ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 3 ກຸມພານີ້, ສູນກາງພັກກອມມູນິດຈີນ ແລະ ຄະນະລັດຖະບານຈີນໄດ້ຈັດພິທີອວຍພອນປີໃໝ່ບຸນກຸດຈີນປີ 2019 ຢູ່ຫໍສະພາປະຊາຊົນທີ່ນະຄອນຫຼວງປັກກິ່ງ. ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດຈີນ, ປະທານຄະນະກຳມະການການທະຫານສູນກາງຈີນໄດ້ກ່າວຄຳປາໄສ, ໂດຍຕາງໜ້າສູນກາງພັກ ແລະ ຄະນະລັດຖະບານຈີນ, ອວຍພອນບຸນກຸດຈີນຕໍ່ປະຊາຊົນບັນດາເຜົ່າທົ່ວປະເທດ, ພີ່ນ້ອງຮ່ວມຊາດຮົງກົງ, ມາກາວ ແລະໄຕ້ຫວັນ, ກໍຄືຊາວຈີນຕ່າງດ້າວ.
ໃນການກ່າວຄຳປາໄສ, ທ່ານສີຈິ້ນຜິງກ່າວເນັ້ນວ່າ, ໃນ 1 ປີທີ່ຜ່ານມາ, ເສດຖະກິດຈີນໄດ້ເຕີບໂຕຢ່າງໝັ້ນທ່ຽງ, ການປະຕິຮູບ ແລະເປີດປະຕູສູ່ພາຍນອກໄດ້ມີຄວາມຄືບໜ້າໃໝ່, ການຫຼຸດຜ່ອນຄວາມທຸກຍາກໄດ້ຮັບປະສິດທິຜົນຢ່າງພົ້ນເດັ່ນ, ການປະຕິຮູບດ້ານວຽກງານປ້ອງກັນປະເທດ ແລະກອງທັບສືບຕໍ່ກ້າວສູ່ລວງເລິກ, ວຽກງານການຕ່າງປະເທດໃນຖານະປະເທດໃຫຍ່ທີ່ມີສີສັນພິເສດຂອງຈີນໄດ້ຂຽນປະຫວັດສາດໜ້າໃໝ່, ການຄຸ້ມຄອງພັກຢ່າງເຂັ້ມງວດ ແລະຮອບດ້ານໄດ້ຮັບການຊຸກຍູ້ປະຕິບັດກ້າວສູ່ລວງເລິກ, ໄດ້ຮັກສາສະຖຽນລະພາບທາງສັງຄົມ, ປະຊາຊົນມີຄວາມຮູ້ສຶກເພິ່ງພໍໃຈທີ່ໄດ້ຮັບຜົນປະໂຫຍດ, ຄວາມຮູ້ສຶກມີຄວາມສຸກ ແລະ ຄວາມຮູ້ສຶກມີຄວາມປອດໄພເພີ່ມຂຶ້ນຢ່າງຕໍ່ເນື່ອງ. ຜົນສຳເລັດທຸກຢ່າງໃນການພັດທະນາພາລະກິດຂອງພັກ ແລະ ທົ່ວປະເທດລ້ວນແຕ່ຍ້ອນຄວາມພະຍາຍາມຂອງປະຊາຊົນ. ຂໍແຕ່ພວກເຮົາອາໄສປະຊາຊົນຢ່າງໃກ້ຊິດ, ຄວາມຫຍຸ້ງຍາກໃດໆກໍສາມາດຜ່ານຜ່າໄດ້, ພາລະກິດຍິ່ງໃຫຍ່ຊ່ຳໃດກໍສາມາດສຳເລັດໄດ້.
