ນທາງ”, ຫວັງວ່າສອງຝ່າຍຈະບັນລຸຄວາມເປັນເອກະພາບກັນກ່ຽວກັບແຜນການຮ່ວມມືດັ່ງກ່າວໂດຍໄວ,ສຸມທຸກຄວາມພະຍາຍາມເພື່ອເຊັນສັນຍາໂດຍໄວເທົ່າທີ່ຈະໄວໄດ້.ສອງຝ່າຍຄວນຮ່ວມກັນຈັດກິດຈະກຳປີທ່ອງທ່ຽວຈີນ-ລາວ 2019 ໃຫ້ໄດ້ຮັບຜົນສຳເລັດທີ່ດີເພື່ອເພີ່ມມິດຕະພາບແລະຄວາມເຂົ້າໃຈກັນລະຫວ່າງປະຊາຊົນສອງຊາດ. ພວກເຮົາກໍຍິນດີສືບຕໍ່ຈັດຕັ້ງປະຕິບັດໂຄງການຊ່ວຍເຫຼືອທີ່ກ່ຽວຂ້ອງໃຫ້ດີເພື່ອສ້າງຜົນປະໂຫຍດຕົວຈິງໃຫ້ປະຊາຊົນລາວ.
ທ່ານບຸນຍັງ ວໍລະຈິດໄດ້ຂໍຜ່ານທ່ານວາງຢີ້ຝາກຄວາມຢື້ຢາມຖາມຂ່າວຢ່າງຈິງໃຈໄປເຖິງທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນ. ທ່ານບຸນຍັງ ວໍລະຈິດຢືນຢັນວ່າ ປັດຈຸບັນ,ການພົວພັນສອງພັກສອງລັດລາວ-ຈີນກຳລັງຢູ່ໃນໄລຍະທີ່ດີທີ່ສຸດ. ປີນີ້, ຂ້າພະເຈົ້າໄດ້ພົບປະກັບທ່ານເລຂາທິການໃຫຍ່ ປະທານປະເທດສີຈິ້ນຜິງຢ່າງສຳເລັດຜົນສອງຄັ້ງ ໂດຍໄດ້ບັນລຸຄວາມເປັນເອກະພາບກັນສຳຄັນກ່ຽວກັບການສ້າງຄູ່ຮ່ວມຊາຕາກຳລາວ-ຈີນ, ນີ້ຄືການພົວພັນແບບຮ່ວມກັນຜ່ານຜ່າຄວາມທຸກຍາກແລະຮ່ວມເປັນຮ່ວມຕາຍ. ທຸກຂັ້ນລາວ-ຈີນໄດ້ແລກປ່ຽນກັນໃນທຸກຂົງເຂດຢ່າງໃກ້ຊິດແລະຫຼວງຫຼາຍ. ຂ້າພະເຈົ້າເອງກໍຍິນດີເດີນທາງໄປຈີນເພື່ອເຂົ້າຮ່ວມກອງປະຊຸມເວທີປຶກສາຫາລືສຸດຍອດການຮ່ວມມືສາກົນ “ໜຶ່ງແລວໜຶ່ງເສັ້ນທາງ”ຄັ້ງທີ 2. ຂອບໃຈຈີນທີ່ໄດ້ໃຫ້ການຊ່ວຍເຫຼືອແລະສະໜັບສະໜູນຢ່າງເອື້ອເຟື້ອເຜື່ອແຜ່ໃນໄລຍະດົນນານມານີ້. ລາວໃຫ້ຄວາມສຳຄັນສູງຕໍ່ການສ້າງທາງລົດໄຟຈີນ-ລາວ ເຊິ່ງປັດຈຸບັນໂຄງການນີ້ໄດ້ປະຕິບັດໄປດ້ວຍດີ. ລາວຍິນດີຕ້ອນຮັບວິສາຫະກິດຈີນມາລົງທຶນພັດທະນາທຸລະກິດຢູ່ລາວໃຫ້ຫຼາຍກວ່າເກົ່າເພື່ອບັນລຸໃຫ້ຕ່າງຝ່າຍຕ່າງໄດ້ຮັບຜົນປະໂຫຍດນຳກັນ.
ຄຳເຫັນ
0