ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານນິ້ງຈີເຈີ ຮອງປະທານຄະນະກຳມະການພັດທະນາແລະປະຕິຮູບແຫ່ງຊາດຈີນໄດ້ເດີນທາງຢ້ຽມຢາມລາວແຕ່ວັນທີ 18-21 ກຸມພານີ້ ເພື່ອຈັດຕັ້ງປະຕິບັດຕາມຄວາມຮັບຮູ້ທີ່ເປັນເອກະພາບກັນຂອງຜູ້ນຳສອງປະເທດກ່ຽວກັບການຮ່ວມກັນສ້າງແລວທາງເສດຖະກິດຈີນ-ລາວ, ສຸມໃສ່ສ້າງທາງລົດໄຟຈີນ-ລາວ, ຊຸກຍູ້ການຮ່ວມມືດ້ານຄວາມສາມາດການຜະລິດລະຫວ່າງສອງປະເທດຢ່າງໜັກແໜ້ນ.
ໃນໄລຍະຢ້ຽມຢາມລາວ, ທ່ານນິ້ງຈີເຈີໄດ້ເຂົ້າຢ້ຽມຄຳນັບທ່ານ ທອງລຸນ ສີສຸລິດ ນາຍົກລັດຖະມົນຕີລາວ, ທ່ານສົມດີ ດວງດີ ຮອງນາຍົກລັດຖະມົນຕີລາວ ແລະໄດ້ປຶກສາຫາລືກັບທ່ານສຸພັນ ແກ້ວມີໄຊ ລັດຖະມົນຕີກະຊວງແຜນການແລະການລົງທຶນລາວກໍຄື ພາກສ່ວນທີ່ກ່ຽວຂ້ອງຂອງຝ່າຍລາວໃນການສ້າງແລວທາງເສດຖະກິດຈີນ-ລາວເຊັ່ນ ກະຊວງພະລັງງານແລະບໍ່ແຮ່, ກະຊວງກະສິກຳ-ປ່າໄມ້, ສະຖາບັນຄົ້ນຄວ້າເສດຖະກິດແຫ່ງຊາດລາວແລະອື່ນໆ.ນອກນີ້, ທ່ານຍັງໄດ້ພົບປະກັບທ່ານເຂັມມະນີ ພົນເສນາ ປະທານຄະນະກຳມະການການຮ່ວມມືລາວ-ຈີນ, ລັດຖະມົນຕີກະຊວງອຸດສາຫະກຳແລະການຄ້າ ແລະທ່ານສັນຕິສຸກ ສິມມາລາວົງ ຮອງລັດຖະມົນຕີກະຊວງໂຍທາທິການແລະຂົນສົ່ງ. ນອກນີ້, ທ່ານນິ້ງຈີເຈີ ຍັງໄດ້ເດີນທາງຢ້ຽມຢາມແລະສຳຫຼວດສະຖານທີ່ສ້າງທາງລົດໄຟຈີນ-ລາວ ກໍຄືຫ້ອງການຊີ້ນຳການປະຕິບັດໂຄງການກໍ່ສ້າງທາງດ່ວນວຽງຈັນ-ວັງວຽງ.
ທ່ານຈ່ຽງຈ້າຍຕຸ່ງ ເອກອັກຄະລັດຖະທູດຈີນປະຈຳລາວ, ຜູ້ຮັບຜິດຊອບກ່ຽວຂ້ອງຂອງບໍລິສັດທາງລົດໄຟຈີນ,ທະນາຄານຂາເຂົ້າຂາອອກຈີນ, ສູນແລກປ່ຽນເສດຖະກິດສາກົນ,ຄະນະກຳມະການພັດທະນາແລະປະຕິຮູບແຂວງຢູນນານໄດ້ຮ່ວມເດີນທາງຢ້ຽມຢາມລາວໃນຄັ້ງນີ້.
ຄຳເຫັນ
0