ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕາມຂ່າວ CRI: ຕອນບ່າຍວັນທີ 2 ທັນວານີ້, ຢູ່ປັກກິ່ງ, ທ່ານສີຈິ້ນຜິງ ປະທານປະເທດຈີນໄດ້ສົນທະນາຜ່ານທາງວິດີໂອກັບທ່ານວະລາດີເມຍ ປູຕິນ ປະທານາທິບໍດີຣັດເຊຍ, ເພື່ອຮ່ວມກັນເປັນສັກຂີພິຍານພິທີເປີດນຳໃຊ້ທໍ່ສົ່ງອາຍແກັດທຳມະຊາດສາຍຕາເວັນອອກຈີນ-ຣັດເຊຍ.
ທ່ານສີຈິ້ນຜິງແລະທ່ານປູຕິນທີ່ພວມຢູ່ໂຊຊີໄດ້ສົ່ງຄວາມຢື້ຢາມຖາມຂ່າວເຊິ່ງກັນແລະກັນຜ່ານທາງວິດີໂອ. ທ່ານສີຈິ້ນຜິງໄດ້ສະແດງຄວາມຊົມເຊີຍຢ່າງສຸດໃຈຕໍ່ການເປີດນຳໃຊ້ທໍ່ສົ່ງອາຍແກັດທຳມະຊາດ, ແລະສະແດງຄວາມຂອບໃຈຢ່າງຈິງໃຈຕໍ່ບັນດາຜູ້ກໍ່ສ້າງທັງຫຼາຍຂອງສອງປະເທດ. ທ່ານສີຈິ້ນຜິງຊີ້ໃຫ້ເຫັນວ່າ, ທໍ່ສົ່ງອາຍແກັດທຳມະຊາດສາຍຕາເວັນອອກແມ່ນໂຄງການທີ່ເປັນຂີດໝາຍຂອງການຮ່ວມມືດ້ານພະລັງງານລະຫວ່າງຈີນ-ຣັດເຊຍ, ຍັງແມ່ນແບບຢ່າງແຫ່ງການເຊື່ອມໂຍງເຂົ້າກັນຢ່າງເລິກເຊິ່ງແລະການຮ່ວມມືທີ່ຕ່າງຝ່າຍຕ່າງມີຜົນປະໂຫຍດລະຫວ່າງສອງຝ່າຍ.
ທ່ານສີຈິ້ນຜິງກ່າວເນັ້ນວ່າ: ປີນີ້ແມ່ນປີທີ່ຈີນ-ຣັດເຊຍສ້າງຕັ້ງສາຍພົວພັນທາງການທູດຄົບຮອບ 70 ປີ, ຂ້າພະເຈົ້າກັບທ່ານປະທານາທິບໍດີປູຕິນໄດ້ຮ່ວມກັນປະກາດການຂະຫຍາຍສາຍພົວພັນຄູ່ປະສານງານຍຸດທະສາດຮອບດ້ານໃນຍຸກໃໝ່ຈີນ-ຣັດເຊຍ, ໄດ້ເປັນເອກະພາບກັນຕົກລົງວ່າຈະສືບຕໍ່ເຮັດໃຫ້ສາຍພົວພັນລະຫວ່າງສອງຝ່າຍກາຍເປັນບູລິມະສິດຂອງສາຍພົວພັນການຕ່າງປະເທດຈີນ-ຣັດເຊຍ, ລົງເລິກການປະສານງານຍຸດທະສາດແລະການຮ່ວມມືໃນຂົງເຂດຕ່າງໆລະຫວ່າງສອງປະເທດຢ່າງໝັ້ນໜຽວບໍ່ປ່ຽນແປງ. ປະຈຸບັນ, ຈີນແລະຣັດເຊຍລ້ວນແຕ່ຢູ່ໃນໄລຍະຂໍ້ກະແຈທີ່ສຳຄັນແຫ່ງການພັດທະນາປະເທດຕົນ, ການພົວພັນລະຫວ່າງຈີນ-ຣັດເຊຍໄດ້ກ້າວເຂົ້າສູ່ຍຸກໃໝ່. ຫວັງວ່າສອງຝ່າຍຈົ່ງສືບຕໍ່ສຸມຄວາມພະຍາຍາມ, ສ້າງໂຄງການທີ່ເປັນສັນຍາລັກຄືດັ່ງໂຄງການທໍ່ສົ່ງອາຍແກັດທຳມະຊາດສາຍຕາເວັນອອກໃຫ້ຫຼາຍກວ່າເກົ່າ, ເພີ່ມພະລັງແຮງໃຫ້ແກ່ການພັດທະນາຂອງສອງປະເທດ, ແລະສ້າງຄວາມສຸກໃຫ້ແກ່ສອງປະເທດກໍຄືປະຊາຊົນສອງຊາດໃຫ້ໄດ້ດີກວ່າເກົ່າ.
ທ່ານປູຕິນກ່າວວ່າ: ເນື່ອງໃນໂອກາດທີ່ຣັດເຊຍ-ຈີນຈະສະເຫຼີມສະຫຼອງວັນສ້າງຕັ້ງສາຍພົວພັນທາງການທູດລະຫວ່າງກັນຄົບຮອບ 70 ປີ, ທໍ່ສົ່ງອາຍແກັດທຳມະຊາດສາຍຕາເວັນອອກຣັດເຊຍ-ຈີນກໍໄດ້ເປີດນຳໃຊ້ແລ້ວນັ້ນ ແມ່ນມີຄວາມໝາຍປະຫວັດສາດທີ່ສຳຄັນ, ຈະເຮັດໃຫ້ການປະສານງານຍຸດທະສາດລະຫວ່າງສອງປະເທດກ້າວຂຶ້ນສູ່ລະດັບໃໝ່.
ທໍ່ສົ່ງອາຍແກັດທຳມະຊາດສາຍຕາເວັນອອກຈີນ-ຣັດເຊຍເລີ່ມແຕ່ຊີເບີຣີຕາເວັນອອກຂອງຣັດເຊຍ, ຜ່ານບລາໂກຟເຊັນສກ໌ເຂົ້າສູ່ເມືອງເຮິ່ຍເຮີ ແຂວງເຮິ່ຍລົງຈ່ຽງຂອງຈີນ. ພາຍໃນດິນແດນຣັດເຊຍ, ທໍ່ສົ່ງດັ່ງກ່າວຍາວປະມານ 3000 ກິໂລແມັດ, ພາຍໃນແດນຈີນ, ທໍ່ສົ່ງທີ່ສ້າງຂຶ້ນໃໝ່ຍາວ 3371 ກິໂລແມັດ, ແລະໄດ້ນຳໃຊ້ທໍ່ສົ່ງທີ່ມີຢູ່ແລ້ວ 1740 ກິໂລແມັດ.
ຄຳເຫັນ
0