ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຫວ່າງກ່ອນນີ້ບໍ່ດົນ ຢູ່ຕະຫຼາດພັນທະບັດອາເມຣິກາ ໄດ້ເກີດມີປາກົດການຜິດປົກກະຕິທີ່ອັດຕາຜົນຕອບແທນຂອງພັນທະບັດໄລຍະ 10 ປີຕ່ຳກວ່າໄລຍະ 2 ປີ, ນັກລົງທຶນເຫັນວ່າ ນີ້ແມ່ນສັນຍານເຕືອນໄພທີ່ສຳຄັນທີ່ຈະບົ່ງບອກວ່າເສດຖະກິດອາເມຣິກາກຳລັງຈະຊຸດໂຊມລົງ. ຕໍ່ເລື່ອງນີ້, ທີ່ປຶກສາທັງຫຼາຍຂອງທຳນຽບຂາວອາເມຣິກາໄດ້ໃຫ້ສຳພາດໃນຫຼາຍລາຍການໃນວັນທີ 18 ສິງຫານີ້ ເພື່ອຊ່ວຍກັນປ່າວຂ່າວວ່າ “ບໍ່ເຫັນສັນຍານວ່າເສດຖະກິດອາເມຣິກາຈະຊຸດໂຊມລົງແຕ່ຢ່າງໃດ”. ແຕ່ວ່າຂໍ້ມູນທາງເສດຖະກິດຫຼ້າສຸດແລະສຽງຄັດຄ້ານຕໍ່ການຂຶ້ນພາສີພາຍໃນປະເທດອາເມຣິກາ ໄດ້ຢັ້ງຢືນໃຫ້ເຫັນວ່າ: ບາງຄົນໃນອາເມຣິກາໄດ້ນຳໃຊ້ບາດຄ້ອນທາງພາສີນັ້ນ ໄດ້ເຮັດໃຫ້ອາເມຣິກາຜະເຊີນກັບຄວາມສ່ຽງທີ່ເສດຖະກິດຈະຊຸດໂຊມລົງຢ່າງຮຸນແຮງກວ່າເກົ່າ.
ໂດຍທົ່ວໄປແລ້ວ, ພັນທະບັດມີໄລຍະແຮ່ງຍາວ ກໍຈະໄດ້ຮັບຜົນຕອບແທນແຮ່ງຫຼາຍ, ຖ້າຫາກວ່າອັດຕາຜົນຕອບແທນຂອງພັນທະບັດໄລຍະຍາວພັດຕ່ຳກວ່າໄລຍະສັ້ນ ກໍຖືວ່າ: ເສັ້ນປາລາໂບນຂອງອັດຕາຜົນຕອບແທນ “ປິ້ນກັບກັນ” ເຊິ່ງເປັນສັນຍານບົ່ງບອກວ່າ ເສດຖະກິດກຳລັງຈະຊຸດໂຊມລົງໃນອີກ 12 ເດືອນຕໍ່ໜ້າ. ໃນຮອບ 50 ປີຜ່ານມາ, ກ່ອນເສດຖະກິດອາເມຣິກາຈະຊຸດໂຊມລົງທຸກເທື່ອ ລ້ວນແຕ່ເຄີຍເກີດມີປາກົດການທີ່ອັດຕາຜົນຕອບແທນຂອງພັນທະບັດ “ປິ້ນກັບກັນ”. ນັບແຕ່ຕົ້ນປີນີ້ເປັນຕົ້ນມາ, ຢູ່ອາເມຣິກາໄດ້ເກີດປາກົດການທີ່ຜິດປົກກະຕິໃນລັກສະນະດັ່ງກ່າວຫຼາຍເທື່ອ, ໂດຍສະເພາະແມ່ນວັນທີ 14 ສິງຫາຜ່ານມາ, ອັດຕາຜົນຕອບແທນຂອງພັນທະບັດໄລຍະ 10 ປີໄດ້ຕ່ຳກວ່າໄລຍະ 2 ປີ ເຊິ່ງເປັນຄັ້ງທຳອິດນັບແຕ່ປີ 2007 ເປັນຕົ້ນມາ, ຈຶ່ງເຮັດໃຫ້ນັກລົງທຶນເກີດຄວາມຮູ້ສຶກສະທ້ານຢ້ານກົວ, 3 ດັດຊະນີຫຸ້ນຂອງອາເມຣິກາໄດ້ຫຼຸດລົງປະມານ 3% ໃນມື້ດັ່ງກ່າວ. ທ່ານ ນີໂກລັສ ອາກິນສ໌ CEO ຂອງບໍລິສັດໄຟຟ້າອາເມຣິກາກ່າວວ່າ: “ນີ້ເກືອບເປັນສັນຍານທີ່ສະແດງໃຫ້ເຫັນວ່າເສດຖະກິດກຳລັງຈະຊຸດໂຊມລົງ ເຊິ່ງຄືກັນກັບປຶ້ມແບບຮຽນທີ່ບັນທຶກໄວ້.” ທ່ານ ຣີຊາດ ເບີນສະຕານ ຜູ້ກໍ່ຕັ້ງບໍລິສັດໃຫ້ຄຳປຶກສາໄດ້ຊີ້ໃຫ້ເຫັນວ່າ: ການທີ່ເສດຖະກິດອາເມຣິກາເຕີບໂຕຊ້າລົງນັ້ນ ອາດຈະໜັກໜ່ວງກວ່າການຄາດຄະເນຂອງຫຼາຍໆ.