ທ່ານສີຈິ້ນຜິງເນັ້ນວ່າ, ກະຕັນຍູຕໍ່ຮູ້ບຸນຄຸນຕໍ່ພໍ່ແມ່ ແລະ ຜູ້ອາວຸໂສໃນຄອບຄົວ, ຈົ່ງຮັກພັກດີຕໍ່ປະເທດຊາດ ເປັນມູນເຊື້ອອັນດີງາມຂອງຊົນຊາດຈີນ. ພວກເຮົາຕ້ອງສົ່ງເສີມຄວາມຮັກຄວາມແພງຕໍ່ຄອບຄົວ ແລະປະເທດຊາດໃນທົ່ວສັງຄົມ, ບຳລຸງກໍ່ສ້າງ ແລະປະຕິບັດຄ່ານິຍົມຕົ້ນຕໍຂອງສັງຄົມນິຍົມ, ສົ່ງເສີມລັດທິຮັກຊາດ, ລັດທິລວມໝູ່, ແລະຈິດໃຈສັງຄົມນິຍົມ, ສົ່ງເສີມເຊື່ອມໂຍງການຮັກຄອບຄົວ ແລະ ຮັກຊາດໃຫ້ເປັນເອກະພາບກັນ, ເຮັດໃຫ້ແຕ່ລະຄົນ ແລະແຕ່ລະຄອບຄົວປະກອບສ່ວນເຂົ້າໃນວົງຄະຍາຍາດທົ່ວຊົນຊາດຈີນ.
ທ່ານສີຈິ້ນຜິງຊີ້ອອກວ່າ, ແຕ່ບູຮານມາແລ້ວ, ປະຊາຊົນຈີນກໍສົ່ງເສີມຄວາມກະຕັນຍູຕໍ່ຜູ້ເຖົ້າ ແລະຮັກແພງຍາດພີ່ນ້ອງ. ປະຈຸບັນປະເທດຈີນໄດ້ເຂົ້າສູ່ສັງຄົມທີ່ອັດຕາຜູ້ອາຍຸສູງເພີ່ມຫຼາຍຂຶ້ນ. ຕ້ອງເຮັດໃຫ້ຜູ້ເຖົ້າມີຜູ້ລ້ຽງດູເບິ່ງແຍງ, ມີບ່ອນເພິ່ງພາອາໄສ, ມີຄວາມມ່ວນຊື່ນ ແລະ ມີຄວາມສະຫງົບໃຈ, ເຊິ່ງພົວພັນເຖິງຄວາມປອງດອງ ແລະ ຄວາມສະຫງົບຂອງສັງຄົມ. ພວກເຮົາຕ້ອງສົ່ງເສີມໃຫ້ເຄົາລົບຜູ້ເຖົ້າ, ຮັກແພງເອົາໃຈໃສ່ຜູ້ເຖົ້າ ແລະ ລ້ຽງດູຜູ້ເຖົ້າ, ອອກແຮງພັດທະນາວຽກງານກ່ຽວກັບຜູ້ເຖົ້າ, ເຮັດໃຫ້ຜູ້ເຖົ້າທັງຫຼາຍຈະໄດ້ຊົມໃຊ້ຊີວິດໄວຊະລາຢ່າງມີຄວາມສຸກ.
ທ່ານສີຈິ້ນຜິງກ່າວເນັ້ນຕື່ມວ່າ, ທົ່ວພັກ ທົ່ວກອງທັບ ແລະປະຊາຊົນບັນດາເຜົ່າທົ່ວປະເທດຈີນຕ້ອງສາມັກຄີກັນຢູ່ພາຍໃຕ້ການນຳພາອັນເຂັ້ມແຂງຂອງພັກກອມມູນິດຈີນ, ຮ່ວມແຮງຮ່ວມໃຈ, ບຸກບືນກ້າວໜ້າ, ເສີມສ້າງຊີວິດອັນດີງາມຂອງປະຊາຊົນຈີນດ້ວຍຄວາມດຸໝັ່ນຂະຫຍັນພຽນ, ສ້າງສາອະນາຄົດອັນດີງາມຂອງຊົນຊາດຈີນ, ສືບຕໍ່ກໍ່ສ້າງປະຊາຄົມຮ່ວມຊາຕາກຳມວນມະນຸດຮ່ວມກັບປະຊາຊົນບັນດາປະເທດໃນໂລກ.
ຄຳເຫັນ
0