ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 18 ມິຖຸນານີ້, ຂ່າວສານລອຍເຕີລາຍງານວ່າ: ວັນທີ 17 ມິຖຸນາຜ່ານມາ, ທ່ານ ມາໂຄ ຣູບີໂອ ສະມາຊິກສະພາສູງອາເມຣິກາໄດ້ສະເໜີຍັດຕິ ໂດຍຮຽກຮ້ອງໃຫ້ດັດແກ້ກົດໝາຍວ່າດ້ວຍການໃຫ້ສິດປ້ອງກັນປະເທດອາເມຣິກາ ເພື່ອຢັບຢັ້ງຫ້າມບໍລິສັດຫົວເຫວີຍຂອງຈີນຂໍເອົາຄ່າສິດທິບັດແລະຄ່າທົດແທນຄວາມເສຍຫາຍນຳວິສາຫະກິດອາເມຣິກາໂດຍຜ່ານສານອາເມຣິກາ.
ໃນຖານະເປັນບຸກຄົນຫົວຮຸນແຮງຕໍ່ຕ້ານຈີນທີ່ສຸດພາຍໃນພັກສາທາລະນະລັດຂອງອາເມຣິກາ, ທ່ານ ຣູບີໂອ ມັກຕຳໜິຕິຕຽນຈີນວ່າ “ຂີ້ລັກ” ຊັບສິນທາງປັນຍາຂອງອາເມຣິກາ ແລະໄດ້ອອກແຮງໂຄສະນາຊວນເຊື່ອວ່າ, ຫົວເຫວີຍເປັນໄພຂົ່ມຂູ່ຢ່າງຮ້າຍແຮງຕໍ່ຄວາມໝັ້ນຄົງຂອງອາເມຣິກາ. ແຕ່ເມື່ອບໍລິສັດຫົວເຫວີຍດຳເນີນການປົກປັກຮັກສາສິດທິຜົນປະໂຫຍດຢ່າງສົມເຫດສົມຜົນ ໂດຍຮຽກຮ້ອງໃຫ້ບໍລິສັດເວີຣິຊົນ ເຊິ່ງເປັນບໍລິສັດໂທລະຄົມເຄື່ອນທີ່ຂອງອາເມຣິກາຈ່າຍຄ່ານຳໃຊ້ສິດທິບັດ 230 ກວ່າສະບັບເປັນຈຳນວນເງິນຫຼາຍກວ່າ 1 ຕື້ໂດລາສະຫະລັດນັ້ນ, ທ່ານ ຣູບີໂອ ທຳທ່າຫຼົງລືມຂໍ້ຄວາມທີ່ເຄີຍໃສ່ຮ້າຍປ້າຍສີແບບປ່ວງບ້າຂອງຕົນຕໍ່ປະເທດຈີນທີ່ວ່າ “ຂີ້ລັກ” ຊັບສິນທາງປັນຍາຂອງອາເມຣິກາ, ຊ້ຳບໍ່ໜຳ ຍັງໄດ້ກ່າວໂຈມຕີວ່າ ບໍລິສັດຫົວເຫວີຍແມ່ນ “ນັກເລງສິດທິບັດ”, ຈົນກະທັ້ງສະເໜີທັນທີໃຫ້ດັດແກ້ກົດໝາຍເພື່ອຢັບຢັ້ງບໍ່ໃຫ້ບໍລິສັດຫົວເຫວີຍຂໍເອົາຄ່າສິດທິບັດ. ນີ້ແມ່ນການກະທຳຫຼົບລີ້ນປິ້ນຄວາມທີ່ໄຮ້ຈັນຍາທຳ ເຊິ່ງສະແດງໃຫ້ເຫັນວ່າ, ບຸກຄົນຫົວຮຸນແຮງທ່ານນີ້ມີນະໂຍບາຍສອງໜ້າໃນບັນຫາຊັບສິນທາງປັນຍາ ນັ້ນກໍຄື: ໜ້າໜຶ່ງເມື່ອວິສາຫະກິດຕ່າງປະເທດນຳໃຊ້ສິດທິບັດຂອງອາເມຣິກາ, ກໍເວົ້າເຖິງຄວາມສຳຄັນໃນການປົກປ້ອງຊັບສິນທາງປັນຍາຂອງອາເມຣິກາ; ແຕ່ອີກໜ້າໜຶ່ງ ເມື່ອວິສາຫະກິດອາເມຣິການຳໃຊ້ສິດທິບັດຂອງປະເທດອື່ນ, ທ່ານກໍຈະປ່ຽນທ່າທີ ແລະກ່າວເຖິງຜົນປະໂຫຍດດ້ານການເມືອງເທົ່ານັ້ນ.
