ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານເດນຟິນ ໂລເຣນຊານາ ລັດຖະມົນຕີກະຊວງປ້ອງກັນປະເທດຟິລິບປິນກ່າວໃນວັນທີ 19 ມິຖຸນານີ້ວ່າ: ຕົນໄດ້ສັ່ງໃຫ້ກອງທັບຟິລິບປິນຊອກຄົ້ນຫາຊາວປະມົງມາເລເຊຍ 10 ຄົນຢູ່ແຂວງຊູລູ ແລະ ເຂດຕາວີ-ຕາວີ ທາງພາກໃຕ້ຂອງຟິລິບປິນ ທີ່ເຊື່ອກັນວ່າ: ຊາວປະມົງດັ່ງກ່າວໄດ້ຖືກກຸ່ມປະກອບອາວຸດອາບູຊາຢັບລັກພາຕົວໃນວັນທີ 18 ເດືອນດຽວກັນ.
ທ່ານໂລເຣນຊານາ ກ່າວຕື່ມວ່າ: ເຈົ້າໜ້າທີ່ທະຫານຟິລິບປິນໄດ້ຮູ້ຂ່າວວ່າ ກຸ່ມປະກອບອາວຸດອາບູຊາຢັບພ້ອມຜູ້ຖືກລັກພາຕົວພວມຢູ່ລະຫວ່າງການເດີນທາງໄປສູ່ເຂດຕາວີ-ຕາວີ ຫຼື ແຂວງຊູລູ, ປັດຈຸບັນ, ກອງທັບຟິລິບປິນໄດ້ອອກໄປປະຕິບັດການແລ້ວ ເພື່ອຕິດຕາມຄວບຄຸມແລະກວດຄົ້ນຢ່າງຮັດກຸມຢູ່ບໍລິເວນທີ່ກຸ່ມປະກອບອາວຸດອາບູຊາຢັບອາດຈະເດີນທາງຜ່ານ.
ຂ່າວລາຍງານວ່າ ນັບແຕ່ວັນທີ 18 ມິຖຸນາເປັນຕົ້ນມາ, ກອງທັບຟິລິບປິນໄດ້ກວດຄົ້ນເປັນບໍລິເວນກວ້າງຕະຫຼອດເວລາ 24 ຊົ່ວໂມງຢູ່ເຂດແຄວ້ນດັ່ງກ່າວ, ແຕ່ຈົນຮອດປັດຈຸບັນກໍຍັງບໍ່ສາມາດຄົ້ນພົບຜູ້ຖືກລັກພາຕົວເຫຼົ່ານີ້ໄດ້ເທື່ອ.
ສື່ມວນຊົນມາເລເຊຍລາຍງານວ່າ ຊາວປະມົງ 10 ຄົນດັ່ງກ່າວໄດ້ຖືກກຸ່ມປະກອບອາວຸດອາບູຊາຢັບລັກພາຕົວໃນຂະນະທີ່ແລ່ນເຮືອຜ່ານເຂດທະເລທາງພາກຕາເວັນອອກສຽງເໜືອຂອງເກາະກາລີມັນຕັນໃນເວລາປະມານ 2:00 ໂມງຂອງວັນທີ 18 ມິຖຸນານີ້ ເຊິ່ງໃນເວລາເກີດເຫດ, ໃນເຮືອປະມົງ 2 ລຳມີຊາວປະມົງ 16 ຄົນ, ໃນນີ້ມີ 6 ຄົນສາມາດເອົາຕົວຫຼົບໜີອອກມາໄດ້.
ຄຳເຫັນ
0