ການເຕືອນໄພເຫຼົ່ານີ້ບໍ່ແມ່ນຄວາມເວົ້າເກີນຄວາມເປັນຈິງ, ເພາະວ່າມີຂໍ້ມູນສະຖິຕິດ້ານເສດຖະກິດໄດ້ຊີ້ໃຫ້ເຫັນວ່າ: ເສດຖະກິດອາເມຣິກາໄດ້ເຂົ້າສູ່ສະພາບຂາລົງ ແລະມີທ່າອ່ຽງຊຸດໂຊມນັບມື້ນັບເຫັນໄດ້ຢ່າງຈະແຈ້ງ.
ເບິ່ງຕາມຈັງຫວະການເຕີບໂຕດ້ານເສດຖະກິດແລ້ວເຫັນວ່າ: ຈັງຫວະການເຕີບໂຕຂອງລວມຍອດຜະລິດຕະພັນພາຍໃນ ຫຼື GDP ຂອງອາເມຣິກາໃນໄຕມາດ 1 ປີ 2019 ແມ່ນ 3,1%, ແຕ່ໃນໄຕມາດ 2 ຫຼຸດລົງຍັງເຫຼືອ 2,1% ແລະຄາດວ່າຈະຫຼຸດລົງອີກຍັງເຫຼືອພຽງ 1,5% ໃນໄຕມາດ 3. ທະນາຄານກາງອາເມຣິກາໄດ້ຄາດຄະເນວ່າ: ຈັງຫວະການເຕີບໂຕຂອງ GDP ອາເມຣິກາໃນປີ 2019 ຈະບັນລຸ 2,1% ແລະຈະບັນລຸ 2,0% ໃນປີ 2020, ຕ່ຳກວ່າ 2,9% ທີ່ບັນລຸໄດ້ໃນປີ 2018 ຈຶ່ງເຫັນໄດ້ຢ່າງຈະແຈ້ງເຖິງທ່າອ່ຽງດ້ານເສດຖະກິດຫຼຸດລົງ.
ເພື່ອເບິ່ງການສົ່ງອອກນຳເຂົ້າ, ກະຊວງການຄ້າອາເມຣິກາໄດ້ເປີດເຜີຍຂໍ້ມູນສະຖິຕິວ່າ: ໃນ 6 ເດືອນຕົ້ນປີນີ້, ມູນຄ່າການສົ່ງອອກນຳເຂົ້າຂອງອາເມຣິກາໄດ້ຫຼຸດລົງ 0,2% ເມື່ອທຽບໃສ່ກັບໄລຍະດຽວກັນຂອງປີ 2018, ໃນນັ້ນ, ມູນຄ່າການສົ່ງອອກຫຼຸດລົງ 1%. ການປະກອບສ່ວນຕໍ່ GDP ຂອງການສົ່ງອອກຂອງອາເມຣິກາໃນໄຕມາດ 2 ແມ່ນ -0,6%. ຂະນະດຽວກັນ, ໃນເດືອນກໍລະກົດຜ່ານມານີ້, ດັດສະນີຜູ້ຈັດການຝ່າຍຈັດຊື້ຂອງ IHS Markit ອາເມຣິກາ ໄດ້ຫຼຸດເຖິງຈຸດຕ່ຳສຸດນັບແຕ່ເດືອນກັນຍາປີ 2009 ເປັນຕົ້ນມາ ເຊິ່ງໄດ້ຊີ້ໃຫ້ເຫັນວ່າ: ຂະແໜງການຜະລິດຂອງອາເມຣິກາໄດ້ເຂົ້າສູ່ໄລຍະຊຸດໂຊມຮ້າຍແຮງທີ່ສຸດນັບແຕ່ປີໃນປີ 2009 ເປັນຕົ້ນມາ ເຊິ່ງຂະແໜງການຜະລິດສິນຄ້າພວມກາຍເປັນພາລະແບກຫາບອັນໃຫຍ່ຫຼວງຕໍ່ເສດຖະກິດໃນໄຕມາດ 3.