ແນ່ນອນແລ້ວ, ການກ່າວໂຈມຕີຈີນຂອງມາໂຄ ຣຸບິໂອ ບໍ່ພຽງແຕ່ແນໃສ່ບັນຫາຊັບສິນທາງປັນຍາເທົ່ານັ້ນ. ເລີ່ມແຕ່ລາວເຂົ້າເປັນສະມາຊິກສະພາສູງເມື່ອປີ 2011 ມານີ້, ລາວໄດ້ຕັ້ງຕິດເຄື່ອງໝາຍທາງການເມືອງທີ່ຈະແຈ້ງທີ່ສຸດໃຫ້ແກ່ຕົນເອງດ້ວຍການກະທຳຕ່າງໆ. ໃນຖານະເປັນ “ດາວເດັ່ນທາງການເມືອງ” ຄົນໃໝ່ຂອງພັກສາທາລະນະລັດ, ຣຸບີໂອ ອາຍຸ 48 ປີໃນປີນີ້ບໍ່ພຽງແຕ່ມີທ່າທີແຂງກະດ້າງທີ່ສຸດໃນຫຼັກໝັ້ນທາງການເມືອງ, ຍັງມີທ່າທີຕໍ່ຕ້ານປະເທດຈີນຢ່າງໜັກໜ່ວງ, ທັງມີຄວາມທະເຍີທະຍານທາງການເມືອງຢ່າງຫຼວງຫຼາຍ. ປີ 2016, ລາວເຄີຍສະໝັກເຂົ້າຮ່ວມເລືອກຕັ້ງປະທານາທິບໍດີອາເມຣິກາ, ແຕ່ເສຍໄຊໃນການເລືອກຕັ້ງຮອບທຳອິດພາຍໃນພັກສາທາລະນະລັດ. ແຕ່ວ່າຣຸບີໂອບໍ່ຍອມຕໍ່ຄວາມປະລາໄຊ, ລາວໄດ້ສະເໜີຍັດຕິຕໍ່ຕ້ານປະເທດຈີນຢູ່ເລື້ອຍໆເພື່ອສ້າງຄວາມສົນໃຈໃຫ້ກັບຕົນເອງ, ແລະສ້າງພາບພົດໃນລັກສະນະ “ຜູ້ຮັກຊາດ”.
ແຕ່ວ່າ, ເລຫຼ່ຽມສອງໜ້າທີ່ຕ່ຳຕ້ອຍແບບນີ້ຂອງລາວ, ຄົນທັງຫຼາຍລ້ວນແຕ່ເຂົ້າໃຈໄດ້ເປັນຢ່າງດີວ່າ: ລາວໄດ້ສ້າງເລື່ອງເປັນການທຳລາຍປະເທດໂດຍອ້າງຄວາມຮັກຊາດ, ທີ່ຈິງແລ້ວສິ່ງທີ່ລາວເຮັດນັ້ນລ້ວນແຕ່ໄດ້ທຳລາຍພາບພົດຂອງອາເມຣິກາ. ຄົນແບບນີ້ທີ່ມີທັງແນວຄິດ, ການກະທຳແລະຖ້ອຍຄຳແບບຫົວຮຸນແຮງ, ພວມສວຍໃຊ້ຜົນປະໂຫຍດຂອງປະຊາຊົນອາເມຣິກາເພື່ອບັນລຸເປົ້າໝາຍທາງການເມືອງຂອງຕົນ, ຄວາມທະເຍີທະຍານຂອງລາວຈະຖືກປະຊາຊົນອາເມຣິການັບມື້ນັບເຫັນໄດ້ຢ່າງຈະແຈ້ງ.
ຄຳເຫັນ
0