ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນເຊົ້າວັນທີ 14 ມັງກອນນີ້ຕາມເວລາທ້ອງຖິ່ນ, ທ່ານຫຼິວເຮີ້ ກຳມະການກົມການເມືອງສູນກາງພັກກອມມູນິດຈີນ, ຮອງນາຍົກລັດຖະມົນຕີຈີນ ທັງເປັນຫົວໜ້າຄະນະຜູ້ແທນຝ່າຍຈີນກ່ຽວກັບການເຈລະຈາເສດຖະກິດການຄ້າຮອບດ້ານຈີນ-ອາເມຣິກາໄດ້ພົບປະກັບທ່ານນາງຄຣິສຕາລີນາ ຈໍເຈຍວາ ຜູ້ອຳນວຍການໃຫຍ່ອົງການກອງທຶນເງິນຕາສາກົນ ຫຼື IMF, ທ່ານໂທມັສ ໂດໂນຮີວ ປະທານສະພາການຄ້າທົ່ວປະເທດອາເມຣິກາ ແລະ ທ່ານໄຄຣກ໌ ເອເລນ ປະທານຄະນະກຳມະການການຄ້າອາເມຣິກາ-ຈີນ.
ທ່ານຫຼິວເຮີ້ ກ່າວວ່າ: ບົນພື້ນຖານຄວາມສະເໝີພາບ ແລະ ເຄົາລົບເຊິ່ງກັນແລະກັນ, ສອງຝ່າຍຈີນແລະອາເມຣິກາໄດ້ບັນລຸການເຊັນສັນຍາເສດຖະກິດການຄ້າໄລຍະທີ 1 ເຊິ່ງຈະມີຜົນດີຕໍ່ຈີນ, ຕໍ່ອາເມຣິກາ ກໍຄືຕໍ່ທົ່ວໂລກ. ຄວາມໝາຍຂອງສັນຍາດັ່ງກ່າວບໍ່ຈຳກັດພຽງແຕ່ໃນຂົງເຂດເສດຖະກິດການຄ້າເທົ່ານັ້ນ, ແຕ່ຍັງຈະມີຜົນດີຕໍ່ການຮັກສາສັນຕິພາບ, ສະຖຽນລະພາບແລະຄວາມຈະເລີນຮຸ່ງເຮືອງຂອງໂລກອີກດ້ວຍ. ພາຍຫຼັງໄດ້ເຊັນສັນຍາແລ້ວ, ສອງຝ່າຍຄວນຮ່ວມກັນສຸມຄວາມພະຍາຍາມຈັດຕັ້ງປະຕິບັດໃຫ້ດີ ເພື່ອໃຫ້ໄດ້ໝາກຜົນດີທີ່ແທ້ຈິງ.
ທ່ານນາງຈໍເຈຍວາ ຜູ້ອຳນວຍການໃຫຍ່ IMF ກ່າວວ່າ: IMF ຈະເຮັດຄືແຕ່ເກົ່າເໝືອນດັ່ງທີ່ເຄີຍໄດ້ປະຕິບັດຜ່ານມາ, ສະເໜີຂໍ້ສະເໜີກ່ຽວກັບນະໂຍບາຍຕ່າງໆ ບົນພື້ນຖານຄວາມເປັນຈິງແລະມີຜົນດີຕໍ່ການພັດທະນາຂອງເສດຖະກິດໂລກໃຫ້ເຕີບໂຕ, ພ້ອມທັງພະຍາຍາມຢ່າງສຸດຂີດເພື່ອສາມັກຄີກັບປະເທດຕ່າງໆ ໃນການແກ້ໄຂຄວາມຂັດແຍ້ງກັນທີ່ຄ້າງຄາຢູ່.
ທ່ານໂທມັສ ໂດໂນຮີວ ແລະ ທ່ານເອເລນ ຕ່າງກໍກ່າວວ່າ: ສະພາການຄ້າທົ່ວປະເທດອາເມຣິກາ ແລະ ຄະນະກຳມະການການຄ້າອາເມຣິກາ-ຈີນ ພ້ອມດ້ວຍອົງການຕ່າງໆທີ່ເປັນສະມາຊິກ ຈະສຸມທຸກຄວາມພະຍາຍາມເພື່ອສະໜັບສະໜູນລັດຖະບານແລະວິສາຫະກິດຂອງສອງປະເທດອາເມຣິກາແລະຈີນໃນການຈັດຕັ້ງປະຕິບັດສັນຍາໄລຍະທີ 1 ໃຫ້ດີ, ເພີ່ມຄວາມໄວ້ເນື້ອເຊື່ອໃຈກັນລະຫວ່າງສອງຝ່າຍ ແລະ ສືບຕໍ່ເສີມຂະຫຍາຍບົດບາດອັນຕັ້ງໜ້າເພື່ອພັດທະນາການຮ່ວມມືດ້ານເສດຖະກິດການຄ້າອາເມຣິກາ-ຈີນ ກໍຄືສາຍພົວພັນລະຫວ່າງສອງຝ່າຍ.
ຄຳເຫັນ
0