ພາຍໃຕ້ສະພາບການດັ່ງກ່າວ, ຖ້າອາເມຣິກາເກັບພາສີສິນຄ້າທີ່ຈີນສົ່ງເຂົ້າອາເມຣິກາໃນມູນຄ່າ 300 ຕື້ໂດລາສະຫະລັດທີ່ສ່ວນຫຼາຍແມ່ນເຄື່ອງບໍລິໂພກ, ກໍ່ຈະເຮັດໃຫ້ລາຄາສິນຄ້າໃນອາເມຣິກາແພງຂຶ້ນແນ່ນອນ, ການຄາດຄະເນດ້ານຜົນກຳໄລຂອງວິສາຫະກິດກໍ່ຈະຫຼຸດລົງ, ນັກທຸລະກິດການນຳເຂົ້າສິນຄ້າແລະຜູ້ບໍລິໂພກຊາວອາເມລິກາຈະຕ້ອງແບກຫາບຕົ້ນທຶນເກືອບທັງໝົດ, ແລະຈະເຮັດໃຫ້ຄວາມສ່ຽງດ້ານເສດຖະກິດຂອງອາເມຣິກາຊຸດໂຊມລົງຢ່າງຮ້າຍແຮງ.
ສົງຄາມການຄ້າຈະບໍ່ມີຜູ້ໄດ້ປຽບ, ນີ້ແມ່ນສັດຈະທຳທີ່ໄດ້ຮັບການພິສູດຊ້ຳແລ້ວຊ້ຳອີກຈາກໄລຍະປະຫວັດສາດແລະຈາກຄວາມເປັນຈິງ. ປັດຈຸບັນ, ທຸກຂະແໜງການຂອງອາເມຣິກາລ້ວນແຕ່ໄດ້ສຳຜັດກັບຄວາມເຈັບປວດຍ້ອນການຂຶ້ນພາສີ, ຫາງສຽງທີ່ຄັດຄ້ານການຂຶ້ນພາສີກຳລັງດັງແຮງຂຶ້ນເລື້ອຍໆ. ຫວ່າງມໍ່ໆມານີ້, ທ່ານຕິມຄູກ CEOບໍລິສັດAppleກໍ່ເຕືອນວ່າການຂຶ້ນພາສີຈະທຳລາຍກຳລັງແຂ່ງຂັນຂອງຜະລິດຕະພັນຂອງຕົນ. ແຕ່ວ່າ, ອາເມຣິກາມີຄົນຈຳນວນໜຶ່ງເບິ່ງຂ້າມຕົວເລກເສດຖະກິດຫຼ້າສຸດ, ປິດຫູປິດຕາບໍ່ຟັງຫາງສຽງຄັດຄ້ານຕໍ່ການຂຶ້ນພາສີ, ຊ້ຳບໍ່ໜຳຍັງໃຊ້ຄາລົມຄົມຄາຍເພື່ອແກ້ຕົວ, ນີ້ກໍ່ຊ່ຳກັບວ່າປິດຫູລັກກະດິ່ງ, ແລະບໍ່ມີຄວາມຮັບຜິດຊອບຫຍັງເລີຍຕໍ່ຜົນປະໂຫຍດແຫ່ງຊາດແລະຄວາມຜາສຸກຂອງປະຊາຊົນອາເມຣິກາ.
ສະນັ້ນຈຶ່ງຂໍຮຽກຮ້ອງໃຫ້ຄົນອາເມຣິກາເຫຼົ່ານີ້ເຄົາລົບກົດເກດພື້ນຖານດ້ານເສດຖະກິດ, ງ່ຽງຫູຮັບຟັງຫາງສຽງຄັດຄ້ານຕໍ່ການຂຶ້ນພາສີຂອງຄົນພາຍໃນປະເທດຕົນ, ກ້າຜະເຊີນໜ້າກັບຜົນສະທ້ອນອັນຮ້າຍແຮງທີ່ຈະກະທົບຕໍ່ເສດຖະກິດອາເມຣິກາຍ້ອນການຂຶ້ນພາສີ, ແລ້ວກັບຄືນສູ່ທິດທາງແກ້ໄຂບັນຫາຢ່າງຖືກຕ້ອງ.
ຄຳເຫັນ
0